2 PETURU 2
2
Da kamàla ngguru
1La rehi na ma-làpahu mbàda nimbunja da kamàla wunangu la banjaru-na i Ala. Tuna numbu la padua-mi nyimi ba ninja napa da kamàla ngguru. Nyuda da patama-nja da lii pa-pekangu da manda tubangu, da ma-patàlaru-ya na tau. Dàngu hi lupa da-pahini-mbunya i Makuaha na mambàda pahàla-ha nyuda. Tuna nuduka hi daparuu-nya na pa-molungu wàda na maluu tàkanja. 2Jiapa-kai ba tuna nu, nadangu-ka ngeru na tau na makiku-nya na hurida da kamàla ngguru da pa-kuaha pa-itiru toluda. Dàngu da pawunda-da nuda da ngguru da-pawiti-nya na tau dangu hi da-pawawa-ya na Ngarangia Matubangu na ma-hanggangu lai Ala. 3Paraï pa-manganga eti, nuda da kamàla ngguru da-pakaloka-nggai lii pangerangu pawulu wikida keha ka ta-utungu lai nyuda ba wàdanggai. Tàka na ngera patanda-nja ngerada ka ratanja hukungu mbàda mandai-manaka ba payema-nja, dàngu na pa-molungu wàngu na pambàda pa-ndumangu-ha nyuda ba nedi-mananja.
4Da papalewa manjala-mbu ba nda napuli-anja pa-pahàla welingu la hukungu paraïna i Ala, na nyuna napuha-ha hu daa la naraka. Nyuda pa-panànggangu-ha la njuruku kapàtangu,#pa-panànggangu-ha la njuruku kapàtangu; la lawiti ndai da manda pirada: patuu la nggili bàhiha la ma-kapàtangu. ba pàtuha lai nu lundu toma la Lodu Patandangu ngera. 5Tuna numbu na pinu tana la rehi la handàka-na ba nda na puli-anya pa-pahàla welingu la hukungu paraïna i Ala. I Ala na-patàka-nya na iwa obungu la pinu tana ngia pa-ngiangu-da da tau akatu la rehi nu. Didi-aya i Nuhu dàngu da tau mapihu da pa-pamara, ba na-bobaru-duya na huri na paora etina i Ala. 6Tuna numbu na ngerada da paraingu Hondumu dàngu Nggomora: Na-pamolu wànja epi nuda da paraingu paraïna i Ala ka ngerangu-ya jàka nggàraya ngeru na manggàna-ha da tau akatu. 7Tàka i Lòtu hi pamara-ya, ba naluri nunju-duya na pambuha-na i Ala; nda uku handuka-ya na etina rukuna na huri kajari-da da tau ma-iraku. 8La padua-da da tau tungu nu naluri handuka eti nyuna i Lòtu nu na mahàmu huri lurina, maa ba naita dàngu ba narongu-duha da paraïda da ma-akatu hau lodu - hau lodu. 9Jia ba tuna, napi-manya duna i Miri nggiki hama pamara-nanja da tau da manunju-ya na pambuha-na jàka dahangga-nja da ma-pakamangu. Dàngu napi-manya i Ala nggiki hama pàtuha da tau ma-akatu ka pa-mayila-ha la Lodu Patandangu, 10ri - rihi da tau da ma-itirungu ma-iraku da pambuha toluda dàngu da ma-pawawa-ya na kuaha-na i Ala.
Tuna nuduka na toru mbenida dàngu na ngànjangu-da da kamàla ngguru hi nda ana kanodaru-mada pa-pawawa-ha da ma-bunjuku la awangu! 11Jiapa-ki duda da papalewa da marihi la pa-àtalu dàngu la pambiha welingu la kamàla ngguru nuda nda dakàla-aha da ma-bunjuku nuda wàngu kareuku pawawa-daha la hanggana i Miri. 12Tàka da ngguru - ngguru yiada pàku, kanjupu-maha! Nyuda hama tuda da banda da madedi ndumana ka yàpaha dàngu ka pameti-ha. Nyuda nda da-kanandingu-a, tàka da-paluangu limada nunjuya na papàda eti-ma-ada, hi da-rawaku-ha da panda pida ba da-kareuku pawawa-ha. Jia ba tuna nu rukuna na paràma wikida, ka molungu-danyaka ngeru hama tuna da banda bohu. 13Na himbalu-na na mayila pa-patumbu-da, da-pàdangu mayila napa. Lai nyuda-duda, na mapali eti ba wàda jiaya na ngera palaku-ya la harii lodu nggàra biaya na pambuha tolu wikida. Jàka da-mandapu dànggai la nga pa-mbabungu, na-palabu eti na hurida, maa ba da-maüku wànja da pa-itiru-da. 14Nda ningua hodada la patuu manjala, dàngu na pambuha-mada jiaya la pa-tàngaru kawini kajari. Tàka hi da-titiru-ha da tau mabidi pawai dàngu da manda màndungu etida. Ndàmangu-mada-nyaka da etida la pa-borakungu. Nyuda jiaha da tau pa-ràtungu! 15Ba nda da-mbuhangu-du pali la ngarangia mamola, ka njàrangu-danyaka. Nyuda da-namatu niya na ngara ngiana i Mbiliamu, na anana i Mbeuru la handàka-na. Nyuna i Mbiliamu na-mbuhangu pa-ngalangu àmahu welingu la pawunda-na na manjala. 16Tàka pa-tendangu-yaka rukuna na njalana, ba talànga pa-kareuku taungu-na na kalandai. Tuna nuduka ba bakaya nuna na wunangu ka namàta-nya na pawunda ma-katobangu-na.
17Da kamàla ngguru nuda beri hama tuna matawai mamihi-ha dàngu hama hambongu patimbu ngilu mbangatu-ha. Mbàda pandengi-nanjaka pangia ma-kapàta wuru yila paraïna i Ala. 18Dawulu lii pawola - lii pawolakungu ma-minangu dàngu da manda ningu ihingu; na itirungu la pa-kajari jiaya na pawàda la pa-panjoru-ha da tau da mangeri tambukalu làti welingu la kaloka tau ma-njàrangu luri. 19Da kamàla ngguru nuda daràndi-nja pa-marandeka da tau nuda, tàka nyuda wiki hi ata-nanja paduai paraï na ndàmangu-da na ma-paruha tau. Nadu jàka nggàra matalu-ya na tau, ba atana na matalu-duya nyuna. 20Na tau na matanda-ya i Miri dàngu i Yehu Karitu na Ma-pamàna-nda mbàda tambukalu-naka welingu la kuaha pinu tana na ma-pairaku-ya na tau pinu tana. Tàka la malamiri ka hili kàna bia-nanyai hiruna hi lundu natalu-ya paraïda nu da kuaha, ka manaü akatu-daka nyuda la hupu njàpuna welingu la wungana. 21Narihi-pa pahàmu làti da tau tungu nu jàka nda dapinya na ngarangia ma-tubangu welingu lai Ala, welingu ba dapinya, tàka la malamiri-na hi nda mbuhangu-danyai panunju-ha nuda da pareta pawua-nanja paraïna i Ala. 22Nggàraya na pawunda-da mbuti-yaka na pa-tubangu-na na lara lii yiana, “Da ahu napa dabeli-ha panganja da mutada,” dàngu “Da wei pambàda ihu napa dabeli-ha pa-ramuku la kapihaku,” ba wàna.
Currently Selected:
2 PETURU 2: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
