DEDI 46

I Yakupu dàngu kuru umana ba dalaku la Mehiru

1I Yakupu na-kamomatu hàlaha da banda da malanja-naka hi nalaku. Tàka la Mbiruhemba hi nawotu-nya kameti maraku i Ala, na palumu-na i Ihàku, na amana. 2La dalu harii mata la hau na rudungu, i Ala napanii dànya i Yakupu, “Yakupu, Yakupu!” wànanya.

“Ou MIRI,” hi wàna ba nahema.

3“Nyungga Ala, na-palumu-na na amamu,” wànanya. “Àmbu mangàdatu-du palaku la Mehiru. Napa Nyungga ku-paworu-ya na wàla wuamu hi lupa nadedi banjaru bokulu lai nu. 4Napa Nyungga ma-karia-nggau la Mehiru, dàngu napa da wàla wuamu kungàndi beliha la tana yiana. I Yuhupu nimanya la lihimu jàka jia-yaka na rehi metimu,” wànanya.

5Ka hadangu laku-nanyaka i Yakupu welingu la Mbiruhemba. Da anana dawotu-ya na amada dàngu da ana da papaha-na la kareta pa-pangàndi-na na hanganji Mehiru. 6Nyuda dangàndi mbuha da bandada la maràda dàngu da bandada la uma da pangala-da la Kanaàngu, hàla laku-danyaka la Mehiru. I Yakupu na karia-hàla-manja da wàla wuana, nu 7mbuu ndàbada da ana umbuku-na, mini kawini.

8Da ana umbuku-na i Yakupu da ma-tundungu la Mehiru, jiaha: 9i Rumbingu, ana ma-maaya dehi; da anana: i Henuku, i Palu, i Hehirungu dàngu i Kàrami. 10I Hamiungu; da anana: i Yemuilu, i Yamingu, i Ohàtu, i Yakingu, i Hohàru, dàngu i Haulu, anana na papaha kawini Kanaàngu. 11I Lewi; da anana: i Nggerihongu, i Kehàtu dàngu i Marari. 12I Yahunda; da anana: i Hiyela, i Perihu dàngu i Heràhu, tàka da anana i Yahunda hawiangu, nu i Eru dàngu i Onàngu dameti la Kanaàngu. Da anana i Perihu: i Hehirungu dàngu i Hamulu. 13I Ihakàru; da anana: i Tola, i Pua, i Ayupu dàngu i Himurungu. 14I Hembulungu; da anana: i Heritu, i Elungu, dàngu i Yàhaleyilu. 15Nyuda mbuu ndàbada ana pa-paana-na i Lia lai Yakupu la Mahupatamia, hinggilu-da nyuda na anana kawinimbu na ma-tamungu Ndina. Jia ba tuna nggubulu-da da wàla wuana i Yakupu welingu lai Lia na papaha-na, tau tailu kambulu tailu-ha.

16I Nggàtu; da anana: i Hipuyungu, i Hanggi, i Huni, i Ehimbongu, i Eri, i Arondi dàngu i Areli. 17I Ahiaru; da anana: i Yimuna, i Yiwàhu, i Yiwihu dàngu i Mbiria lupa i Hera na anawini-da. Da anana i Mbiria, jiaha i Hembiru dàngu i Màlakialu. 18Nuda da tau hakambulu manomu wàla wuana i Yakupu welingu lai Hilupa, ata ngàndina i Lia na anana kawini na pawua-na i Lambàngu.

19I Rahilu papaha-na i Yakupu da dua da anana, nu i Yuhupu dàngu i Mbanyamingu. 20La Mehiru i Yuhupu tau madua-ha da anana, nu i Manahi dàngu i Epuraimu da pa-paana-na na papaha-na i Ahanàtu, anana i Potipera, na ratu la Haliupolihu. 21I Mbanyamingu; da anana: i Mbela, i Mbikiru, i Àhambilu, i Nggera, i Naamàngu, i Ehi, i Ròhu, i Mupimu, i Hupimu dàngu i Aritu. 22Da tau hakambulu mapatu nuda, wàla wuana i Yakupu welingu lai Rahilu na papaha-na.

23Pandàkingu i Ndàngu; na anana: i Huhimu. 24I Nàputali; da anana: i Yaheyilu, i Ngguni, i Yehiru dàngu i Hilimu. 25Nuda da tau mapihu da wàla wuana i Yakupu welingu lai Mbiluha, ata ngàndi pawua-na i Làmbangu lai Rahilu na anana.

26Da wàla wuana i Yakupu da malaku la Mehiru mbuu ndàbada tau nomu kambulu nomuha, nda datama la diha da rii anana. 27Da anana i Yuhupu da madedi la Mehiru tau madua-ha, hi lupa da ihi kuru umana i Yakupu da matàka la Mehiru mbuu ndàbada tau pihu kambulu-ha.

I Yakupu dàngu kuru umana la Mehiru

28I Yakupu na-paràha-nya i Yahunda palaku mangilu-nya la papaau-nya i Yuhupu ka namai pa-hàmburu-ya na amana la Nggohingu. Ba datàka-ka la Nggohingu, 29i Yuhupu na-kaliti-ya na kareta-na palua pa-pahàmburu dànya na amana lai nu. Ba da-pahàmburu-ka, na-nggàlihu-ya na amana hi namandai ba nahii. 30Napanii i Yakupu lai Yuhupu, “Nàhu màla biaka ka kumeti, nadu ba kuita-kauka nyumu dàngu ba kupi-nggauka bau luri,” wànanya.

31Hàla panii-nanyaka i Yuhupu la anguna paluhu dàngu da nua da kalembi-na hawiangu, “Nàhu kulua ka bàdi, ka kupanii-nya na hanganji, da angunggu paluhu dàngu nggubulu-da da nua da kalembi-nggu da ma-ngiangu la Kanaàngu ba ninjaka, ka wànggunya. 32Napa ka kupeka-nya ba tau pawangu mbimbi hapikai nyimi, dàngu bai ngàndi-mahaka da bandami dàngu da mangu-mika. 33Jàka napaau-nggai na hanganji dàngu ka na-paàra-nggai nggàra paràma-mi, 34peka-manya nyimi ba tau ma-paloku bandakai piti welingu pa-anakeda-mi, hama tuna da boku la mangilu-mi, ka wàminya. Ba timika nu napa na-paràha-manggai duna pa-ngiangu ningu la Nggohingu,” wànanja. Hi napanii tuna nu i Yuhupu nadu na tau Mehiru ba pa-pawawa wànguya wàda jàka panggolu dàngu tau na ma-pawangu banda.

Currently Selected:

DEDI 46: KAM

Highlight

Compare

Copy