DEDI 47

I Yakupu ba na-hurungu la hanganji Mehiru

1-2Tunaka nu i Yuhupu na-karia-nja da anguna paluhu da tau malima palua la hanggana na hanganji. Hi napanii, “I ama dàngu da angunggu paluhu ninjaka welingu la tana Kanaàngu dàngu kabàba mbimbi, kamàmbi, hapida hamanai mbuu ndàbada da malanja manguda. Nàhu ninjaka la ngaba Nggohingu,” wàna. Hàla hi napeka-nya na hanganji ka natanda-ha nuda da anguna paluhu. 3Na-paàra-nja paraïna hanganji, “Nggàra paràma-mi?” wànanja.

Dahema nyuda, “Nyuma tau ma-pawangu banda-kama hama tuna da boku la mangilu-ma. 4Mai-manya pa-ndàdiku la tana yiana, nadu la tana Kanaàngu ba lalu mbana rimbangu-ya, hi lupa nda ningumbu rumba pangada da banda. Pahia àru-nggama ka mangiangu la ngaba Nggohingu,” wàdanya. 5Hala hi napanii na hanganji lai Yuhupu, “Nàhu na amamu dàngu da angumu paluhu ninjaka lai yiahu. 6Reki biaya yiana na tana Mehiru ba tana wiki-minya. Màta bianja ka da-engangu la ngaba Nggohingu, ba ngaba mahàmu halawàla-mayaka la tana yiana. Dàngu patanggu-nya na ma-àrapu la paràma ka na-paloku-ha da bandanggu,” wàna.

7I Yuhupu na-patanda-mbunya na amana la hanganji. I Yakupu na-pakanyuru-nya na hanganji, 8na hanganji na-paàra-nya i Yakupu, “Pira mbua ndau-naka na lurimu, ama?” wànanya.

9Nahema i Yakupu, “Nyungga mbàda hangahu tailu kambulu mbua ndaungguka ba kuluri njadangu. Na luringgu nyungga ma-handuka juaya dàngu na kabàba-a jàka pa-menjanya na lurida da boku la mangilu-nggu, ba tau njadangu-ha,” wàna. 10Hàlaka nu pa-belingu-nanyaka langu i Yakupu la hanganji hi na-pakanyuru-nya pa-pahewa wàngu. 11I Yuhupu nandula mànu-maya na amana dàngu da anguna paluhu la pa-paengangu la Mehiru. Nawua-nja tana pamangu wikida la ngaba mahàmu halawàla la tana lai nu, la lihi paraingu Ràmihu, nunjuya na lii pareta-na na hanganji. 12I Yuhupu na-payema-nja ka natoma na pangangu ndumana na amana, da anguna paluhu dàngu nggubulu-da da nua da kalembi-na, lupa tomaya na ma-màrahu halawàla.

Na rehi rimbangu

13Lalu mbana mbàringu-ya na rimbangu, hi lupa la nggi - nggini nda ningu pangangu. Na rayatu Mehiru dàngu na rayatu Kanaàngu da-maluputu dàngu nda nggiki-madapa paraï pa-rimbangu. 14Handàka - handàka ba da kei uhu nggàndumu, i Yuhupu na-pauhi-nja da àmahu wilida, hi na-pahàmu-ha la uma hanganji. 15Ba danjàpu-ka da àmahu la Mehiru dàngu la Kanaàngu, mai-nanyaka na rayatu Mehiru lai Yuhupu, “Wua-nggama pangangu! Àmbu màta-nggama pameti. Da àmahu-ma da mbutaka,” wàdanya.

16Nahema i Yuhupu, “Jàka da lundungu-ka da àmahu-mi, wua-nggaha da bandami; ka kuwua-nggai pangangu,” wànanja. 17Ka wuangu-danyaka bandada, lai Yuhupu hi nawua-nja nyuda pangangu hiluda da njarada, da mbimbida, da kamàmbi-da, da hapi dàngu da kalandai-da. La ndaungu nuna i Yuhupu nawua-nja pangangu tàka nyuda hi da-mbayaru wàngu bandada.

18La ndaungu ma-pandàkingu hili mai-danyaka lai nyuna, hi dapanii, “Màta ka ma-pabowa-nggau Miri, da àmahu-ma da-manjapu dàngu da bandama, mbàda mangumu nyumu-haka Miri. Nyuma nda ningu apa ngga - nggàrama paràka pawua-nggau Miri, jia-ma-kihaka da tàda ihi wikima dàngu da tanama. 19Àmbu màta-nggama pameti! Àmbu màta-dunja da wokama la pabulu jua. Kei bia-kama dàngu tanama kau mbayaru wa-nggama uhu nggàndumu pangama. Nyuma dàngu tanama màta ka namangu-nggama na hanganji. Wua-nggama uhu nggàndumu ka ma-panua-nya na lurima dàngu wini ka ma-hàbarungu la wokama!” wàdanya.

20Ka kei hàla-nanyaka na tana la Mehiru i Yuhupu ndumana na hanganji. Nimbihu-na na tau Mehiru nadangga lerangu tanana, nadu na rimbangu ba lalu mbana mbàringu-ya; nu ka mangu hàla-nanjaka da tana la Mehiru duna na hanganji. 21Nggubulu-na na rayatu Mehiru na panjadi-ha ata paraïna i Yuhupu. 22Hangia jua-ana na tana pànda keina, nu na tanada da ratu. Nyuda nda nggàra ihi wàngua padangga-nja da tanada, nadu ba pa-daingu wua-mananja pa-patoma wàngu lurida paraïna hanganji. 23I Yuhupu na paniinya na rayatu, “Tàngaru, nyimi dàngu da tanami, ku-keihaka ndumana na hanganji. Yiada-haka da wini kai hàbaru-nja da wokami. 24La rehi muti kai wuangu hangia welingu la lima la hanganji. Na marihi màta kai ihi wàngu nyimi bai tu wini dàngu pangami dàngu kuru umami,” wànanja.

25Napaha nyuda, “Malangu-mu Miri, bau pamara-madu-kama-ka. Nyuma duma wàngu-manya eti-mama la paata la hanganji,” wàda. 26Tunaka nu i Yuhupu tuna-nyaka uku kalaratu na rukuna nuna la tana Mehiru, nu da ihi woka na hangia welingu la lima màta ka tunggu hanganji-ya. Lundu nàhu nuna na uku kalaratu jia-mayapa na pawàngu. Hinggilu-da da tanada da ratu nda namangu-anja hanganji.

Na pakarai-na i Yakupu na ma-malamiri dehi

27Tuna nuduka na tau Ihirailu hi na-padaingu la Mehiru, la ngaba Nggohingu. Nyuda wulu-danyaka dàngu paana umbukungu-danyaka lai nu. 28I Yakupu hakambulu pihu mbua ndau-manapa na lurina la Mehiru, hi lupa hangahu patu kambulu pihu mbua ndauna na ndau lurina. 29Ba mareni àma-naka na rehi metina, paau-nanyaka i Yuhupu na anana, hi napanii-nya, “Pa-dambaku-nya na limamu la manggawa manggalipi-nggu; kau harangu ba nda jia tani-amungga lai yiahu la Mehiru.#Pa-dambaku-nya ... ; Tàngaru-ya la 24:2. 30Na pambuha-nggu tani-mangga duku la retida da boku la mangilu-nggu; ngàndi-maya na metinggu welingu yiahu dàngu kau taningga la retida nyuda,” wànanya.

Napaya i Yuhupu, “Napa kununju-maya duku hama tuna ba wàmu ama,” wàna.

31Taka i Yakupu, “Mu-harangu-wa bau wa langatàka-nya nuna,” wànanya. Ka harangu-nanyaka duna i Yuhupu, tàka i Yakupu hi na-pamalangungu la ngia pa-katuda-na.

Currently Selected:

DEDI 47: KAM

Highlight

Compare

Copy