IMBARANI 4
4
1Nu ba tuna, undungu-mana-nyapa duna na njanjina i Ala, dàngu napa nawua-mandanya nu na hangahu na pambàda njanjinanda. Jia ba tuna, màtawa ka ta-manggangu ka àmbu ningu haàtu lai nyimi na manda ngalanya na hangahu panjanji-nanda. 2Nadu na Lii Mànangu nuna pambàda pa-tàkangu-yaka lai nyuta, hama tuna lai nyuda. Na nyuna nda ningua linguna nu na lii langu lai nyuda. Nadu ba jiaya narongu-danya nuna, nda dapawai-a. 3Tàka nyuta mapawai tangala-nya duta na hangahu panjanji-nanda i Ala. Nuna napatangangu dàngu na papanii-na i Ala,
“Nyungga kumbeni dàngu ku-harangu,
‘Nda jia ngalangu-ada patama la pa-hangahu dàngga Nyungga,’ wànggu,” wàna.
Napanii tuna nu i Ala jiapa-kai ba mbàda njàpuna na paràma-na piti welingu ba napadikanya yia na pinu tana. 4Nadu rukuna na lodu papihu wàna ba nidunya na pa-tulihu la Huratu Matua, “La lodu papihu wàna hangahu-nanyaka i Ala welingu la mbuu ndàbana na paràma-naka,” ba wàna. 5Rukuna nuna nimanyai na pa-tulihu, “Nda jia ngalangu-ada patama la tana nuna la pahangahu dàngga Nyungga,” ba wàna. 6Jia ba tuna nu nyuda da marongu mangilu-ya na Lii Mànangu nuna, nda dangala-anya nuna na hangahu maa ba nda da pawaidu. Jàka tuna nu lohangu-nanyaka ba ningu tau hawiangu mapeku pangala-nya nuna na hangahu. 7Nadu ba nahili kawuku-duya na hili hau lodu i Ala, “na Lodu Nàhu” ba wàna. Ba nda pira mbua ndaungu biapa ma-palàngangu ba napanii i Ala la ngaruna i Ndautu rukuna yiana, hama tuna na patiki nu kawai,
“Jàkai ronguya na wai liina i Ala la lodu nàhu,
àmbi malihu-du,” ba wàna.
8Làti jàka mbàda wua-nanjaka nuda da tau paraïna i Yuhua na hangahu panjanji-na i Ala, nda jia panii-anapa làti i Ala rukuna na hili hau lodu. 9Jia ba tuna, nduma banjaruna i Ala ni-manyapa na njanji la pa-hangahu hama tuna i Ala ba na-hangahu la lodu papihu wàna. 10Nadu na tau na mangalanya na hangahu panjanji-nanya paraïna i Ala, napa na-hangahu-mbu welingu la paràma-naka, hama tuna i Ala. 11Jia ba tuna, màtawa ka ta-pamukarungu langatàka-ma la pangala-nya na hangahu panjanji-nanda i Ala. Ka àmbu jia ningudu haàtu lai nyuta manda lundungu hama tuna nyuda àmangu, rukuna ba nda dapawai lai Ala.
12Na puluna i Ala pulungu luriya dàngu namàka; narihi-pa patara welingu la hapanda madàka mbeli mbapa. Na pulungu nuna natanju pa-ràpangu la pa-kawàri hamangu dàngu ngahu; lupa kawohuku dàngu tambiliku, hi lupa napi paràpa-nya na kanandingu dàngu na pawuku eti tau. 13Nda ningu pa-padikangu ma-kambelingu la hangga-na i Ala. Mbuu ndàbana pangita-ya dàngu na-tabunggahu-maa la mbara matana. Lai Nyunaya napa na ngia pahema ningunda.
I Miri Yehu Hupu Ratu Bokulu-ya
14Tuna nuduka hi lupangu takata undungu-ma bàdi la papeka wainda. Nadu ba nidunya lai nyuta na Hupu Ratu Bokulu-nda, na mambàda tama lundungu la hanggana i Ala – jiaya Nyuna-maka i Yehu na Ana Ala. 15Na Ratu Bokulu-nda nda jia nda pi-ananya da lamanga-nda. Tàka pambàda kamangu-yaka la mbuu ndàbana, hama tuna nyuta; jia-aya ba nda ningu njalana! 16Jia ba tuna nu, màtawa ka tatoru mbeni pahangiriya i Ala na ma-pareta wànda hàmu eti. Napa i Ala namila-nda eti hi na-pakanyuru-ta ka peku pa-ndulangu la rehina.
Currently Selected:
IMBARANI 4: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
