2 PETURU 3
3
Na ngera ràndiya na maina i Miri
1Oi angu dedi pambuha-nggu! Jia-yaka yiana na huratu padua wàda da pa-pangàndi-nggunggai. Daa la huratu da madua-da yiada, ku-pamukarungu pawuda-ha da pangàdangu kahingiru-mi. 2Ku-kamahi-nggai kai namuha da pulungu patiki mangilu-da da wunangu-na i Ala wànggunggai, dàngu da pareta-na i Miri, na Hanganji Ma-pamànangu, da pa-patàka-nanggai la ngaruda da pa-pahurungu. 3Na ma-papingi, màtawa kai pinya la lo - lodu hupu njàpuna, ba nàmunja napa da tau da-pakuaha pa-itirungu tolu wikida. Napa nyuda dayiki-kai 4ba tuna yia na paniida, “Na-paràndingu i Miri ba mainanya wàda. Ka nggiyaka nàhu Nyuna? Da bokunda la mandaina mbàda meti-daka tàka mbuu ndàbana hi jia - jia biayai hama tuna la kawunga dedina na awangu tana!” ba wàda. 5Da-harawuku bia la panda pajia-ya ba mbàda mandai-manaka ba na-padika wànya puluna i Ala na awangu na tana. Na tana na-padika-nya welingu la wai, dàngu wàngu wai; 6dàngu wàngu waimbudu – nu na wai la iwa bokulu – hi lundu pamolu-nya àmangu nu na pinu tana la handàka-na. 7Tàka na awangu dàngu na tana na maninya nàhu, namangga-nya paraïna na puluna i Alamai, pa-pandumangu la pa-pamolu wànya epi ngeru. Nàhu nu na awangu dàngu na tana pa-pakàpa-yapa lundu tàkanya na rapa hukunya dàngu patàlaru-ya na tau akatu la lodu pa-tandangu.
8Ba tuna angu dedinggu, yiana àru nyuna àmbi mbula-dunya: na hau lodu lai Miri ba hama-maana duna na 1000 ndaungu – nu pa-kadua-da ba hama-maada lai Nyuna. 9Nda na-mangenahu-a duna i Miri ba na-wuangu-ya na pambàda ràndina, jiapa-kai ka ningu ma-palàda tunanya nu. Làti pàku duna, lera-nanggai eti nyimia, ba nda na-mbuhangu-a ka ningu haàtu ma-molungu. Na pambuha-mana duna ka na-panjilu ndàbangu na tau welingu la njalana.
10Tàka na lodu maina i Miri hama tuna na tàka ma-manganga-ya duna. La lodu nu, napa na-munangu na awangu ba nawàngu pa-katururu, dàngu da maninja-ka la awangu da-molungu ba damutu làpu, tàka na tana hamanai da maninja lai nu mbuu ndàbada hi da-munangu.#da-munangu; jàka ndia da-mutungu; jàka ndia da-tàlaru. 11Maa ba tuna nuduka ngeru na molungu ndàbana, ka nggiki hama-naka bàdi na huri lurimi? Lupangu-maka bàdi ba na-matua na lurimi dàngu kai patuda-nya nu na lurimi ndumana i Ala, 12nu bai nedinya dàngu bai rinjunya na tàkana na Loduna i Ala. La lodu nuna namutu làpu na awangu, dàngu dalui da maninja-ka la awangu rukuna na mbanana. 13Tàka nyuta duta nedi-ndanya na pambàda ràndi-nanda i Ala, nu na awangu bidi dàngu na tana bidi, na ngia pa-ngiangu-na na matànji.
14Jia ba tuna nu, angu dedi pambuha-nggu, ba talànga nedi-minyapa na Lodu nuna, ipamukarungu langatàka-ma bàdi la paluri matua dàngu na manda ningu nyurangu la hanggana i Ala. Dàngu kai mangga-manya na pa-nuangu hàmumi dàngu i Ala. 15Màtawa pamàra wànguya ka wàmi ba na-lerangu etina i Miri ba nawua-nggai rehi manggawangu. I Paulu, na angu dedi pambuha-nda, mbàda tuna numbuka na pa-tulihu-nanggai. Ba na-tulihu-ya nuna namatu-nanya na manggàna pawua-nanya paraïna i Ala. 16La mbuu ndàbada da huratu-na i Paulu na-tulihu mànu-maha rukuda nuda. Deningu-na ba ninja da manda pirada daa la huratu-na da ma-kalutu la papinja. Dàngu jiaha nuda-duka da pa-panjingu njàngada da tau da manda nggàra papida dàngu da manda màndungu pawaida. Rukuna nuna nda ta-hangàtaru wàanya, nadu ba tudanja numbudui hawiangu da maninja la Huratu Matua. Nggàraya na pawunda-da nu pawiti-danya na molungu wiki-maada.
17Tàka nyimi dimi, angu dedi pambuha-nggu, mbàda pi-mami-njaka yiada. Jia ba tuna nu, irimangu bàdi, ka àmbu jia iru ngàndi-danggai la njàrangu-da da tau akatu hi lundu iyàmihu welingu la ngia pa-tunggulu-mi na ma-màndungu. 18Màtawa ka nabo - bonjangu napàda-minya na pa-namungu-na i Yehu Karitu, na Mirinda dàngu na Hanganji Ma-pamàna-nda, dàngu màtambu ka na bo - bonjangu na tanda-minya Nyuna. Pa-wotungu-yawa Nyuna, la lodu nàhukai dàngu lundu nu - nuka! Amingu.
Tambi welingu lai nyuma, Peturu
Currently Selected:
2 PETURU 3: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
