YAHAKIALU 24

Na kawalu patai rara

1La tànggalu hakambulu wulangu hakambulu, la ndaungu pahiwa wàna na tanawangu-ma, napanii-ngga i MIRI, 2“Ha dumu tau nda payatangu, ndàtaya na tànggalu lodu nàhu, nadu ba la lodu nàhu-maka na-pakiringu pa-nggupulu-ya na paraingu Yeruhali paraïna maràmba Mbambilu. 3Ningu hau pangerangu-nggu Nyungga, MIRI, pa-patàkangu la banjaru-nggu na ma-mbuhangu pa-patula ngganggangu:

Ràbanya wai na kawalu

hàla wotuya la epi.

4Paihi-nya tolungu,

tolungu mahàmu halawàla;

tolu wunggu dàngu tolu winju

dàngu rina madangu tambiliku-na.

5Tolu mbimbi mboka ma-kanguraku pawàngu

bonjanya ai pa-mutungu#Talànga wanguna na-njenjangu ningu-mapa ba tuna yia na ihina: ai pa-mutungu; Imbarani: rii kawudu. parima hahangu.

Màta ka nawura kanggàhaku na waina

manahu-ya na tolungu papohu-nja da rina,” wàna.

6Napanii i MIRI Hupu Majangga, “Nai-a-ai nuna na paraingu na mambinu wàngu ma-pameti tau! Na paraingu nuna hama tuna kawalu mapatai raraya na panda pangohu ndoku. Da tolungu ihina pareku mara ha-kadipu - ha-kadipu-ha hi lundu nda ha-kadipu-mbupa ma-ndàdiku. 7La paraingu nuna natumbu na pameti tau na wai ria tau pa-pameti nda la tana-a nambungu ningu, tàka la pinu watu kalatungu-ya, hi nda peku hungguru-nya. 8Nuna na wai ria kumata bianya lai nu hi peku itaya dàngu hi na-karuhi himbalu-na,” wàna.

9Napanii i MIRI Hupu Majangga, “Nai-a-ai na paraingu nuna na mambinu wàngu ma-pameti tau! Nyungga wikima napa ma-pabundu-nya ai ka-huluya. 10Bonjanya aina! Hailaru-ya na epina! Manahu-ya na tolungu! Wàrunya na wai riina.#Da pa-haleli ndai da manda pirada: Wàrunya na wai riina. Tunuha da rina! 11Hàlaka nu wotuya nuna na kawalu parunggu manda ningu ihina la epi hi màtanya lundu na parara wàla epingu. Ba na-mutungu-ka na tai rarana, yarahu beli-nanyaka nuna na kawalu pa-namatungu la kalaratu huri lumungu. 12Tàka nda mbuu ndàba-ana na tai rarana na ma-àlingu la epi.#La hilu Imbarani-na na ndalaru 12 na-pakiringu wàngu dàmbu lawiti kareuku da manda lohangu jàka nggàra wàda.

13Ha dumu Yeruhali, da pawunda-mu da ma-iraku mbàda pairaku-nanyaka na wikimu. Mbàda kamangu-mangguka làti pa-payarahu-kau nyumu, tàka ba tuna nda ningua linguna, ba daingu iraku biamu-pa. Nda jia yarahu beli-amupa hi lundu kupuli-nya na hàngganggu lai nyumu. 14Nyungga yia MIRI Hupu Majangga mambàda panii. Toma-nanyaka na rehinggu duku pa-paluangu limanggu. Nda jia maromba-anggunja da njalamu dàngu nda jia jàma-anggunja jàka ndia nda jia aï-anggunggau nyumu. Jianguma napa ba hukunggau nyumu hama tudana da pawunda-mu mbuu ndàbada. Nyungga yia MIRI Hupu Majangga mambàda panii,” wàna.

Na metina na papaha-na na wunangu

15Napanii-ngga i MIRI, 16“Ha dumu tau nda payatangu, wàngu harabàndangu napa kupiti-ya na tau na padira mbuhamu. Na nyuna àmbu jia padudurungu dàngu àmbu jia hiidumu, jàka ndia àmbu jia màta-dumunja pa-njànjaru da wai matamu. 17Àmbu jia peku rongu-duya na kahutuku-mu. Àmbu jia laku dàngu nda teradumu, jàka ndia dàngu nda ningu halapa-mu, hama tuna tau ringu langu. Àmbu pandàda-nya na matamu, dàngu àmbu ngangudu roti ringu langu,” wànangga.

18La mbaru kupanii dànya na banjaru tàka la rudungu nameti na papaha-nggu. La haromu-na ku-pahàra-nya na pa-paniingu-ka. 19Na paàrangu na rayatu, “Ka nggikina ama hi tumu nu? Nggàra-yaka na ihina ndumama nyuma?” wàda.

20Hàla hi kupanii-nja, “I MIRI na-paràha-ngga nyungga 21pa-patàka-nggainya lai nyimi yiana na lii langu: Mi-bokulu eti wànya nyimi na kapingatu-na na Umana i MIRI. Imbuhangu pa-tàngaru-ya dàngu palua pa-tadalu-ya, tàka na nyuna napa i MIRI na-pakajari-ya na Umana. Tàka da bidi tau la ihi umami da pa-pandàdiku la Yeruhali napa pa-pameti-ha la pa-hànjalungu. 22Tàka nyimi hi iwundaya na pawunda-nggu nyungga nàhu. Napa nda jia pa-ndàdangu-ami matami jàka ndia nda jia ngangu-ami roti ringu langu. 23Nda jia laku dàngu nda tera-ami jàka ndia dàngu nda ningu halapa-mi, nda jia padudurungu jàka ndia nda jia hii-ami. Hama huka mangonangu-mi nyimi rukuda da njalami; napa ipeka ura mila dua wikimi. 24Nyungga yia Yahakialu kunjadi ngerangu lai nyimi; napa nyimi iwundaya hama tuna na pawunda-nggu nyungga nàhu. Napanii i MIRI jàka nanjadi nuna nu, napa ipinya ba MIRI Hupu Majangga-ya Nyuna,” wànggunja.

25Napanii-ngga i MIRI, “Ba tuna, ha dumu tau nda payatangu, napa kupiti-ya na Umanggu na ma-kapingatu welingu lai nyuda na pambàda bokulu eti wàda dàngu na pahàmu eti wàda, na pa-tàngaru dàngu na patadalu-da wàngu mbaha etida. Hàla hi kupiti-mbuha da anada. 26La lodu pahàra-nggunya nuna, napa na haàtu na mapeku pamara welingu la tàlaru namai lai nyumu papanii-nggaunya nuna. 27La lodu nunama peku kareuku beli-muka dàngu ndau hili kambànga-apa. Hiu panii dànya nuna na tau. Tuna nuduka napa bau njadi tanda lai nyuda; ka pi-duda-nggaka ba MIRI-ka Nyungga,” wànangga.

Currently Selected:

YAHAKIALU 24: KAM

Highlight

Copy

Compare