NGGALATIA 3
3
Na uku anggama ihu jàka ndia na pawai lai Karitu
1Oi angu dedi tau Nggalatia! Lalu mbana ndubakai nyimi! Jàka nggamu biaka na ma-pambingu-kai? Dira lohangu-mayaka làti ba ku-pakaloka-nggainya na rukuna na metina i Karitu la ai harikangu! 2Kamangu kai peka-ngganya nu yiana na ma-hangia-na: Rukuna bai pahàra-nya na uku anggama-ka ihu nu, hi kiri ngala-minya na Ngahuna i Ala, jàka ndia hi rukuna bai ronguya na Lii Mànangu welingu lai Ala dàngu ba ruku pawaimi lai Karitu? 3Ka nggikina hi tu-inaka na ndubami! Ka nii, hi mbàda pakiringu dimika làti paluri bidi wànya na Ngahuna i Ala, ka nggiki hamana nàhu hi wàngu àtalu wikimi la pangala-nya na lànyapu-na? 4Kahewa-ma-anaka nu mbuu ndàbana na pambàda erami? Nggiki hama kahewa biana nu! 5I Ala nawua-nggainya na Ngahuna dàngu na-patumbu-ha da pa-hangàtarungu la hongami nyimi. Hi kiri wunda-naha nuda paraïna i Ala jiayaka ihu nu bai pahàra-nya na uku anggama, jàka ndia ba jiaya na ruku rongu-minya na Lii Mànangu dàngu bai pawai lai Karitu?
6Nuna nu hamana na pa-tulihu la Huratu Matua na rukuna i Ambarahàmu – na matuna yia: “I Ambarahàmu napawai lai Ala, rukuna nu na pawaina na-kataku-ya paraïna i Ala ba pelu tau maliiya na etina i Alaya,” ba wàna. 7Jia ba tuna màtawa kai pinya, na ana umbuku langatàka-na i Ambarahàmu duna jiaya na tau na mapawai lai Ala. 8Mbàda ita haha-mana-nyaka duna paraïna Huratu Matua ba na-pakalongga-ya paraïna i Ala na ngera hàmu belina na papuingu-na na tau nda Yahundi dàngu i Ala, jàka dapawai lai Nyuna. Nuna na Lii Mànangu papanii hahangu-ya i Ambarahàmu la lii njanji yiana, “Lai nyumu napa na-pakanyuru-ya mbuu ndàbana na banjaru la pinu tana paraïna i Ala,” ba wàna. 9Napawai i Ambarahàmu, tàka hi pa-kanyuru-ya. Tuna numbu napa mbuu ndàbana na tau pawai ba pa-kanyuru-nja anguda i Ambarahàmu.
10Da tau da ma-handera la uku anggama da-ngiangu ndàba la lumbu ràtungu, maa ba ninya na pa-tulihu la Huratu Matua, “Na tau na manda tuturu la panunju-ha mbuu ndàbada da pa-tulihu la Mbuku Uku Anggama naràtu-nya paraïna i Ala!” na mawàna. 11Nda ana haàtu-a ma-pahàmungu beli dàngu i Ala rukuna ba na-pahàra-nya na uku anggama. Nuna nu pambàda jakarungu-mayaka la Huratu Matua, “Na tau mapawai lai Ala hi nahàmu beli na papuingu-na dàngu i Ala, jia-aya duna napa na maluri!”#mapawai lai Ala hi nahàmu beli na papuingu-na dàngu i Ala, jia-aya duna napa na maluri; jàka ndia: na papuingu dàngu i Ala nahàmu belika, napa naluri ruku pawai. mbàda wàna-maka. 12Tàka na uku anggama nda pa-palatangu la pawai-aya. Ninya na pa-tulihu la Huratu Matua ba naluri rukuna na uku napa na tau na ma-pahàra-nya na uku anggama.
13Na nyuna i Karitu na-pamara-ta welingu la ràtungu-na na uku anggama, ba nawàngu pa-pajàmangu wikina la ràtungu lumunda nyuta. Maa ba ninya na pa-tulihu la Huratu Matua, Pa-ràtungu-ya na tau na mameti pa-tiwalungu la ai, na mawàna. 14Hi tuna nu na pawunda-na i Karitu, ka peku wuangu-mbuya la tau nda Yahundi na kanyuru panjanji-na i Ala lai Ambarahàmu. Nu ba tuna, nyutambu mapawai lai Ala peku ngala-ndanyaka na Ngahu na panjanji-na i Ala.
Na uku anggama ihu jàka ndia na njanjina i Ala
15Dou da angu dedinggu duku! Màla ka kupiti ngerangu welingu la paera-nda hau lodu - hau lodu. Jàka ningu tau matura lii pa-njanjingu dàngu jàka mbàda pamàndu-nyaka nu na lii pa-njanjingu, nda jia ningua haàtu ma-ngalangu papanda-ya nu na lii pa-njanjingu, jàka ndia ma-ngalangu patunya bonja-nakai. 16Da njanjina i Ala, i Alama duna na matura-ha ndumana i Ambarahàmu dàngu ndumana na tau na ana umbuku-na i Ambarahàmu. Daa la Huratu Matua nda tuna yia-a na pa-tulihu: “dàngu ndumada da tau da ana umbuku-na i Ambarahàmu” nda wàna-a duna, nuna nu na-nggànangu la tau dangu. Na pa-tulihu lai nu tuna yia duna, “dàngu ndumana na tau na ana umbuku-mu,” wàna duna, nuna nu na nggànangu la haàtu taua nu jiaya i Karitu-du na palaangu. 17Na pa-jakaru-nggu nàhu la huratu yiana tuna nu: na njanjina i Ala pambàda tura dàngu pambàda pamàndu mangilungu-mayaka duna. Na uku anggama na pa-wuangu palàngangu 430 ndaungu la malamiri-na, nda na-ngalangu-a papanda-ya na màndungu-na dàngu la pa-pamuna-nya nu na njanjina i Ala. 18Nadu jàka paraï ruku uku anggama-ya nu na pawua-na i Ala, ka nda pa-wuangu ruku njanji-ayapa nu na pawua-na i Ala. Tàka ba pambàda njanji-pàku-dunanya i Ambarahàmu paraïna i Ala, hi nawua-nyaya nuna i Ambarahàmu paraïna i Ala.
19Jàka tuna nu nggàra nduma-yaka duna hi wuangu-ya na uku anggama? Na hemana tuna nu: hi bonja wànya nu na uku jiaya ka napeka-ya na papangga-na na tau. Na undungu-na nu na uku anggama dira-ma-ana lundu la rehi tàkana na haàtu ana umbuku-na i Ambarahàmu, na patiki la panjanji-na i Ala lai Ambarahàmu. Nu na uku anggama pa-patàka-da da papalewa-ya ba na-palindi-nya la haàtu tau. 20Nu ba tuna, dua nggàbada bàdi da maninja ka ningu mali padua-nja ka wànda wàngu. Na nyuna i Ala nda nggàra naihi wàngua duna mali padua-nya, ba Nyuna wikima duna na mawàngu wikina.#Nyuna wikima duna na mawàngu wikina; jàka ndia: jia Nyunama na Ala kamehangu.
Na linguna na uku anggama
21Na-pahilitu na uku anggama dàngu da njanjina i Ala wànaka ihu nu? Jiangu-ma ba ndia-a wàngguka! Nadu ba wuangu-ya na uku anggama keha ka wua wànya luri na tau jàka wàna làti, ka pa-hàmungu beli-nanyaka na tau dàngu i Ala rukuna na uku anggama. 22Na nyuna ninya na pa-tulihu la Huratu Matua, ba la kawaha njalaya nggubulu-na na banjaru tau pinu tana. Jia ba tuna, na pa-wuangu na pambàda njanji palata-nya na pawai lai Yehu Karitu, pa-wuangu-ya la tau da mapawai.
23Ba ndedi jiaya na rehina la papawai lai Karitu, nadai tutu-matapa paraïna uku anggama; hama tuna paoka-matapa lundu la rehi pawuwa-ya na pawai. 24Jia ba tuna, nu na uku anggama jia-yaka na ma-hamata-ta nyuta lundu natàka i Karitu pa-pahàmu beliya na papuingu-nda dàngu i Ala ba ngahanda papawai lai Karitu. 25Nàhu jia-yaka na rehina ka peku pawaina na tau lai Karitu, nda na-hamata-atapa paraïna uku anggama.
26Rukuna bai pawai nyimi lai Karitu Yehu, ka pambulu daa dimi-nyaka Nyuna; tuna nuduka hi ana Alakai. 27Nyimi mbuu ndàbami pambàda pa-runungu-kaika la tamuna i Karitu, tàka hi mbàda ngala-minja da hemba wikina i Karitu la wikimi nyimi. 28La ngerana yiana nda ningu-apa hekangu-da da tau Yahundi dàngu da tau nda Yahundi, da ata dàngu da tau marandeka, da tau mini dàngu da tau kawini. Maa ba mbulungu-minyaka rukuna i Karitu Yehu. 29Jàka manguna i Karitu-kai ana umbuku-na i Ambarahàmu-dukai. Tàka hii ngalanya napa na panjanji-na i Ala.
Currently Selected:
NGGALATIA 3: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
