YAHAKIALU 43

I MIRI nabeli la Umana

1Tunaka nu na-karia-ngga nuna na tau mini la pindu bokulu ma-hanggangu la pahunga lodu, 2lai nu kuita-ya ba nàmunya welingu la tuba pahunga lodu na handaraku ma-kalilangu na tanda ba ninya i Ala Ihirailu. Na talia liina i Ala parongu-ya hama kawoku tehiku bokulu-ya, dàngu na-hawilangu na pinu tana ruku na handaraku ba ninya i MIRI. 3Nuna na harii mata hamana dàngu na paita-nggu ba nimai pa-pakabu-ya na Yeruhali i Ala, dàngu hama tuna na paita-nggu la Luku Kembàru. Hàla hi ku-pawawa wikinggu pa-marubuku. 4Nuna na handaraku ma-kalilangu nalaku li la pindu bokulu pahunga lodu hi natama la Umana i MIRI.

5Nadanda-ngga nyungga na Ngahuna i MIRI hi nangàndi-ka la talora mbara dalu; lai nu kuita-ya na Umana i MIRI ba na-panggàbalu-nya handaraku ba ninya i MIRI. 6Ba talànga ndolaku-napa nu na tau mini la lihinggu, kurongu-ya i MIRI ba napanii dàngga nyungga welingu la Umana i MIRI, 7“Ha dumu tau nda payatangu, jia-yaka yiana na kanjàka pareta-nggu. Lai yiaka napa ku-ndàdiku ningu la njonga banjaru Ihirailu hi ku-pareta-ha nyuda lundu nu - nu. Nyuda hamangui da maràmba-da nyuda nda dahili pa-iraku-ayapa na tamu matua-nggu wàngu lumungu-da marapu jàka ndia wàngu tani-danja#tani-danja; jàka ndia: pamula-danja da andungu. da maràmba-da la pangia yiana. 8Da maràmba-da nyuda mbàda pandoi-dahaka da patenga pindu dàngu da pindu umada nyuda la lihida da patenga pindu dàngu da pindu Umanggu Nyungga, hi hau dindingu-aka ma-henaku-ha. Mbàda pa-iraku-danyaka nyuda na tamu matua-nggu wàngu pawunda-da nu na pa-mayitangu. Tuna nuduka hi ku patàlaru-ha nyuda wàngu hàngganggu. 9Tàka na nyuna piti welingu nàhu lupangu-maka bàdi da-pànjangu pa-lumungu marapu dàngu ka da-paleli-nja da metida#paleli-nja da metida; jàka ndia: paleli-nja da andungu. da maràmbada. Hàlaka nu, ndàdiku-nggunyaka napa la njongada nyuda lundu nu - nu,” wànangga.

10Hàla hi nahili panii i MIRI, “Ha dumu tau nda payatangu, peka-nyawa na banjaru Ihirailu rukuna yiana na Umanggu, dàngu paràha-nja ka dakinju pahàmu-nya na pandoi-na. Pamakia hawa nyuda ruku mbuu ndàba da njala-da. 11Dàngu jàka da makia-ka ruku pawunda wikida nyuda, kaloka-njawa na pandoi-na yiana na Umanggu lai nyuda; na hadana, da pindu tama da pindu luhuna, na pa-nunggulungu pandoi-na, mbuu ndàba da kalaratu dàngu da ukuna. Tulihu-hawa nuda mbuu ndàbada ndumada nyuda ka peku ita-danya dàngu ka peku eti-wa-danya jàka nggiki hama paloku-ha nuda mbuu ndàbada, dàngu ka nunjuha mbuu ndàba da kalaratu-na. 12Yiana-duyaka na huri mehana na Umana i MIRI: Mbuu ndàba na tana la winggiru la pinu palindi ma-kanjupu matua-ya,” wàna.

Na ngia pawotu maraku

13Yiana-yaka na hukutu ngia pawotu maraku pa-namatu-nya na hukutu pawàngu la Umana i MIRI. La winggiru wihi ngia pawotu maraku ningu hau londa wai na manjolungu-na paradua metiru-na tàka na ndàbaru-na paradua metiru-mbuna, dàngu ha-linggi dinggana la hingi hambeli-na na mahau beri patu metiru janggana. 14Piti welingu la londa wai lundu la patengangu mangia kirina, hau metiru janggana. La padua-na dua metiru janggana, dàngu paradua metiru parihi kujuru wàna welingu la winggiru-na na wihi ngia pawotu maraku. Na patailu wàna, nu na pinuna na ngia pawotu maraku, narihi kujuru paradua metiru-mbu welingu la winggiru padua-na. 15Yiana na patailu wàna jia-yaka na ngia patunu kameti maraku; dàmbu metiru janggana. La patu kabihu-na ningu ma-manyori ba hama tuna kaduha. 16Na pinuna nuna na ngia pawotu maraku na-kapatungu kabihu-na; nimbihu karaha-na nomu metiru hukutu-na. 17Na padua-na na-kapatungu kabihu-mbuna, nimbihu karaha-na pihu metiru hukutu-na, dàngu hau halaya dinggana la hingi hambeli-na na mahau beri patu metiru janggana. (Na londa waina paradua metiru mbàlaru-na.) La karaha pahunga loduna ningu panongu ma-orangu la pinu ngia pawotu maraku.

Na katua-ya na ngia pawotu maraku

18Napanii-ngga nyungga i MIRI Hupu Majangga, “Ha dumu tau nda payatangu, patingi-nyawa jàka nggàraya na papanii-nggunggau nyumu. Jàka hàlaka pa-pahada-nya na ngia pawotu maraku, lupangu-maka bàdi ukatua-ya wàngu tunumu kameti maraku la pinuna dàngu paiharu-nya wai ria kameti maraku. 19Mbulungu ratu ana umbuku-na i Handuku welingu la kabihu Lewi-a bàdi mapeku pamai la hangganggu palumu-ngga Nyungga. Nyungga, MIRI Hupu Majangga ma-wuangu pareta rukuna nuna. Wua-njawa nyuda heu hapi mini nduma kameti maraku podahu njala. 20Piti hakudu wai ria dàngu perinja da kadu da mapatu-da la kabihu pinu ngia pawotu maraku, dàngumbu la kabi - bihu la padua-na dàngu la winggiru halinggi-na nuna na ngia pawotu maraku. Tuna nuduka bau pa-matua-ya na ngia pawotu maraku dàngu ba pa-hinggilu-ya ndumanggu Nyungga. 21Hàlaka nu, piti-yawa nuna na hapi mini pa-podahu wàngu njala dàngu tunu-yawa la pangia pa-pandumangu-ya, nu la hambeli ngabana na Umana i MIRI. 22La haromu-na lupangu-ma uwotu maraku heu kamàmbi bumbu manda ningu nyurangu nduma kameti maraku pa-podahu wàngu njala. Pamatua-yawa nuna na ngia pawotu maraku wàngu wai riana nuna na kamàmbi, hama tuna na pambàda wundamu nuna la kamboka hapi mini. 23Jakàu hàlaka pawunda-ya piti heu kamboka hapi mini dàngu heu kamboka kamàmbi bumbu àmbu ningu ndàbadu nyurada, 24hàla kau ngàndi-ngganja Nyungga. Lupangu-ma da-hàbaru-nja mehi nuda da banda da madua ngiuda paraï da ratu ka damàngu patunu-ha ka kameti maraku ndumanggu Nyungga-ha. 25Nimbihu lodu la dalu pihu mbua lodu, lupangu-ma uwotu kameti maraku heu kamàmbi, heu kamboka hapi mini dàngu heu mbimbi bumbu nduma kameti maraku pa-jàmangu wàngu njala. Nuda da banda àmbu ningudu nyurada. 26Pihu mbua lodu mandaina ba lupangu-ma bàdi dawunda lii da ratu rukuna na katua-ya na ngia pawotu maraku dàngu la pa-palànyapu-ya ka peku pakiya. 27Ba nanjàpu-ka nu na pihu mbua lodu, lupangu-ma bàdi da ratu dawotu kameti maraku patunu dàngu kameti maraku papeku wàngu ndumana na banjaru la pinuna nuna na ngia pawotu maraku. Ka hàmu-duna-nyaka na etinggu lai nyimi mbuu ndàbami. Nyungga yia, MIRI Hupu Majangga mambàda panii,” wàna.

Currently Selected:

YAHAKIALU 43: KAM

Highlight

Copy

Compare