YAHAKIALU 6

I MIRI naràtu-nya na lumungu marapu

1I MIRI napanii-ngga, 2“Ha dumu tau nda payatangu, tàngaru-ha ni da palindi Ihirailu, dàngu patàka-njawa na lii langunggu rukuna na hukungu ndumada nyuda. 3Paràha-njawa ka da-patingi-nya dàngu ka daeti-wànya jàka nggàraya na papanii-nggu Nyungga, MIRI Hupu Majangga la palindi - palindi, la tandula - tandula-mbu, la kela - kela dàngu la lola - lolangu. Langatàka, napa ku-pangàndingu hapanda ka pakabu-ha da ngia pa-lumungu marapu. 4Napa panyungguru-ha da ngia pawotu-na maraku dàngu da kanai dupana napa kubera-ha. Mbuu ndàba da tau lai nu napa pa-pameti-ha la hangga marapu-da. 5Napa ku-patanyala-nja da metida da tau Ihirailu; tàka da rii kawudu-da napa ku-hàbaru-nja la winggiru ngia pawotu - ngia pawotu maraku nuda. 6Napa mbuu ndàba da paraingu Ihirailu pa-patàlaru-ha, mbuu ndàba da ngia pawotu maraku dàngu da marapu-da dakabu pa-ihangu, da kanai dupada da-karunggutu dàngu mbuu ndàba da pa-pandoi-da napa da-mbulangu. 7La nggi - nggini ningu tau pa-pameti, tàka da mamara napa dapingga ba MIRI-ka Nyungga.

8Hawiangu hakudu welingu lai nyuda napa ku-pamara-ha welingu la hambàli-ha tàka na nyuna nyuda papai - ihangu-ha la honga ba - banjaru; 9na ngia paluri-da la tanawangu. Hàla hi da-pangàda-ngga Nyungga dàngu hi dapinya ba ruku nda manundu etida tàka hi kuhuku-nja dàngu hi ku-pawawa-ha nyuda.#Da pa-haleli ndai da manda pirada: pawawa-ha nyuda; Imbarani: kupàda-nya ba pawawa-ka. Nyuda mbàda dunjaku-danggaka hi dapindi ningu marapu hilunggu Nyungga. Hàla napa dalabu-nya eti na wikida rukuna mbuu ndàba na akatu dàngu na ma-iraku pambàda wundada. 10Napa dapingga ba MIRI-ka Nyungga dàngu mbuu ndàba da pa-panamu wànggunja nda mili maü pangàdungu-aha,” wàna.

11I MIRI Hupu Majangga napanii, “Hawina-wa! Padudurungu-wa! Hii mila mumuhu-wa rukuna mbuu ndàba da akatu dàngu da pa-mayitangu pambàda wundana na banjaru Ihirailu. Napa nyuda dameti ruku pabera, rimbangu dàngu kanyaki pa-nggàbalungu. 12Nyuda mbuu ndàbada napa dapàda-nya na hambutalu-na na hàngganggu. Da tau mamarau la ngia pa-tanawangu napa nanggàna-ha hidu hi dameti; da ma-mareni napa dameti la pabera, tàka da marihi napa dameti rimbangu. 13Da mameti napa hau iha - hau ihada la honga marapu dàngu la winggiru ngia pawotu - ngia pawotu maraku, da taneparu la nimbihu-da da tandula majangga, la lumbu nimbihu-da da pingi ai ma-marumbingu dàngu nimbihu-da da pingi ai ma-bokulu; na kababa-na la nggini bia na ngia patunu-da kameti maraku nduma marapu-da. Nimbihu-na na tau napa napingga ba MIRI-ka Nyungga. 14Langatàka, napa ku-payalungu limanggu dàngu ku-pakabu-ya na tanada nyuda, hi na-malinggitu halawàla, piti welingu la maràda telangu mbara luru lundu la parai Ripula mbara dia. Welingu la ngia pangia - ngiangu-na na tau Ihirailu nda haàtu-a napa pa-pamara. Ka pi-nanggaka tau mbuu ndàbana ba MIRI-ka Nyungga,” wàna.

Currently Selected:

YAHAKIALU 6: KAM

Highlight

Copy

Compare