YAHAYA 25

Na ludu wotungu

1MIRI Nyumuka Alanggu,

ku-pabokulu-kau Nyumu dàngu kuwotu-nya na tamumu.

Nadu da paràma - paràma-mu kanjupu pa-hangàtarungu-ha;

Nyumuma ma-pakaka-nja weli ndaingu,

dàngu wàngu tuturu-mu ba pahàra-nja.

2Nuna na paraingu mbàda pakabu-muyaka;

nuna na paraingu maningu tindingu-na kanànda-yaka.

Da uma hanganji pawulu tau nàmu damauka,

nda pa-pahada-anjapa lundu nu - nu.

3Napa dawotu-nggau paraï da banjaru ma-kapàru,

dàngu da-mangàdatu-nggau la parai - paraingu-da da banjaru mbana eti.

4Nadu ba ngia pa-hinggilu-kau Nyumu nduma tau lamanga,

pa-ngiangu ma-mànjaku nduma tau mila la rehi ndukana.

Ngia pa-hangindingu-kau la hambàti ngilu mbangatu,

ngia pamaü la mbana.

Nadu na tau mbana eti na-kaluluku, hama tuna na làpuru la wula urangu.#Talànga wanguna na-njenjangu ningu-mapa ba tuna yia na ihina: làpuru la wula urangu; Imbarani: làpuru ma-tàndalu kangeli.

5hama tuna na ngilu mbana la tana màdu.

Nyumu ma-pakandii-ha da muhuma,

mu-papànja-nja na warada da tau mbana eti,

hama tuna na maü karumangu na ma-pa-wadaru-ya na mbana ma-hambàti.

I Ala ba na-payema-nya na pamangu mbabu

6La Tandula Hiungu, i MIRI Mahupu-mbiha napa na-payema-nya pamangu ndumana na banjaru mbuu ndàbana la pinu tana. Na-pajàma-nya pangangu marihi hàmu dàngu angguru papindi. 7La pinu tandula nuna napa na-wainggahu-ya na karumangu handuka na ma-panggàbalu-nja da ba - banjaru. 8I MIRI Mahupu-mbiha napa na-pamolu-nya na meti lundu nu - nu! Nyuna napa na ma-podahu-ha da wai mata welingu la nimbihu mata, dàngu hi na-pamarau-ya na pamakia wàngu na manggàna-ya na banjaru-na la nggubulu pinu tana. Mbàda wànaka i MIRI dàngu na rukuna nuna jiangu-maka natumbu.

9La rehi nu napa napanii na tau,

“Langatàka-madu, Nyuna jiaya na Alanda;

Nyuna-maka na panedi-nda,

ka pamàna-nda.

Langatàka, Nyuna MIRI-ya;

Nyuna-maka na panedi-nda.

Nàhu ta-kayaka mbaha eti,

nadu ba mbàda pamàna-nandaka,” wàda.

I Ala napa nahuku-nya na Muapu

10I MIRI napa naopa-nya na Tandula Hiungu, tàka na Muapu napa nakali - lijaku-nya hama na rembi la pangia kangudu. 11Na ma-mandapu-nya napa na-pajola-ha da limana hama tuna na tau ka kungeni ba wàna. Ba tuna i MIRI napa na-pawawa-ha da ngànjangu-da hi lupa nda da-payatàngu. 12Da tindingu Muapu dàngu da kangeli janggana napàpa-ha hi na-patàda-nja la tana hi lundu da kabu hama kumburu tana.

Currently Selected:

YAHAYA 25: KAM

Highlight

Copy

Compare