AMUHU 6
6
Na hadànjalu na Ihirailu
1Nai-a-ai nyimi maluri lànyapu la Hiungu, dàngu nyimi ma-mambiru la Hamaria – nyimi dimi ha ma-pangora la panggolu banjaru Ihirailu, nyimi pakàli mai tomana na rayatu pakarai pa-ndulangu! 2Luawa patà-ngaru la Kàlani kai mangu palaku pangalangu la parai Hamàtu na ma-bokulu, hàlaka nu la parai Nggàta la Pilitingu. Bai kakaya darihi hàmupa da paraingu nuda wàmi, welingu la pa-hanganji Yahunda dàngu Ihirailu? Narihi lerangu-pa na tana ngabada nyuda welingu la tana ngabami nyimi? 3Ipa-dàdungu ba na-marau-mapa na lodu ura mila, tàka na pawu-ndami parengga-wa pàku-ananya na tàkana na lodu nuna.
4Nai-a-ai nyimi ma-katuda la ngia pa-katuda mbotu wili, dàngu mambabu wàngu tolu hapi dàngu tolu mbimbi kanguraku! 5Imbuhangu pa-lawitingu ludu, hama tuna na pawàna i Ndautu, dàngu iwotuha la jungga nuda da ludu. 6Iunungu angguru welingu la kaha papinu, dàngu itungu mina mbii kati mahàmu halawàla, tàka ndai hawina-a ba na hadànjalu-na Ihirailu. 7Tuna nuduka hi nyimima napa pa-kawunga dundilu la ngia pa-tanawangu. Hupu njàpu-daka napa da mbabu dàngu da pamangu-mi.
8Wàngu kawàndi-na i MIRI Ala Hupu Mambiha dàngu Hupu Majangga ba na-wuangu-ya yiana na lii panamu, “Huda eti-manggunya na abungu-na na banjaru Ihirailu; nda kumbuha-anja da uma manandangu dàngu da uma borakungu-da. Napa kuwua-ya la muhu na parai puhu pareta-da dàngu na ihi-naka,” wàna.
9Jàka ningupa tau hakambulu mamai pa-kawiningu la hau uma, dameti-mbu napa. 10Na haàtu kalembi-na na ma-pangaba patani-nya, napa namai pa-paluhu-ya na metina na anguna. Napa nawara-nya na tau na maninya la rowa kajia uma, “Màla ningupa hiana maluri hinggilu-mu nyumu?” wànanya.
Tàka hi ronguya na hemana, “Ndia!” wàna.
Ka panii-naka napa nu na kalembi-na na ma-pangaba patani-nya na mameti, “Àmbu hili kareuku dupa! Nda peku ana ka tikiya na tamuna i MIRI,” wànanya.
11Jàka na-wuangu-ka pareta i MIRI, pa-pakabu-haka napa da uma bokulu da uma kudu. 12Da-ngalangu papalai la tandula watu ihi da njara? Mbàda ninguka maluku tehiku ihi wàngu hapi? Tàka nyimi dimi ikabeli pu-haya na mola hi nanjadi-ya ma-maüku pameti wàngu, tàka na ma-mànangu hi nanjadi-ya manjala.
13Ipanii abungu ba mbàda pakàku-minyaka i Londimbàru.#Londimbàru;Na tamu yiana hama linguna na lawiti kareuku Imbarani jàka haleli-ya, “nda ngga - nggàra-aya”, wàna. Ipaniimbu, “Natoma-ma duma na kapingatu-ma la pawàhi-ya na Kàranaimu,”#Kàranaimu;Na tamuna na parai kudu yiana jàka haleli-ya “kadu”, wàna, ninu maü kapàru-ya. wàmi.
14Panii wiki-mana i Ala Hupu Majangga dàngu Hupu Mambiha, “Ha dimi banjaru Ihirailu, napa ku-pangàndingu tanatara welingu la banjaru tau hangàdangu pa-kaluluku-nya na tanami. Napa da-roduku-nggai piti weli diangu la ànda ma-hanggangu la Hamàtu lundu hu luru la Lola Aramba,” wàna.
Currently Selected:
AMUHU 6: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
