LUHU 25

Da hunggu maraku ndumana na Maüna i MIRI

(Lu. 35:4-9)

1I MIRI napanii-nya i Muha, 2“Paràha-nya na tau Ihirailu ka nangàndi hunggu maraku lai Nyungga. Nggamuya na ma-miripu la etina, nangàndi bàdi hunggu maraku 3nu da: àmahu marara, mabara, dàngu wudu; 4tera linangu tamainangu, tera hawulu kawuru, mbaü atu, rara dàngu tera welingu la wulu ihi kamàmbi, 5manula mbimbi bumbu pandongu, manula malijangu, ai akahia, 6mina palita, rungu patuu mina palumu wàngu lii, dàngu patuu dupa mbii kati, 7màtu - màtu watu mata tawuru da pa-wandalu la eputu#eputu: hawàla paki ba hama kalembi nda ningu limangu-ya, welingu la tera mapabe - betingu ma-kanjupu mbotu wilina. La kalembi nuna pa-hondungu-ya mboha ma-paihingu Urimu dàngu Tumimu, dàngu da papi wàna na ratu jàka nggàraya na pawuku-na i Ala. dàngu la ndàbi kuruna na Ratu Bokulu. 8Paràha-nya na banjaru ka nawulu-ngga maünggu, ka peku engangu-nggu la hongada nyuda. 9Na maü dàngu da pawàngu lai nu màta ka da-pandoi-ha tundunya na pambàda kaka hahanggu na pa-paita-nggunggau napa,” wànanya.

Na Pàti Pa-ràndingu

(Lu. 37:1-9)

10“Pandoi hau pàti welingu la ai akahia, na nunjuna 110 hiti-metiru, na ndàbaru dàngu na janggana 66 hiti-metiru. 11Apihu-ya na kuruna dàngu liuna wànya àmahu rara ihi mbàngina dàngu tunya halaya-na àmahu rara. 12Nduma ai paduku wànya pandoi-nya patu kara àmahu rara dàngu pakàna-nja la wihina ba patu mbunguda, dàmbu kara hapapa - hapapa la karaha-na. 13Pandoi-manya paduku wànya welingu la ai akahia dàngu apihu wànya àmahu rara, 14hàla puhiha nuda da ai paduku wànya la karaha-na hapapa - hapapa. 15Nuda da ai paduku wànya màta-manja ka da-padaingu lai nu la karana, dàngu àmbu butuhu-duha. 16Hàla daa la pàti lupangu-ma kau bànjalu-ha da dua mbàla watu pangia-da da lii pareta da pawua-nggunggau napa.

17Pandoi-nya ndàbina nuna na pàti welingu la àmahu rara ihi mbangi-na, na nunjuna 110 hiti-metiru-na dàngu na ndàbaru-na 66 hiti-metiru-na. 18Pandoi dàmbu patau awangu#patau awangu; jiaha da kalibaru papalewa, ba hama tuna dika maningu ruu kàpangu-ha, ba wàda dàngu da ma-paninu maünya na mangunju-na i Ala dàngu ba ninya la banjaru-na. welingu la àmahu rara patuku, 19hau la hupu pàti hapapa - hapapa. Nuda da kahala hada patau awangu lupangu-ma ka mbulungu-maada dàngu na ndàbi pàti, 20dàngu ba pandoi-ha ka da-pahanggangu ba dàngu tawàlahu-da da ruu kàpada la pinu pàti. 21Bànjalu-ha nuda da watu ba dàmbuda daa la pati dàngu ka patanga-nya na ndàbina. 22La pangia lai nu duka napa ba ku-pahàmburu dànggau nyumu, dàngu welingu la pinu ndàbina, la manggawa-da da dàmbu patau awangu, napa nyumu kuwua-nggaunja da ukunggu ndumana na banjaru Ihirailu,” wàna.

Na menja pangia roti pa-payemangu

(Lu. 37:10-16)

23“Pandoi hau menja ai akahia na nunjuna 88 hiti-metiru, na ndàbaru-na 44 hiti-metiru, dàngu na janggana 66 hiti-metiru. 24Apihu wànya àmahu rara ihi mbangi-na dàngu tumanya halaya àmahu rara weli winggiru-na. 25Pandoi-nya halinggi-na na menja, na ma 7,5 hiti-metiru mbàlaru-na, dàngu tunya padira àmahu rara la weli winggiru-na na halinggi-na. 26Pandoi-nya patu mbua kara àmahu rara, tuha la patu mbua kabihu la wihina, la lihi hingina. 27Nuda da karana jia-haka da mapàtu-ha da ai paduku wànya ka peku dukuya na menja. 28Da ai paduku wànya lupangu-ma ka pandoi-ha welingu la ai akahia dàngu ka kamburu wànja àmahu rara. 29Pandoi-ha da kawinga, da kaba wai, da kadihi dàngu da moku nduma hunggu maraku wai angguru. Mbuu ndàbada da pawàngu la menja pa-pandoi welingu la àmahu rara ihi mbàngi-manaha bàdi. 30Na menja nuna tuya la hangga Pàti Pa-ràndingu, dàngu la pinuna nuna na menja ningu padua bàdi roti pa-payemangu,” wàna.

Tandai palita

(Lu. 37:17-24)

31“Pandoi tandai palita welingu la àmahu rara ihi mbàngi-na. Na latana dàngu na kaleki-na àmahu rara patuku-maha bàdi; da wàla ai pa-manandangu wàna, jia ndàbaha da kapunju dàngu da tanga wàlada lupangu-ma ka da-mbulungu ndàba dàngu na latana dàngu lupa na payàpa wànguya. 32La ngia payàpa wànya tunya bàdi nomu mbua kahanga, tailu mbua kahanga hapapa - hapapa. 33La nimbihu kahanga-na lupangu-ma pandoi-nja pa-manandangu wàda tailu wàla mbandàmu mangu kapunju dàngu da tanga wàlada. 34La ngia payàpa wànya lupangu pandoi-nya tunya pa-manandangu wàna patu wàla mbandàmu mangu kapunju dàngu tanga wàlada. 35La lumbu hamawa kahanga-na lupangu-ma pandoi-nya hau kapunju. 36Nggubulu ndàbana na tandai palita mangu kapunjuna dàngu da kahanga-na lupangu-ma pa-pandoi-ha welingu la hakadipu àmahu rara ihi mbàngi patuku. 37Pandoi pihu mbua palita la hau tandai palita, paketi pa-jàngapu-nya hi lupa na handaraku-na natuba-nya la hangga. 38Pandoi ngepi pa-payarahu wàngu humbu dàngu na pa-pandemangu wàngu welingu la àmahu rara ihi mbàngi-na. 39Wàngu tailu kambulu lima kilu àmahu rara ihi mbàngina pa-pandoi wànya na tandai palita dàngu mbuu ndàbada da pamàtu wàna. 40Manggangu ka pekuna ba pandoi-ya nuna na tandai palita ka nunju-maya na ngerangu na pa-paita-nggunggau la pinu palindi yiana,” wànanya.

Currently Selected:

LUHU 25: KAM

Highlight

Compare

Copy