2 KORINITU 7
7
1Angu dedi pa-mbuhangu! Mbuu ndàbada da pa-ràndingu pa-pahanggangu lai nyuta-maha. Jia-duya màtawa ka ta-payahangu wikinda welingu la mbuu ndàbana na ma-pairaku-ya na hamangu na tàda ihinda. Màtawa ka ta-mangàdatu-nya i Ala, ka peku kahaungu-na na luri lànyapu-nda ndumana Nyuna.
Na nggaüru-na i Paulu
2Nggepi-kama nyuma daa la etimi. Nda manjala-a duma la haàtu-mbu, dàngu nda ningumbu haàtu pa-parunggi-ma. Nda ana ninguma duma ngia panggari-ma utungu welingu lai nggamu bia. 3Hi kupanii tunggu nu màta ka panjala-ha nyuda nda wànggu-anggai. Nadu, hama tuna ba mbàda wànggunggai àmangu, nyuma lalu mbana mbuha-manggai, nyuta tau ma-paangungu-ta la luri la meti. 4Nimanya duku na wai langatàka-nggunggai nyimi. Jiapa ku-hamemu-wa-kinggaipa nyimi! Jiapa ka nadangu na ma-handuka na pangala-ma, na etinggu na-nggaüru wànya na ngerami nyimi. Na-nggaüru langatàka-ma duku na etinggu!
5Ba jiaya na tàkama la Makandonia, nda peku ndokuna nyuma la pa-hangahu. Welingu lai nu - lai nu mahunggu ma-kalutu: welingu la hapapa pa-lumungu-ya, tàka welingu la eti wikima mangàdatu-ya. 6Tàka malangu-na i Ala na ma-pabokulu mànuya na etina na tau na manjàpu monungu-na; Nyuna ma-pamiripu-ha da etima ba natàka i Titu. 7Da-nggaüru da etima nda jia biaya na tàkana i Titu, tàka jia-mbuya ba napanii-ya jàka nggikina ba na-nggaüru na etina paraïmi nyimi. Napeka-nggama ba lalu rinjungu-kai nyimi pa-pahàmburu dàngga nyungga; bai peka halaera rukuna na pawunda-mi àmangu dàngu ba wangu eti-mamika pa-kahiri-ka. Jia-mayaka nuna na parihi nggaüru eti wànggu.
8Jiapa-kadu na huratu-nggu ka na-pahawina-ha da etimi, tàka nda kupeka-a halaera ba ku-tulihu-ya nuna na huratu. Tubangu-ma ba jiaya na ita-nggunya ba na-pahawina-kai na huratu nuna – jiapa ka nda pira mandaina nuna na hawina-mi – hala era-kiyaka harangu wànggu-madui duku. 9Tàka nàhu nahàmu-ka na etinggu – nda jia-aya bai hawina wànyaka, tàka jiaya rukuna nuna na hawina-mi ba panjilungu wàngu-nanyaka na hurimi. Tubangu-ma nuna na handuka-mi na-palaku kariangu-ma na pawuku-na i Ala. Jia ba tuna, nda parunggi-amanggai. 10Nadu na hawina tungu nu, ba lingu wàngu bia-nanyai ba da-panjilungu da etimi na mangàndi-nggai pamàna wàngu. Na tau nda napeka-a hala era na ngerana nuna. Tàka hauya duna, na hawina na ma-palaku kariangu dàngu na pawuku taua nalingu ningu la pameti wàngu. 11Tàngaru-ya jàka nggàraya na linguna na hawina-mi na ma-palaku kariangu na pawuku-na i Ala! Na linguna nyimi bai pa-mukarungu langatàka la pa-kahingiru beliya na ma-kanubaru! Nyimi bai paumbi-nya na njala, bai mangàdatu, bai rinjungu, bai ringgitu, bai wàngu etimi pahuku-nya na manjala! La dalu mbuu ndàba-naka na papanii wàngu, pa-itangu-mami-nyaka ba ndai njala-a nyimi.
12Jia ba tuna, jiapa ka mbàda tulihu-nggunya-kadu nuna na huratu, nu hi ku-tulihu-ya nda jiaya na tau na manjala-a. Dàngu ndiambu lumuna na tau na ma-mayila rukuna nuna na njala. Hi ku-tulihu-ya duku nuna na huratu, ka peku pàda wiki-minya nyimi la hanggana i Ala, jàka nggi tuna na mbangatu-na na eti wàmi-nggama nyuma. 13Nuna-duyaka hi da-nggaüru da etima. Hinggilu-na nu na nggaüru etima, ri - rihi-maipa bai pambaha eti-kama ba maita-yaka na mbaha etina i Titu; hi na-nggaüru na etina rukumi nyimi angu dedi. 14Ku-hamemu wa-manggaika nyimi lai nyuna. Malangu-mi ba ndai pamakia-ka. Mbuu ndàbana na pambàda panii-manggai ma-deningu-maha. Hama-mbuna jàka nggàraya na pa-hamemu wàma na ngerami nyimi lai Titu jia-mayai ba na-padeningu. 15Nàhu manaü-manaka ba nambuha-nggai, nadu ba nanamu-ya jàka nggiki-minya nyimi mbuu ndàbami bai mbuhangu patundu-nya na pa-irungu-na dàngu jàka nggikina nyimi bai kataku wànya tembimi dàngu manundu-mi. 16Dira hàmuya nyungga na etinggu, nadu ba pa-monungu-kaika nyimi la mbuu ndàba-naka.
Currently Selected:
2 KORINITU 7: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
