LUHU 22

Na kalaratu wuangu hilu runggi

1“Nggamu na ma-manganga heu hapi jàka ndia mbimbi hàla hi narupu-ya jàka ndia nadangga-nya, na-wuangu bàdi hiluna, ndumana na heu hapi lima ngiu hapi, ndumana na heu mbimbi patu ngiu mbimbi. 2-4Nyuna nahilu-maya bàdi na malanja na pa-manganga-na. Jàka nda nggàra maningu-nya, nyuna wiki màta ka dangganya hama tuna ata, ka hilu wànya na malanja na pa-manganga-na. Nu na pa-manganga-na jàka hapiya, kalandai-ya jàka ndia mbimbi-ya, tàka hi tomanja nuda la tau nuna ba dàngu luri bia-dapa, nyuna na hiluha bàdi ndumana na heu na-wuangu hilu dua ngiu.

Nu la rudungu na haàtu na ma-manganga ba toma pa-haràda-nya ka yàpaya la hau uma, hi pameti-ya, na tau na ma-pameti-ya nda nanjala-a. Tàka na rukuna nuna jàka tumbuna la lodu, na tau na ma-pameti-ya nanjala.

5Nggamu na ma-pahàla bandana pangangu rumba la wokana jàka ndia la woka angguru-na, hàla da banda nuda hi da-njadangu pangangu ihi woka tau hawiangu,#Nggamu ... tau hawiangu; jàka ndia: Jàka ningu haàtu mahulu woka jàka ndia woka angguru, tàka hi namàta-nya nuna na epi hi lupa da-mutungu da ihi woka ... na mangu bandangu na-wuangu bàdi hilu runggina, marihi hàmu ihi wokana jàka ndia woka angguru wikina.

6Nggamu ma-padukulu epi la woka wikina, hàla na epi nuna na-làmbatu la woka tau hi da-mutungu hàla da uhu nggàndumu da mabidi tumbu jàka ndia da paingu uhu nggàndumu da pabidi kaü, na tau nuna na ma-padukulu epi na-wuangu bàdi hilu runggina na ma-mutungu uhuna.

7Ngera hama tuna ka ningu tau ma-mbuhangu pa-pahàmu pa-bànjalu haàtu ka àmahu-ha jàka ndia ka malanja pa-wilingu-ha. Tàka la malamiri nuda da pa-pahàmu ka ningu ma-manganga-ha la umana. Jàka era hungguya na tau ma-manganga-ha, nyuna na-wuangu bàdi hiluda pandua hama dangu. 8Tàka jàka nda pahunggu-ya na tau na ma-manganga, nuna na tau na ma-pahàmu-ha karia-nya bàdi la ngia pa-lumungu, tàka lai nu nyuna lupangu-ma ka na-harangu, ba nda nyuna na ma-manganga-ha da malanja da pa-pahàmu lai nyuna.

9Handàka ningu - handàka ningu mapalumungu manguna, ka ruku hapiya, kalandai-ya, mbimbiya, pakiya jàka ndia ka nggàra biaya na ma-mbulangu, hàla ka hunggu beliya, na tau na mapeka ba mangu-nanya karia-nya bàdi la ngia pa-lumungu. Na tau na pa-paloha-na i Ala ba tau njalaya, na-wuangu bàdi hiluna pandua hama dangu la mamangu-nya.

10Ngera hama tuna na haàtu na tau na ma-paloku kalandai, hapi, mbimbi jàka ndia banda hawiangu mangu anguna patau. Tunaka nu na banda nuna meti-nanya, manua-nanya jàka ndia wàhi-nanya muhu, ba tuna nda ningu ma-hakahii-nya. 11La matuna nu nalua bàdi la ngia pa-lumungu ka na-harangu lai nu la parongu-na i Ala, ba nda nyuna ma-manganga-ya na banda pa-pakata-nya nyuna. Jàka nda tuba nyuna ma-manganga-ya, na mangu bandangu duna na matanggu-nya na runggi, tàka na tau ma-paloku-ya nda na-wuangu-apa hiluda. 12Jàka tau hawiangu ma-manganga-ya nuna na banda, na tau na ma-paloku-ya jiaya na ma-wuangu hilu la mangu bandangu. 13Jàka kaü-nanya banda bohu nuna na banda, na tau na ma-paloku-ya na-paita-nya bàdi da riina rihi pangaa mabohu ka ningu tanda la mangu bandangu, nu nda na-wuangu-apa hiluna.

14Na haàtu na tau na ma-pinjangu heu banda hàla na banda nuna na-manua jàka ndia nameti, ba talànga nda ninya na mangu bandangu lai nu, na tau na ma-pinjangu na-wuangu hilu runggina. 15Tàka nu ba natumbu nuna ka ni-manyai na mangu bandangu lai nu, na tau na ma-pinjangu nda na-wuangu-apa hilu. Na banda nuna jàka banda pahewa-ya, na runggina na-pandàda wànyaka na hewana,” wàna.

Na kalaratu luri matua dàngu na kalaratu lumungu

16“Nggamu na manggeli haàtu ana karia na mandedi ningu tubangu la pa-katuda angunya, napiti-maya bàdi ka natuu papaha-na ba nawua-nya wilina. 17Na nyuna jàka nda na-pulingu na amana nuna na ana karia ba napiti-ya na anana paraïna nuna na tau mini, na tau nuna na-wuangu-ma bàdi àmahu la amana na ana karia, hama dangu wilina na haàtu ana karia.

18Nggamu biaya na kawini na mapingu pa-kabaingu pameti-maya bàdi.

19Na tau na ma-angungu banda pameti-maya bàdi.

20Nggamu na mawotu kameti maraku la kamàla ala hinggilu-nggu Nyungga, MIRI, pameti-maya bàdi.

21Àmbi kapidihu jàka ndia àmbi lapidu tau tàka; namuya àmangu nyimi ba tau tàka-madukai dimi la tana Mehiru. 22Àmbi àtalu eti biami pa-kapidihu-ha da kawini meti lei dàngu da ana mamila. 23Jàka mi-kajàliku wànja nyuda, Nyungga MIRI, kurongu-ha jàka da-warangu pakarai pa-ndulangu lai Nyungga. 24Nyungga napa kuhàngga dàngu hi ku-pameti-kai la pabera, ka lupa kawini meti leihaka da papaha-mi dàngu da anami ana mamila-haka.

25Jàkai wua paruta-nya àmahu na haàtu tau mila la honga banjaru-nggu, màtangu àmbi hada ngàndingu-du hama tuna na ma-pahurungu wutangu maningu anangu. 26Jàka mipiti hinggi lumburu-na na tau ka tuya handera wutangu-na, na hinggi lumburu nuna mi-pabeli-manya bàdi ba ndedi natama na lodu, 27nadu na hinggi nuna ba didi-maaya ba ana hawàla-na na pa-pamamitu wànanya na ihina. Jàka nda pa-pabeli-nya, nggàra-aka bàdi papaki-na pa-lumburu wàna ba na-katuda? Jàka nawara pakarai pa-ndulangu lai Nyungga, ku-patingi-manya duku nadu Nyungga ba kumila etinggu.

28Àmbu ràtu-dunya i Ala dàngu àmbu pahàru-dunya na liku uru banjaru-mu.

29Nu la rehi pa-kawuku, wotu-nggawa maraku hawiangu welingu la uhu nggàndumu pangala-mi, wai angguru-mi dàngu mina haitungu-mi.

Wua-nggaha Nyungga da kawunga anami mini, 30dàngumbu da hapi dàngu da mbimbi minimi da ma-kawunga dedi. Màta-njaka la inada nuda da banda la dalu pihu mbua lodu, hàla wua-nggaha Nyungga la lodu pawalu wàna.

31Nyimi banjaru-nggunggai, jia duya jiapa nda nggàra bandaya na pakaü banda bohu, nda uku nyimi panganya na toluna; wuanja da ahu ka danganya,” wàna.

Currently Selected:

LUHU 22: KAM

Highlight

Compare

Copy