LUHU 23

Na pa-deningu dàngu na pa-tànjingu

1“Àmbi wewarungu-du lii kambàliku, dàngu àmbi wai angunya na tau akatu na ma-wuangu hakahii kambàliku.

2Àmbi kikungu a - ànga la madangu jàka datuu manjala jàka ndia ba dawihu-ya na uku ba dawàngu pa-wuangu hakahii kambàliku. 3Àmbi tàngaru kaba mata bai timbangu palakara, jiapa ka tau milaya nu na pa-timbangu palakara-na.

4Jàka talànga ita-minya na hapi jàka ndia na kalandai papami ba na-njàrangu, ngàndi beliya la mamangu-nya. 5Jàka nanjoru na kalandai papami ba lalu mbotuna na ngàndina, ndulaya nyuna la pa-pahada-nya nuna na kalandai; àmbi màta bianya ba tuna nu.

6Wànya ma-padeningu bau lumunya na tau mila jàka mainanya papeka palakara-na la ma-timbangu. 7Wiliru-nya na manda tubangu dàngu àmbi pawiti-nya hi kiri huku pameti-ya na tau manda njala, nadu Nyungga ba nda jia pamàna-anggunya na tau na mawulu ma-akatu tungu nu. 8Àmbi kei àmahu pawua li kajiangu, nadu nuda da àmahu pawua li kajiangu, na-papoki-ya na tau ba hangganya na ma-deningu dàngu hi na-pamburi-ya na tau na manda njala.

9Àmbi àtalu etimi pa-paluangu limami la tau tàka; pi-maminya jàka nggikina na papàda eti tau tàka, nadu nyimi àmangu ba tau tàka-madukai dimi la tana Mehiru,” wànanja.

Na ndaungu papihu wàna dàngu na lodu papihu wàna

10“Nomu mbua ndaumi mandaina bai tondunja da wokami dàngu bai pauhi-nja da ihida. 11Tàka la ndaungu na papihu wàna mi-pahàla-nja bàdi. La ndaungu nuna àmbi pa-uhingu-du ngga - nggàra matumbu wikina la wokami. Pulinja nuda nduma tau mila, dàngu da rihida ndumada da banda matàmba. Tuna numai da woka angguru-mi dàngu da pingi haitungu-mi.

12Nomu mbua lodu la dalu hau minggu bai ràma paràma-mi, tàka la lodu papihu wàna màta kai hangahu, ka peku hangahu-dai duda da bandami, da atami dàngu da tau tàka da maràma lai nyimi.

13Eti-wamanja mbuu ndàbada da pambàda panii-nggunggai. Àmbu lumu-dunja da kamàla ala, jiapa la patiki-ha da tamu-ada nda ukumbu,” wàna.

Na kalaratu rukuda da lodu remi

(Lu. 34:18-26; Bel. 16:1-17)

14“Nimbihu ndaungu màta kai pandilu wundangu pambabu la patembi wàngga Nyungga. 15La wula Ambipu, la rehi pa-kawuku lupangu-ma kai mbabunya na Remi Roti Nda Patai Wolungu, bai wànya na huri na pambàda paniinggu la lii pareta-nggu, nadu ba la wulangu nunadu bai dunjaku-nya na Mehiru. Àmbi jia ngangu-mika roti patungu tai wolu la rehi mbabumi nu la pihu mbua lodu. Tàka nimbihu-na na maimi palumu-ngga, lupangu-ma ingàndingga hunggu maraku pawotu-mingga.

16Mbabunya na Remi Muti, la kawunga pakiringu-mi pamuti-ha da kawunga ihi wokami.

Mbabunya na Remi Maü Ma-paraungu la njàpu ndaungu, la rehi pauhi-minja da ihi woka angguru dàngu woka wua malàngga.

17La nimbihu ndaungu bai mbabunja nuda da remi da matailu ngiada, mbuu ndàbana na mini lupangu-ma namai palumu-ngga Nyungga, MIRI Alami.

18Àmbi wotu-dungga hunggu maraku roti patungu tai wolu bai wotungga kameti maraku banda. Da aparu banda da patuu kameti lai Nyungga nu la ngala mbabumi nda uku pabili-ha lundu hadangu harii.

19Nimbihu ndaungu lupangu-ma ingàndi la Umana i MIRI Alami uhu nggàndumu kawunga mutimi.

Da tolu ana mbimbi jàka ndia ana kamàmbi nda uku pa-manahu wànja wai huhu inada,” wàna.

Na pa-ràndingu dàngu na pareta

20“Napa ku-paràha-nya na papalewa-nggu pa-mangilu-nggai ka naopa-nggai nàhu la ànda dàngu ka nangàndi-kai la pangia na pambàda panapa-nggunggai. 21Eti wànya dàngu karadaku-nya nyuna. Àmbi patula ngganggangu hanggangu lai nyuna, nadu nyuna ba papalewa-nggunya, dàngu nda jia jàma-ananja da panjala-mi. 22Jàkai karadaku lai nyuna dàngu kai nunju hàlaha da lii pareta-nggu napa Nyungga ma-pabera dànja da muhumi mbuu ndàbada. 23Na papalewa-nggu napa na-mangilu-nggai dàngu hi na-karia-nggai la tana tau Amori, Heti, Perihu, Kanaàngu, Hewi dàngu Yembuhu, dàngu napa ku-patàlaru-ha nyuda. 24Àmbi marubuku-nja da kahala hada da maopa-nggama ba wàda, dàngu àmbi kiku-dunya na huri lumungu-da nyuda. Pa-kaweraku-ha da kahala hada manggangu-da dàngu poraku-ha da andu watu da pa-lumungu wàda. 25Jàkai marubuku-ngga Nyungga, MIRI Alami, napa ku-pakanyuru wànggai pangangu pa-ngunungu, dàngu mbuu ndàbada da pahidu wàngu napa ku-pamarau-ha welingu lai nyimi. 26La tanami nda ningua napa kawini mamunju wàla anana dàngu kawini mbuta. Napa nyimi kuwua-nggai malai luri.

27Da banjaru da patàka tomami, napa ku-pamaradaku-ha hanggangu lai Nyungga; napa kutuha nyuda hi lupa nda dapingu tubada; mbuu ndàbada da muhumi napa da-punjilungu hi dapalai. 28Napa kupariu raünja,#kupariu raünja; jàka ndia: napa ku-patàka-nja tawongu ma-pakati la njongada da papami. da muhumi, tàka da banjaru Hewi, Kanaàngu dàngu Heti napa kuwàngga-ha welingu la hanggami ka peku ndàharu-mi. 29Nda jia handàka wàngga-angguha nyuda la dalu hau ndaungu, ka àmbu màta juanya na tana, dàngu ka àmbu dawàngu etida da banda bohu. 30Napa kuwàngga hau kaliu - hau kaliunja, ka lupa natoma pàku na danguda da angumi la pa-mandapu-nya nuna na tana. 31Na padira tanami napa kupadai-nya piti welingu la Njobu Akamba lupa la Luku Epuràtu, dàngu piti welingu la Tehiku Padua lupa la maràda telangu. Nyimi kuwua-nggai kuaha la tau ma-mandapu-nya nuna na tana, hi lupa mimàka la pawàngga-ha bai ndàharungu pawàhi-ya nuna na tana. 32Àmbi turadu pa-ràndingu-mi dàngu da tau nuda, jàka ndia dàngu da kamàla alada. 33Àmbi pahia-dunja da tau nuda pa-ngiangu la tanami, ka àmbi ilumunja da kamàla alada dàngu ka àmbi njala lai Nyungga. Jàkai lumunja da kamàla alada, kabuhaku-minyaka la kambia meti,” wànanja.

Currently Selected:

LUHU 23: KAM

Highlight

Compare

Copy