HOHIA 8

I MIRI nahuku-nya na Ihirailu rukuna ba da-lumungu marapu

1Napanii i MIRI, “Palingu-wa tanda hanggàmaru! Na-nàhaku-ya muhu na tananggu hama tuna ikitu matewa patewa-na! Na banjaru-nggu na pangga-yaka na pa-njanjingu-nggu dàngu nyuda, dàngu da-ndubaku-ha da papekangu-nggu. 2Jiapa-kai ka dapeka ba Ala-dàngga Nyungga, dàngu dapanii ba banjaru-nggunja nyuda, matanda-ka Nyungga, 3ba tuna nda dabihu-a panyema-ya jàka nggàraya na mahàmu. Rukuna nuna napa nanyara-ha muhuda.

4Napindi hanganji na banjaru-nggu bundu nda paàra-dàngga Nyungga. Dawotu liku uruda bundu nda rongu-dàngga Nyungga. Dapiti-ha da àmahu rara àmahu bara da manguda hi da-pandoi kahala hada marapu na ma-pawiti-nya na hadànjalu-da. 5Huda eti-mànggunya na hapi àmahu rara na palumu-da da tau da-mangiangu la paraingu Hamaria. Kanjupu mbumbaru-ya na hàngganggu hanggangu lai nyuda. Lundu pirangu-mapa ba da-nutàkungu pa-pairaku wikida ba da-lumungu marapu? 6Na hapi àmahu rara na pa-lumungu la Hamaria ruku limada da mini tuku la Ihirailu-ya! Nuna na palumu-da nda Ala-aya, ba tuna lupangu pamija-maya bàdi! 7Da-hàbarungu ngilu na banjaru-nggu ba tuna napa damuti làpuru! Da woka uhu nggàndumu-da napa nda da-mararangu-a, nda da-pa-kangutangu-a ka ningu pangangu. Na nyuna jàka da-mararangu-kai da woka, ka pambuta-nahaka banjaru hawiangu da uhu nggàndumu-da. 8Hama tuna wuru mbera, nda ningu-apa linguna na Ihirailu, dàngu àtalu banjaru-ma-ahaka hama tuda da banjaru hawiangu. 9Hama tuna kalandai matàmba ma-pajurangu, tuna nuduka na tau Ihirailu ba na-kikungu pambuha wikina. Dahimbu pa-ndulangu welingu la Ahuru, dàngu dadingi pa-ariyangu la ba - banjaru hawiangu. 10Tàka nàhu napa ka ku-pauhi-nja dàngu kuhuku-nja nyuda.#kuhuku-nja nyuda; jàka ndia: nda dawotu-apa nyuda hanganji jàka ndia mapawai ngaba nduma wikida. Nda namandai-apa napa ba da-kanjaïku paraï pa-katiu, jàka na-kapidihu-ha paraïna hanganji Ahuru.

11Hama huka danguda da ngia pa-maraku pa-pahada-da da tau Ihirailu ka podahu njala, hama huka dangu-mbuda da ngia pawunda-da njala! 12Dira dangu-maha da pa-pekangu pa-tulihu-nggunja nyuda, tàka mbuu ndàbada nuda da-tebuku-ha rukuna ba dakaka-ya ba nda ningua pa-nuangu-na dàngu nyuda. 13Dawotu-ngga hunggu kameti maraku, hi danganya na tolu kameti maraku, tàka Nyungga MIRI, nda kumbuha-anja da kameti maraku nuda. Nàhu pangàda-nggunjaka da njalada hi hukunja rukuda nuda da njalada; napa ku-pangàndi belinja la Mehiru!

14Da tau Ihirailu da-pahadangu uma - uma manandangu tàka da-maromba-nya na mawulu-ha nyuda. Da tau Yahunda da turaha da paraingu maningu ngia pa-torungu-da, tàka napa ku-papurungu epi patunu pambuta-ha da uma manandangu dàngu da paraingu-da,” wàna.

Currently Selected:

HOHIA 8: KAM

Highlight

Copy

Compare