YAHAKIALU 26

Nanyura-ya rukuna na hukungu ndumana na Tiruhu

1La tànggalu hau la hau na wulangu#la hau na wulangu; La lawiti Imbarani-na nda natiki-a tamu wulangu. la pa-hakambulu hau wàna na ndaungu tanawangu-ma nyuma, napanii-ngga i MIRI, 2“Ha dumu tau nda payatangu, mbàda paoi - oingu-daka da ma-mandapu-nya la Tiruhu, ‘Nakabu-ka na Yeruhali! Dira-naka na àtalu-na la danggangu! Nda angu pa-hihiku anda-nyapa nyuna!’ ” wàda.

3Napanii i MIRI Hupu Majangga, “Nyungga yia muhu-mungga, ha Tiruhu! Napa ku-kariangu banjaru dangu pa-kaluluku-nggau nyumu, dàngu napa nyuda damai hama tuna ngalingu la tehiku-ha. 4Napa nyuda da-pakabu-ha da dindi watumu dàngu da-nyungguru-ha da lewatu-mu. Mbutana na tana na maninya lai nu napa kuwari-ya hi lupa hau watu bulu-ayaka na maninya la padua tehiku. 5Napa da mini jala dadengi jalada lai nu la pinu watu. Nyungga yia MIRI Hupu Majangga mambàda panii. Napa na Tiruhu uhu banjaru danguya. 6Napa nyuda da-rambangu dàngu da-pameti-ha da ma-mandapu-nja da paraingu la padua tana Tiruhu. Ka pi-danggaka paraï da ma-mandapu-nya na Tiruhu ba MIRI-ka Nyungga,” wàna.

7Napanii i MIRI Hupu Majangga, “Napa ku-karia-nya na maràmba Nembukatunehàru welingu la Mbambilu pa-kaluluku-nggau nyumu, ha Tiruhu. Napa namai weli diangu nuna na maràmba na ma-kanjupu kapàru-ya dàngu tanatara bokulu, njara dangu dàngu kareta - kareta pabera dàngu pamba tanatara mali la njara. 8Da ma-mandapu-nja da paraingu la padua tana napa dameti la pa-hànjalungu nuna. Napa daàki londa ngia pa-torungu na muhu, da pa-kanguhurungu dindi watu ngia pa-nggupulu dàngu da-wandalu-ha da temingu bokulu ba datuu ngia pa-torungu-da pa-rawaku-kau nyumu. 9Napa da-njularu wànja pa-njularu wàngu da dindi watumu hi da-nyungguru wànja kabuli bàhi da lewatu-mu. 10Kanjupu danguha da njarada, hi lupa da-pa-hambutalu-ya na kumburu tana ba da-hadumbalu hi na-hambongu-nggau nyumu. Na kangguruku-da da pamba tanatara mali la njara da mairu kareta bàlangu dàngu kareta pabera napa da-patandidu-ha da dindi watumu ba dali la pindu bokulu dàngu ba datama la paraingu na mambàda njadi tanyungguru watu. 11Da pamba tanatara mali la njara napa da njungu la à - àndamu hi da-pameti wànja hapanda-da da ma-mandapu-nggau nyumu. Da andungu-mu da manggoji dàngu da ma-kapingatu pa-nyungguru-ha napa. 12Nuda da muhumu napa dawàhi-ha da pawulu-mu dàngu da padangga-mu. Da nyungguru-ha da dindi watumu hi da-weharu-ha da umamu da ma-manandangu. Napa dapiti-ha da watuda, da kapapa ai dàngu da tanada, hi da-kawuka-nja la tehiku. 13Napa ku-pa-kamàndalu-ha mbuu ndàba da ludumu dàngu da lingu jungga pambabu wàmu. 14Na pabiinggu jiaya na hau watu bulu-ma-a, ngia padengi-da jala da mini jala. Nda jia hili tura beli-ayapa nuna na paraingu. Nyungga yia, MIRI Hupu Majangga mambàda panii,” wàna.

15I MIRI Hupu Majangga napanii-nya na parai Tiruhu, “Da ma-ngiangu la hingi tehiku nda - ndàndada napa paraï pa-mangàdatu ba darongu-ya na kaladaku kàkumu dàngu na kanjaïku-da da tau pa-hambàli. 16Ba daita-ya na ura dedimu, da maràmba-da da banjaru la hingi tehiku napa da-hadangu welingu la kanjàka pareta-da, hi da-kalàba-ha da kalembi malai mangarangu-da dàngu da kalembi pahikungu-da, hi nda - ndàndada ba da-mandapu la tana. Kanjupu mangàdatu-ha hi nda ana mandangu-da. 17Hàlaka nu hi dawunda-nggau ludu taningu:

Kabu-nanyaka na parai ma-pangarangu!

Mbuu ndàba da kapalu-da pawari-haka#Da pa-haleli ndai da manda pirada: pawari-haka; Imbarani: dangia-nja. welingu la tehiku lerangu.

Làti da mangia-nya da-mehangu limada la tehiku

hi lupa da-mangàdatu da tau la hingi tehiku.

18Nàhu, la lodu pakàku-kau nyumu,

nda - ndàndada da mangia-nja da nuha.

Dawàngu pa-katàtaku mbuu ndàbada nyuda

ba daita-ya na kabumu na manda najaru,” wàna.

19Napanii i MIRI Hupu Majangga, “Ku-pa-malinggitu halawàla-kau hama tuna paraingu nda ningu taungu. Napa ku-palumburu wànggau wai welingu la lata tehiku lerangu. 20Hàla hi ku-pangàndi-nggau la pangia tau meti kai pa-angungu dàngu da tau welingu la handàka-na. Kumàta padainggau la pangia tau meti, la manggawa tanyungguru watu weli nungu, dàngu da tau meti. Hi nda pahili ngia-anyapa na tanamu, dàngu nda padiha-akaupa nyumu la honga#Na hau pa-haleli ndai: nda padiha-akaupa nyumu la honga. tau luri. 21Ku-panjàdi-kau ngerangu pa-maringgingu nuna-duyaka na hupu pekamu. Napa nahimbu-kau tau, tàka nda jia hunggu-ada-nggaupa. Nyungga yia MIRI Hupu Majangga mambàda panii,” wàna.

Currently Selected:

YAHAKIALU 26: KAM

Highlight

Copy

Compare