YAHAKIALU 30

I MIRI napa nahuku-nya na Mehiru

1Nahili panii i MIRI, 2-3“Ha dumu tau nda payatangu, manyura-wa dàngu patàka-nyawa na banjaru Mehiru jàka nggàraya na papanii-nggu Nyungga MIRI Hupu Majangga lai nyuda. Warawa dàngu tuna yiawa bau padudurungu:

Nai-a-ai! Mareni-nanyaka na loduna i MIRI!

Napa lu pa-luangu-nanyaka limana.

Na lodu nuna na-kapàtangu dàngu na-panggumungu,

na rehi ngalangu-da hukungu da banjaru.

4Napa natàka-nya hanggàmaru nda najaru na Hundangu.

Natungu na pabera la Mehiru.

Dahanggu - nggubalu da tau la pabera;

nggubulu-na na tana pa-rambangu-ya dàngu hi panjadi-ya watu tanyungguru.

5La pabera nuna napa pa-pameti-mbuha da panjuri pahewa welingu la Hundangu, la Lindia, la Limbia, la Arapu, la Kùbu dàngu welingu la banjaru wikinggu Nyungga, wàmu,” wànangga.

6Napanii i MIRI Hupu Majangga, “Piti weli diangu la Mikundulu lundu hu luru la Àhawangu da-hanggubalu ndàba napa la pa-hànjalungu da angu pakuhingu-na na Mehiru. Tàka na tanatara Mehiru na ma-ngànjangu na taweharu nda papinya tubana. Nyungga MIRI Hupu Majangga mambàda panii. 7Napa nanjadi-ya tana ma-kanjupu malinggitu nuna na tana la hongada da tana malinggitu hawiangu, tàka da paraingu-da danjadi tanyungguru watu. 8Jàka kuhulu-yaka na Mehiru dàngu ku-pameti-ha da angu pakuhingu-na, pi-danggaka ba MIRI-ka Nyungga.

9Jàka natàka-ka nuna na lodu, dàngu jàka mbàda kabu-naka na Mehiru, napa ku-pangàndi wànja ka - kapalu da pa-paràhangu ka da-pa-katàtaku-ha da tau Hundangu da manda nggidiku etida, ka mangàdatu-madua-danyaka. Langatàka-ma napa natàka nuna na lodu!” wàna.

10Napanii i MIRI Hupu Majangga, “Napa ku-pahuhuku-nya i Nembukatunehàru welingu la Mbambilu ka na-pambuta-ha da pawulu-na na Mehiru. 11Napa i Nembukatunehàru dàngu tanatara-na da manda pingu pa-paaïngu damai pa-pakabu-ya nuna na tana. Napa da-kaluluku wànya hapanda na Mehiru, hi lupa da-taneparu da mameti la tana nuna. 12Napa ku-pamihi-ya na Luku Nilu hi kuwua-ya la tau akatu na Mehiru nggubulu-na. Napa ku-paràha-nja da tau hangàdangu pa-patàlaru-ya nggubulu-na nuna na tana. Nyungga yia, MIRI, mambàda panii,” wàna.

13Napanii i MIRI Hupu Majangga, “Napa ku-pakabu-ha da marapu dàngu da ndewa la Mepihu. Nda jia ningu-apa maràmba la Mehiru. Mbutana na mangia-nya napa ku-pa-mangàdatu-ha. 14Napa ku-pa-malinggitu halawàla-ya nggubulu-na na Mehiru mbara luru dàngu napa kuhulu-ya na parai Huangu mbara dia. Na parai Tembi na parai puhu pareta kuhuku-nya napa, 15dàngu ku-patàlaru-ha da pawulu-na. Napa ku-hanubuku-nya na hàngganggu la Peluhiumu, na paraingu ngia pa-torungu-na na Mehiru, 16hi kanjupu mayila-ya napa nuna na paraingu. Langatàka napa kuhulu-ya na Mehiru. Napa da-tanyungguru da kangeli-na na parai Tembi hi na-nàhaku-ya iwa#Na hau pa-haleli ndai: na-nàhaku-ya iwa. nuna na paraingu. 17Da bidi mini la parai Haliupolihu dàngu la Mbumbàtihu napa da hanggubalu la pa-hànjalungu, tàka hi tanawa-nja da kawini. 18La rehi panjàpu palundu-nggunya na pa-ohangu-na na Mehiru dàngu ba kupiti-ya na kawaha-na na pa-bokulu eti wàna, napa na-panggàbalu-nya kapàtangu na Tàhapanihu hi tanawa-nja da kawini-na. 19Tuna nuduka napa ba kuhuku-nya na Mehiru, ka pi-duda-nggaka ba MIRI-ka Nyungga,” wàna.

Na pa-ohangu-na na Mehiru nanjàpu lundungu

20La tànggalu pihu wulangu hau la ndaungu pa-hakambulu hau wàna na tanawangu-ma, napanii-ngga i MIRI, 21“Ha dumu tau nda payatangu, mbàda pata-nggunyaka na limana na hanganji Mehiru, dàngu nda ningua ma-kalàkaru-ya nuna na limana jàka ndia mangàri-ya ka nahàmu hi peku màkana payàpa beli hapanda. 22Kupanii Nyungga MIRI Hupu Majangga: Nyungga yia muhu hanganji Mehiru-ka, dàngu napa kupata-ha da madua mbunguda da limana, na mahàmu-ipa hamangui na mambàda mbata. Ka yàmihu-nanyaka na hapanda welingu la limana. 23Napa kupai - ihanya la nggubulu pinu tana na tau Mehiru. 24Hàla hi ku-pakapàru-ha da limana na hanganji Mbambilu, hi kutuya na hapanda-nggu la limana. Tàka na nyuna da limana na hanganji Mehiru napa kupata-ha hi lupa na-kanjaïku dàngu nameti la hangga hanganji Mbambilu, na muhuna. 25Langatàka-ma, napa ku-pa-haluputu-ya na hanganji Mehiru, tàka na hanganji Mbambilu ku-pa-kapàru-ya. Jàka kuwua-yaka na hapanda-nggu lai nyuna, hi na-payalu-nya hanggangu la Mehiru, napa dapingga ba MIRI-ka Nyungga. 26Napa ku-patanyala-nya na tau Mehiru la nggubulu pinu tana. Ka pi-duda-nggaka ba MIRI-ka Nyungga,” wàna.

Currently Selected:

YAHAKIALU 30: KAM

Highlight

Copy

Compare