AMUHU 7
7
NA HARII MATA RUKUNA NA HUKUNGU WELINGU LAI MIRI
Da kabala
1Ku-ngalangu hau harii mata welingu lai MIRI Hupu Majangga. Kuita-ya ba na-padikangu habàba bokulu kabala la rehi hàlana pakaü rumba nduma hanganji na tau, dàngu ba na-pakiringu pahili kalunga na rumba. 2Da kabala nuda datika pangaa pambuta-ha mbuu ndàba da matumbu la tana. Tunaka nu hi kupanii, “MIRI Hupu Majangga, jàma-nyawa na banjaru-mu! Lalu màrahu-da dàngu dala-manga, nggiki hama torungu biada?” wànggu.
3I MIRI na-panjilu-nya na pawuku-na hi napanii, “Nda nanjadi-apa napa nuna na paita-mu,” wàna.
Na epi
4Kuhili ngalangu hau harii mata welingu lai MIRI Hupu Majangga. Kuita-ya ba talànga hawanjiru-na pahuku wànya epi na banjaru-na. Na epi nuna na pamihi pambuta-ya na tehiku lerangu la unu tana#tehiku lerangu la unu tana;La pangàdangu-da da tau la handàka-na da ma-ngiangu la winggiru-na na tana Ihirailu, ningu tehiku lerangu-na la unu tana na ngia paweli-da mbuu ndàbada da luku dàngu da matawai wàda. dàngu na-pakiringu pa-pakehi-ha da woka. 5Kupanii, “Ou MIRI Hupu Majangga, papànja àru-kinya na epi! Dira màrahu dàngu lamanga-ya na banjaru-mu, nggiki hama torungu biada?” wànggu.
6I MIRI nahili panjilu-nya na pawuku-na hi napanii, “Napa yiana nda nanjadi-mbu,” wàna.
Na liku hukutu tinjangu
7Ku-ngalangu hili hau harii mata welingu lai MIRI. Kuita-ya ba na-ndolaku la hau karaha kangeli pa-pahadangu ba wàngu pawala-nya liku hukutu tinjangu. Nakita-nya na liku hukutu la limana ka ita wànya jàka natànji du na tinjangu-na na kangeli, jàka ndia. 8Na-paàra-ngga, “Nggàra paita-mu Amuhu?” wànangga.
Kuhema-ya, “Liku hukutu tinjangu MIRI,” wànggunya.
Hi napanii i MIRI, “Hi kuwànya yiana na liku hukutu ka ku-paitangu-ya ba hama kangeli manda tànjiya na banjaru-nggu. Nda kuhili panjilu-anyapa na pawuku-nggu, jiangu-maka ba kuhuku-nja. 9Da pangia, da patuda ngia pa-lumungu da ana umbuku-na i Ihàku pa-pakabu-ha napa. Pa-nyungguru-ha napa da pangia matua-da da tau Ihirailu. Napa ku-patàlaru-ha da ana umbuku-na i Hanganji Yerumbiamu,” wàna.
I Amuhu dàngu i Amanjia
10I Amanjia na ratu la Mbetilu, na pangàndi-nya na lii pa-patàkangu lai Yerumbiamu na hanganji Ihirailu, “Pahama kangunduhungu-danya i Amuhu dàngu na rayatu la pa-ndubaku-ya i Tamu Umbu. Na kareuku-na na rundaya napa na rayatu hi na-paruha-ya na tana yiana. 11Napa nameti la pa-hànjalungu i Tamu Umbu, dàngu pa-ndundilu-ya napa la ngia pa-tanawangu na tau Ihirailu, marau welingu la tana wikida, wàna ba napanii,” wàna.
12Tunaka nu ka panii-nanyaka i Amuhu i Amanjia, “Ha dumu wunangu, beliwa la Yahunda! Pa-bobarungu-wa lai nu. Màtawa nyuda ka dawua-nggau paluri wàngu! 13Àmbu hili pa-bobarungu dupa la Mbetilu. Na paraingu yiana, pa-pahinggilu nduma hanganji, dàngu ngia pa-lumungu-na na banjaru nggubulu-ya,” wàna.
14Nahema i Amuhu, “Nyungga duku nda wunangu pa-waingaba-aka. Tau kabua banda dàngu matanggu pàpu wua kapilitu-ka duku làti. 15Tàka i MIRI napaau-ngga welingu la paràma-nggu, hi na-palewa-ka pa-patàka-nya na lii languna la tau Ihirailu. 16Jia ba tuna patingi-nyawa jàka nggàraya na papanii-nanggau i MIRI. Rukuna bau hiringga papa-bobarungu ndubaku-ya na banjaru Ihirailu. 17Napanii i MIRI ba nanjadi kawini pahunda napa na papaha-mu la a - ànda la paraingu, dàngu pa-pameti la pa-hànjalungu-ha da anamu. Napa papabe - beringu la tau hawiangu-ya na tanamu, tàka nyumu wiki napa umeti la tana tau manda tandaya i MIRI. Da mangia-nya la Ihirailu jiangu-ma ba dundilu-ha la ngia pa-tanawangu, marau welingu la tana wikida,” wàna.
Currently Selected:
AMUHU 7: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
