YAHAKIALU 5

I Yahakialu na-kikiru-ya na lunggina

1Napanii i MIRI, “Ha dumu tau nda payatangu, pitiwa hapanda madàka kau kikiru pambuta wànya na ruu ngoramu dàngu na ruu lunggimu. Hàlaka nu timbanya na lunggimu la timbangu hàla biwa katailu ngianya. 2Na hangia lupangu-ma utunuya la padua paraingu ba nanjàpu-ka na nggupulu-ya. Na hili hangia-i lupangu uyàlu wànya hapanda-mu dàngu winggiru-munya na paraingu. Tàka na hangia panjàpu wàna lupangu uhàbaru-nja la ngilu, hàla ka kuyaulu wànya hapanda-nggu Nyungga. 3Bii hakuda welingu la ruu lunggi nuna dàngu kawuhuku-ya la làpitu kalembi malaimu. 4Hàlaka nu hili piti hakudu welingu la ruu lunggi nuna, kau patàda-nya la epi màta ka na-mutungu. Welingu lai nu napa na-làmbatu na epi la nggubulu banjaru Ihirailu,” wànangga.

5I MIRI Hupu Majangga napanii, “Tàngaru-ya ni na Yeruhali. Yiana na paraingu kutuya la puhu pinu tana, dàngu da nanggara hawiangu la winggiru-na. 6Tàka na Yeruhali mbàda tebuku-danjaka da pareta-nggu dàngu na-lohangu ba narihi akatu-pa welingu la ba - banjaru hawiangu, jiapa narihi nda karadakui-pa welingu la nanggara - nanggara la winggiru-na. Na Yeruhali napangga-ha da pareta-nggu dàngu nda dabihu panunju-ha da ukunggu,” wànangga.

7I MIRI Hupu Majangga napanii, “Ha dumu Yeruhali, patingingu-wa! Nyumu ndau nunju-aha da pareta-nggu dàngu da ukunggu; nyumu urihi malihu-pa welingu la ba - banjaru hawiangu la winggiru-mu dàngu mbàda kiku-munjaka da hurida nuda da banjaru. 8Nyungga duku MIRI Hupu Majangga, ku-paloha-nya ba muhu-mungga Nyungga. Napa kuhuku-nggau nyumu la hanggada da banjaru hawiangu. 9Ruku mbuu ndàba na pawunda-mu na panda mbuhanggu, napa kuhuku-nya na ma-mandapu-nggau wàngu hukungu ma-mbàringu mandedi ningu hamana la pambàda wundanggu, dàngu nda kuhili wunda-apa ma-hamangu. 10Da ina da amada napa danganja da ana wikida dàngu da ana napa danganja da ina da amada. Tuna nuduka napa ba kuhuku-nja, tàka na maluri-ipa ku-patanyala-nya la nggi - nggini.

11Nyungga Ala maluri-ka, MIRI Hupu Majangga-ka, dàngu yiana-yaka na paniinggu: Rukuna ba mbàda pairaku-muyaka na Umanggu wànggu mbuu ndàba pawunda-mu da ma-akatu dàngu da pa-mayitangu, napa ku-pakabu-kau dàngu nda pa-aïngu. 12Hau beri tailu welingu la ma-mandapu-nggau napa dameti ruku kanyaki dàngu la rimbangu ma-panggàbalu-nya na paraingu. Hau beri tailu pa-hambàli wànja hapanda la hambeli paraingu, dàngu na hili hau beri tailu napa ku-patanyala-nya la nggi - nggini dàngu hi kunya - nyara wànya hapanda.

13Napa upàdanya na mbàringu-na na hàngganggu dàngu na panyara-nggu, lundu na-lànyapu na etinggu. Jàka da-hàrangu-ka nuda mbuu ndàbada, napa upi hàmunya ba Nyungga, MIRI, mbàda panii-ngguka lai nyumu rukuna ba hàngga-nggunya na nda manundu-mu. 14Napa kananda jua-ma-akauka dàngu da banjaru la winggiru-mu napa da-payudi-kau dàngu nimbihu-na na tau na manàhu-nya napa dawiliru-nggau nyumu.

15Jàka kumbeni dàngu kuhàngga-nggau hi kuhuku-nggau, mbuu ndàba da banjaru la winggiru-mu napa da-maringgingu hamangu-da. Da labu eti ba daita-kau hi da-payudi-kau. 16Napa ku-pamolu-nja da pangangu parima hahamu dàngu hi kumàta-nja pa-rimbangu da ma-mandapu-nggau. Napa dadeni-nya na pàda-danya na malara kambu ruku manjuu, hama tuna na wua pana dàka malumbu làpahu-nggau dàngu na ma-patàlaru-kau. 17Hinggilu-na na rimba pa-nggàbalungu napa ku-patàkangu-mbu kanyaki pa-nggàbalungu, mbana eti dàngu pabera pa-pameti-ha da ma-mandapu-nggau, dàngu banda bohu pa-pameti-ha da anada. Nyungga yia MIRI mambàda panii,” wàna.

Currently Selected:

YAHAKIALU 5: KAM

Highlight

Copy

Compare