YAHAKIALU 16
16
Na Yeruhali manda tuturu
1Nahili paniingga nyungga i MIRI, 2“Ha dumu tau nda payatangu, paita-nya na Yeruhali da pawunda - pawunda ma-iraku da pambàda wundana,” wànangga. 3I MIRI Hupu Majangga na-paràha-ngga pa-patàka-nya yiana na lii langu la Yeruhali, “Ha dumu Yeruhali, nyumu udedi la tana Kanaàngu. Na amamu tau Amori-ya tàka na inamu tau Heti#tau Amori dàngu tau Heti; da tau Ihirailu dareki-ha da banjaru nuda ba banjaru ma-akatu-ha da makàli lumungu marapu.-ya. 4Bau dedi nda ningua ma-kàtahu-ya na puhumu, jàka ndia maihu-kau, jàka ndia maperi-nggau mehi,#maperi-nggau mehi; Pa-namatu-nya na huri tau Palatina da anarara mabidi dedi pa-peringu wai, lonahu dàngu mehiha paraïna ma-patika, hi kamburu-nja pihu mbua lodu mandaina. Na hilu Imbarani-na na ndalaru yiana hauna na lawiti kareuku na ma-bonjangu na manda lohangu jàka nggàra wàna na ihina. jàka ndia ma-palumburu-nggau hinggi. 5Nda haàtu-a mamila-nggau eti ka da-mbuhangu pawunda-nggauha nuda. Bau dedi nda ningua manamu-kau, jiapa dawàru-kinggaupa la maràda.
6Hàlaka nu nàhu-nggaka Nyungga hi kuita-kau bau kayili la kalenangu wai riamu, tàka Nyungga duku nda kumàta-anggau pameti. 7-9Kupiti wai hi kubaha-ya na riamu la ihimu. Kudoha-nya mina haitungu na tàda ihimu. Ku-pabokulu-kau hama tuna da pa-tondungu ma-kamboka. Nyumu utumbu katombuhu, uhayandalu dàngu ukalanggihu, hi lupa bidi kawini#Talànga wanguna na-njenjangu ningu-mapa ba tuna yia na ihina: bidi kawini.-kau. Da huhumu dangeri ndàndungu dàngu namalai na lunggimu, tàka na nyuna ukalulu.
Ba hili nàhu-nggaka, kuita-kau ba toma-nanyaka na rehimu la pa-pambuhangu. Ku-pahau-nggaunya na kalembi malainggu la ihimu na ma-kalulu, dàngu hi kunjanji-ya na mbuha-nggunggau nyumu. Langatàka ku-jàritu-ya na pa-njanjingu pa-pauma-dànggau nyumu, dàngu ka mangunggu Nyunggakau. Nyungga yia, MIRI Hupu Majangga mambàda panii.
10Hàlaka nu ku-pahaunggau kalembi laü pa-hikungu, halapa welingu la manulangu madira malàmihu, tera katiku welingu la tera linangu dàngu kalembi malai hàtingu. 11Ku-wotunggau ngaü watu mata tawuru, hàda la nggoru dàngu kara. 12Kuwua-nggau pula uru, pula kahilu dàngu tidu hai manandangu. 13Tuna nuduka hi ningu ngaü àmahu marara mabara-mu; da pakimu pa-pandoi welingu la tera linangu dàngu hàtingu pa-hikungu-ha. Peku ngangumu roti welingu la kanguta taringgu madira hàmu, nga wàngu manggaluangu dàngu mina haitungu. Na manandangu-mu nda ningu hamana tàka hi maràmba kawini-kau. 14Mbuu ndàba na banjaru nawotu-nya na manandangu-mu na manda ningu nyurana, tàka Nyungga-maka ma-panggaju-nggau. Nyungga yia MIRI Hupu Majangga mambàda panii.
15Tàka nyumu dumu njala paki-munyai na manandangu-mu dàngu na kawulangu-na na tamumu. Àtalu mini bia manàhu-nya ukatuda angunya.#Na hilu Imbarani-na dàmbuda da lawiti kareuku da ma-bonjangu da manda lohangu jàka nggàra wàda. 16Da pakimu hawiangu upa-mananda wànya na ngia pa-lumungu marapu-mu. Unjadi kawini pahunda tàka hiu pajàma-nya na ihimu la nimbihu tau mini.#Na hilu Imbarani-na patuda da lawiti kareuku da ma-bonjangu da manda lohangu jàka nggàra wàda. 17Welingu la ngaü àmahu marara mabara pawua-nggunggau, upandoi-ha da kahala hada tau mini, hàla hiu kajari dànja nuda da kahala tau. 18Upahau-njaha da paki pa-hikungu da pawua-nggunggau nuda da kahala tau. Uwotunja maraku mina haitungu dàngu dupa pambàda ngalamu welingu lai Nyungga. 19Kuwua-nggau pangangu welingu la taringgu madira hàmu, manggaluangu dàngu mina haitungu manda ana ningu koruna. Na nyuna mbuu ndàbada nuda umaraku wànja nuda da marapu ka dahàmu wàngu da etida. Nyungga yia MIRI Hupu Majangga mambàda panii.
20Hàlaka nu umaraku wànja da ananda, mini kawini, panjadi kameti maraku la marapu - marapu. Ndedi-mapa nu natoma ba ndau tuturu lai Nyungga? 21Lupangu-maipa bàdi upitiha da ananggu hiu maraku wànja la marapu - marapu? 22La luri pahunda-mu na pa-mayitangu nda ana pangàda-mamunya hakudu ba ana rara-kaupa àmangu, bau kalulu dàngu bau kayili la wai ria wikimu,” wànanya.
Na lurina na Yeruhali ba ma-pahunda-ya
23I MIRI Hupu Majangga napanii, “Nai a-ai! Langatàka hanggàmaru-munyaka! Ba mbàda wunda ndàba-muhaka nuda da ma-akatu. 24Dangumbu, la mambila la paraingu dàngu la hingi nimbihu ànda uwuluha da ngia pa-lumungu marapu dàngu da ngia pa-pahunda. 25Nyumu upa-iraku-ya na manandangu-mu. Upajàma-nya na ihimu la nimbihu mini manàhu-nya hi nda ana pànjangu-mu pa-njuraku. 26Na Mehiru na lihi tanamu na manda roputu wikina, mbàda katuda angu-munyaka. Harawuku-mamu nyumu pa-pahunda ka kumbeni wàngu Nyungga.
27Nàhu ku-paluangu limanggu pahuku-nggau nyumu dàngu papiti beliya na kanyuru pambàda wua-nggunggau. Kuwua-kau la tau Pilitingu ma-karaü-nggau eti dàngu malabu etinya ba itaya na huri kajari-mu.
28Tàka nyumu dumu ndedima nahoda-kau; jia ba tuna hiu kehanja da tau Ahuru. Hiu njadi pahunda-da nyuda, tàka nda nahoda-mbukau welingu lai nyuda. 29Hàla hiu njadi pahunda tau Mbambilu, nu na banjaru danggangu. Tàka nda da-duluku-mbu nyuda pa-pahoda-kau nyumu,” wàna.
30I MIRI Hupu Majangga napanii, “Mbuu ndàbada nuda mbàda wunda-muhaka hama tuna kawini pahunda manda pingu pa-makia wàngukau.#Na ndalaru 30 la hilu Imbarani-na na-pakiringu wàngu tailu lawiti kareuku da manda lohangu jàka nggàra wàda. 31La mambila la paraingu dàngu la nimbihu ànda uwuluha da ngia pa-lumungu marapu dàngu da ngia pa-pahunda. Tàka na nyuna nyumu dumu nda hama tuna na kawini pahunda hawiangu na maihi wàngu ndui. 32Nyumu hama tuna papaha ma-kaleka-nya na leina hi nawunda manda tubangu dàngu mini hawiangu. 33Na haàtu kawini pahunda pa-mbayaru mànuya duna, tàka nyumu dumu na-panjàngangu, hili nyumui mawua-nja pawua juangu da yoramu, jiapa upamanda-wa-mbunjaipa ndui ka damaiha welingu la nggi - nggini pa-katuda angunggau nyumu. 34Nyumu kawini pahunda nda ningu hamangu-kau. Nda nggàra-a mahàni-kau panjadi kawini pahunda. Nda pa-mbayaru-akau, jiapa nyumuipa ma-mbayaru. Langatàka nda ningu hamamu,” wàna.
Na hukungu welingu lai Ala nduma Yeruhali
35-36Ha dumu Yeruhali, ma-pahunda, patingi-nyawa jàka nggàraya na papanii-na i MIRI Hupu Majangga, “Mbàda kalàba-muka kalembi-mu nyumu, tàka ba ma-pahunda-kau upajàma-nya na ihimu la yo - yoramu dàngu la marapu - marapu-mu da pa-mayitangu. Upameti-ha da anamu hiu maraku wànja la marapu nuda. 37Jia ba tuna, napa ku-pauhi-nja da yoramu, da pambuha-mu hamangu-kai da pa-karaü-mu eti. Napa nyuda da-ndolaku winggiru-nggau nyumu hi da-kalàba ndàbaha da pakimu, hi peku ita-danya na ihimu na ma-kalulu. 38Napa kuhuku-nggau rukuna na njuraku-mu dàngu na pameti-mu tau na pambàda wundamu. La mbeni dàngu la hàngganggu napa kuhuku pameti kau nyumu. 39Napa kuwua-kau la yo - yoramu, tàka nyuda hi da-nyungguru-ha da pangia pahunda-mu dàngu da ngia pa-lumungu marapu. Napa dawàhi-ha mbuu ndàba da pakimu dàngu da ngaümu, hi lundu ukalulu.
40Napa nyuda da-paràha-nya na tau dangu pa-nàhaku-nggau watu, hi da-là - làtaku wànya hapanda na ihimu. 41Napa nyuda dahulu-ha da umamu hi da-paràha-nja da kawini pa-hakihii-nya na hukungu-mu nyumu. Tuna nuduka ba ku-papànja-nya na njuraku-mu. Nda peku pabe - beri-amu-njapa pawua juangu da yoramu. 42Hina duka la rehi nu hi na-wadaru na hàngganggu, dàngu hi ku-mandangu beli. Nda kuhili mbeni-apa jàka ndia nda kuhili wuhu-apa.
43Kuhuku-nggau nyumu rukuna ba ndau pangàda-nya nggiki hama kabida-nggunggau ba bidi kawini-kaupa. Wàngu mbuu ndàba pawunda-mu da ma-akatu, pawiti-munya na pambeni wànggu. Ka nggikina hiu bonja wànya njuraku-mu mbuu ndàba na hurimu na pa-mayitangu? Nyungga yia MIRI Hupu Majangga mambàda panii,” wàna.
Hama tuna na inana tuna numbu na anana kawini
44Napanii i MIRI, “Ha dumu Yeruhali, na-panggàna-nggau tau na lawiti yiana, ‘Hama tuna na inana, tana numbu na anana kawini,’ wàdanggau. 45Deningu-mana, ba anana kawini-nanggau nyumu na inamu. Nyuna na-karaü-nya eti na leina dàngu da ana wikina. Hama-mamunja nyumu da angumu kawini da ma-karaü-nja eti da leida dàngu da anada. Nyumu dàngu da angumu kawini, nu da paraingu la winggiru-mu, tau Hetiya na inami dàngu tau Amori#tau Heti ... Amori; tàngaru-ya la 16:3.-ya na amami.
46Na ayamu jiaya na Hamaria na mangia dia dàngu mbuu ndàba da ndeha-naka. Tàka na erimu jiaya na Hondumu na mangia luru dàngu mbuu ndàba da ndeha-naka. 47Hoda-muka ihu pandàki-ha da rukuda dàngu pakiku-nja da pawunda-da da pa-mayitangu? Ndedia! Nda nggi tu-anapa mandaina bau rihi irakui-pa nyumu welingu lai nyuda.
48Kuhara wànya na wikinggu Nyungga, Ala Maluri, wàna i MIRI Hupu Majangga, na angumu kawini na Hondumu dàngu da ndeha-naka ndedima duda hama akatu-mu nyumu dàngu da ndeha-muka. 49Na Hondumu dàngu da ndehana da-ngànjangu rukuna ba dangu pangangu parima hahada dàngu ba peku luri mandangu dàngu mambiru-da. Tàka na nyuna nda da-ihili-anja da tau mila dàngu da tau kudu. 50Nyuda da-ngànjangu dàngu da katiku watu, dàngu dawunda-ha da pahuda etinggu. Tuna nuduka hi ku-pakabu-ha hama tuna na pambàda itamu.
51-52Deningu-mana ba na-akatu na Hamaria, tàka na nyuna da njalana nyuna ndedi beri mandua-ada welingu la njalamu nyumu. Na huri lurimu nyumu kanjupu rihi akatu-mayapa. Da angumu kawini beri hama tuna nda danjala-a jàka pamenja-nggau nyumu. Lupangu umakia dàngu upàdangu-maka bàdi màraku-mu!” wàna.
Na Hondumu dàngu na Hamaria napa pa-pahadangu beliha
53Napanii-nya na Yeruhali i MIRI, “Napa kuhili pa-mbokaru beliha na Hondumu dàngu na Hamaria dàngu da ndeha - ndehada. Hàlaka nu ku-pambokaru-mbukau nyumu. 54Nu ba tuna nu napa umakia-nya na wikimu nyumu, tàka na màraku-mu napa na-paita-nja da angumu kawini ba dira hàmu ura-hapa nyuda. 55Napa nyuda dàngu da ndehada da-mbokaru beli, nyumumbu dàngu da ndehamu. 56Ka nda mbàda riki-amunya na Hondumu bau ngànjangu-ipa 57dàngu ba ndedi papinya na akatu-mu? Nàhu hama bia-munya nyuna; jiakau nyumu pariki wàngu tau Endumu, tau Pilitingu dàngu da lihimu hawiangu da ma-karaü-nggau eti. 58Lupangu-maka bàdi upàdangu mayila ruku na pawunda-mu na ma-iraku dàngu na pa-mayitangu. Nyungga yia MIRI mambàda panii,” wàna.
Na pa-njanjingu na ma-pangalangu lundu nu - nu
59I MIRI Hupu Majangga napanii, “Ku-palua-nggau lima hama tudana na pawunda-mu nyumu, nadu ba mbàda hinggilu-munyaka na harangu-mu hiu panggaya na pa-njanjingu-nggu dàngu nyumu. 60Tàka Nyungga duku napa kunamu-maya na pa-njanjingu pambàda turanggu dàngu nyumu ba bidi kawini-kaupa hi kutura-ya na pa-njanjingu malundu nu - nuna dàngu nyumu. 61Napa unamuha da pawunda-mu hiu pàdangu makia-mu ba ku-pabeli-nja lai nyumu da angumu kawini. Ku-panjadi-haka nyuda hama tuna ana-munja, ka jiapa nda nahanggau-nyakai pa-njanjingu-nggu Nyungga dàngu nyumu. 62Napa kutura pa-njanjingu mabidi dàngu nyumu. Ka pi-dumu-nggaka ba MIRI-ka Nyungga. 63Nda ku-utu-aha mbuu ndàba da njalamu, na nyuna nda jia maromba-amunja tàka hiu makia napa la papanii ngga - nggàra. Nyungga yia MIRI Hupu Majangga mambàda panii,” wàna.
Currently Selected:
YAHAKIALU 16: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
