YAHAYA 10

1Ura pàku-a-minyaka nyimi mawulu-ha da uku da manda mola la pa-kapidihu-ya na banjaru-nggu. 2Ba tuna nu na hurimi dimbaku-minyaka na tau mila la pa-ngalangu ngaba dàngu mamola, hi miramba-nja da manguda da ngara kawini meti lei dàngu ana lalu mila. 3Màla nggikina wàmika nu la loduna ba nahuku-nggai i Ala? Nggàra ula-mika nu la rehi patàka-nanya na ura pàda welingu la tana mamarau? Lai nggamuka nu na ngia pakarai-mi pa-ndulangu? La nggika nu miwini ninja da pawulu-mi? 4Na urami jia-makia-yaka la pameti la pabera, jàka ndia ba welinggai tanawangu. Ba tuna i MIRI mbeni-mana-nyapa dàngu daingu-mana ba nahuku-nggai.

Na Hanganji Ahuru na pawàna i MIRI

5I MIRI napanii, “Ura-pàku-naka na Ahuru! Na Ahuru jia-yaka na pawànggu hama tuna ràmbahu dàngu palu panunggalu ba ku-kanànja wànya na tauka na panggàna mbeninggu. 6Ku-pangàndi-nya na Ahuru la pa-hànjalu-ya na banjaru-nggu na ma-tambaihaku dàngu na mawuda-ya na hàngganggu. Ku-palewa-ya na Ahuru la pa-rambangu dàngu la pa-manganga dàngu la pakali - lijaku-nya na banjaru-nggu hama tuna na kabu tana la ànda,” wàna.

7Ba tuna na hanganji Ahuru ningumai duna pa-pakaka wikina. Kita-mananya na etina la pawàngu ma-hanggàri dàngu la pa-patàlaru-ya na banjaru dangu. 8Nyuna na-pangamba wikina, napanii, “Da ngora pabera-nggu maràmba juaha! 9Kuwàhi-haka da paraingu Kàlunu dàngu Kàrakemihu, Hamàtu dàngu Àrapàtu. Kuwàhi-mbuhaka da paraingu Hamaria dàngu Ndamàhiku. 10Kutalu-haka da pahanganji - pahanganji da ma-lumungu marapu da marihi kuaha-da welingu da maninja la Yeruhali dàngu Hamaria. 11La Hamaria dàngu mbuu ndàbada da marapu-da mbàda pa-tàluru-nggunjaka, hili hamanai ba tunggunya nu napa la Yeruhali lupa mbuu ndàbada da marapu da palumu-da lai nu,” wàna.

12Tàka napanii i MIRI, “Jàka jiaya na pa-palaku-nggu la Palindi Hiungu dàngu la Yeruhali mbàda hàla-yaka duna, na hanganji Ahuru napa kuhuku-nya ba lalu ngambana dàngu ngànjangu-na,” wàna.

13Na hanganji Ahuru napanii abungu, “Nuda mbuu ndàbada da palaku-nggu wàngu kuaha wiki-manggu. Nyungga, ku-manggàna dàngu kupingu. Ku-podahu-haka da padira - padira la honga ba - banjaru, dàngu kuwàhi-ha da pa-payema-da. Hama tuna na hapi mbàtingu ba kudi - diliha da tau da ma-pareta. 14Da ba - banjaru la pinu tana hama tuna hibu ma-hawurungu-ha; namuda-ma-a ba kupiti-ha da bandada, hama tuna na tau na maupu tilu ma-hawurungu la hibuda. Nda ningua wulu kàpa ma-kambàraku, nda ningua mawanga ngaruna jàka ndia majiku - jikuna,” wàna.

15Na nyuna i MIRI napanii, “Pekuna nu na kataka ba na-pahamemu wikina la hangga tau mawànya? Màla na rondangu narihi ningupa welingu la tau maràma wànya? Nda palu panunggalu-a ma-katangu tau, tàka tau duna ma-katangu palu panunggalu,” wàna.

16Nadu na tau Ahuru ba na-pangamba-duka wikina, i MIRI Mahupu-mbiha napa na-patàka-nya pahidu wàngu la pahuku-nja da parawira - parawira da maba - bànduku. Napa natàka-nja pariti bokulu hama tuna epi ma-pakehi panua naingu. 17I Ala matua, na Harii Ihirailu, napa Nyuna hama roka epiya la dalu hau lodu ba natunu pambuta-ya mbuu ndàba na ngga - nggàra, jiapa na jemi rii madàka-mbu. 18Da oma timbi dàngu da woka kamboka la tana Ahuru napa pa-patàlaru ailulu-haka, hama tuna na tau hidu na malàlu lundu meti. 19Da pingi ai napa ana hawutu-kiada-ka, hi lupa dapingu-mbu da anakeda padiha-ha.

Hawutu-ana napa na tau pa-pamànangu

20Na rehina napa natàka, na rihina na banjaru Ihirailu na mamara nda na-pahandera-anyapa na lurina la banjaru ma-kuaha na matika pa-patàlaru-ha nyuda, tàka mbulungu-kiana-ka lai MIRI, Ala matua Ihirailu. 21Na rihi hawutu-na na banjaru Ihirailu napa na-manundu belika lai Ala na ma-kaborangu. 22Jiapa-kadu nàhu na tau Ihirailu ka hama tuna na karohu wara la tehiku-ya danguna, ana pira-ayaka napa na mabeli. Na hukungu welingu lai MIRI mareni ama-naka, tàka ràka-mana dàngu ba mamola-maya ba patàlaru-ya na banjaru nuna. 23Langatàka, nggubulu-na na tana napa na-pakabu-ya paraïna i MIRI na Mahupu-mbiha; nuna pabota-na i MIRI-mayaka, dàngu nda peku-anapa la pa-panjilu-nya.

I MIRI napa nahuku-nya na Ahuru

24I MIRI na Mahupu-mbiha napanii-nya na banjaru-na na maninya la Hiungu, “Àmbi mangàdatu-dunya na tau Ahuru, jiapa ka na-kapidihu-kai dàngu na-pamayila-kai hama tuna ba tudanggai nu da tau Mehiru la handàka-na. 25Nda pira-anapa mandaina, njàpu-nanyaka na hàngga-nggunggai, hàla napa patàlaru-ngguhaka nyuda. 26Nyungga MIRI Mahupu-mbiha, napa ku-ràmbahu wànja ràmbahu, hama tuna ba ku-ràmbahu-ya na tau Mindiangu la Palindi watu Oripu. Na Ahuru napa kuhuku-nya, hama tuna ba kuhuku-nya na Mehiru. 27La rehi nu napa ku-pahàla-kai welingu la kapidihu-nanggai Ahuru, dàngu nyuda nda dahili kuaha-akai-pa,” wàna.#La lawiti Imbarani-na ningu bonjana ba tailuda da lawiti kareuku, nda na-lohangu-a jàka nggàra wàna.

Na pa-hànjalu na muhu

28Da tanatara Ahuru mbàda wàhi-danyaka na paraingu Ayatu.#Ayatu;Na paraingu yiana dàngu da paraingu da patiki la ndalaru 28-32 la lihina la Yeruhali-ha, nàhu la hingi ànda na ngia palida da ma-pakaroruku weli diangu. Nyuda mbàda làpahu-danyaka la Mikurungu! Da bàlangu-da nyuda da-bànjalu-ha la Mikumàhu! 29Nyuda mbàda làpahu-danyaka na papala dàngu hi datodu la Nggemba! Da mangia-nya la Rama da-kandàndaku, tàka da mangia-nya la Nggimbia na paraingu-na i Hanganji Haulu, mbàda palai-daka duda. 30Kaladaku-wa, ha mangia-nya la nggalimu! Ronguwa, ha mangia-nya la Laihia! Hemawa, ha mangia-nya la Anatutu! 31Da mangia-nya la Màtumena dàngu la Nggembimu dapalai-ka pa-hinggilu. 32La lodu nàhu na muhu ninyaka la paraingu Nòpu, dàngu lai nu hi da-pakawudu-ha da limada hanggangu la Tandula Hiungu, la paraingu Yeruhali.

33I MIRI Mahupu-mbiha napa na-panjoru-ha hama tuna na kahanga ai pa-katoka welingu la pingina. Na marihi ha-memu dàngu marihi jangga la hongada napa papunggu-ha hi panjoru-ha. 34I MIRI napa napunggu-ha hama tuna pingi ai la padua omangu na papunggu wàngu kataka. Jiapa-kadu ka da-kalatungu hama tuna pingi ai ma-kanjupu hawiru la Limbanongu, jiangu-ma napa ba danjoru.

Currently Selected:

YAHAYA 10: KAM

Highlight

Copy

Compare