2 KORINITU 6
6
1Nadu nyuma ba ràma dàmanya i Ala, ma-kamahi langatàka-nggai ka àmbi padima-nya na hàmu etina i Ala. 2Daa la Huratu Matua napanii-ma i Ala:
“La rehi pa-pamàjangu ku-patingi-manggauka,
dàngu la lodu pa-mànangu, kundula-makauka,” wàna.
Namu pahàmu-nya, nàhu jiayaka na rehi pa-pamàjangu. Nàhu jiayaka na lodu pa-mànangu!
3Nda mabihu-a duma ka panjala-ya na pa-paloku-ma. Jia-duyaka nu hi ma-pamukarungu ka àmbu haàtu-mbu pa-pawiti-ma la paningu latana pawunda-ya na ngerana nuna. 4Hinggilu-na, la ngga - nggàra bia mbuu ndàbana, ma-pawuwa-maya duma ba atana i Ala-kama. Nadu, la mbuu ndàbana na handuka hangia - hangia patoru-mamanya duma pa-hambeta-ya: 5ba pa-mayila-kama, ba patama-nggama la uma kapàtangu, dàngu ba kambukuru-kama; ràma dira matiki-kama, naingu nda katuda-ma, naingu nda nganguma. 6Mawàngu tànjima, wàngu manggàna-ma, wàngu torungu-ma dàngu wàngu hàmu etima, ba ma-pawuwa-ya ba atana i Ala-kama nyuma. Dàngumbu ba wàngu monungu-ma la pa-ndulangu-na na Ngahuna i Ala, dàngu wàngu mbuhangu ma-kunduhu; 7pa-kariangu na bobaru-manya na lii welingu lai Ala dàngu na kuaha-na i Ala, ba ma-pawuwa-ya ba atana i Ala-kama nyuma. Nyuma pamàndu-manya na pawuku-na i Ala beri madàka-manya la patungu dàngu la pa-kahiri wiki. 8Nyuma patembi-kama, tàka pa-paakangu-mbu-kamai; pa-wotungu-kama tàka pa-pulungu-mbu-kamai. Nyuma ma-patàrihungu, ba tuna da-kambàliku wàda-nggamai. 9Nda patanda-aha wàda-nggama nyuma, tàka natanda hàla-kama duma tau. Dakaka-ya ba meti-manyaka, tàka hi lurima-padua. Jiapa ka pa-mayila-kama, nda mameti-a. 10Jiapa ka pa-hawina-hakadu da etima, tàka nggaüru mànu-madanya duma da etima. Ba wàngu paita-kama mamila, tàka rukuma nyuma nadangu-maka na tau na mawulu. Ba wàngu paita-kama nda nggàra ndoku maningu-nggama, tàka na ma-langatàka mbuu ndàbana mangu hàla-mamanya.
11Angu dedi pa-mbuhangu la Korinitu! Nyuma nu paloha ailulungu-mama-nyaka lai nyimi. Mbuu ndàbada da ihi etima wàlahu hàla-mama-njaka. 12Nda da-kabitangu-a duma da etima hanggangu lai nyimi, nyimia dimi ma-kabitangu etimi hanggangu lai nyuma. 13Nàhu màtawa ka kupeka-nggai hama tuna da ana wikinggu. Wàlahu-mbuyai dimi na etimi hanggangu lai nyuma.
Na panaungu la parima-nya na tau na manda pawai
14Àmbi pa-mbulungu-du dàngu da tau manda pawai lai Yehu; nuna nda na-jàngapu. Nggiki peku-naka na mahàmu ka na-papohungu dàngu na ma-akatu! Nda napeku-a na harii ka na-papohungu dàngu na kapàtangu. 15Nda napeku-a i Karitu ka na-pahamangu dàngu i Kambàliku. Nggàra-yaka na ngia pa-pahama-na na tau Karitu dàngu na tau nda Karitu? 16Nggàra-yaka na papuingu-na na Umana i Miri dàngu na uma marapu? Nyuta yia Umana i Mirita, nu i Ala na maluri. I Ala wiki-maka mapanii:
“Napa Nyungga ku-ndàdiku la padua-da nyuda,
dàngu kuluri angunja nyuda.
Napa Nyungga Ala-danggaka,
tàka nyuda banjaru-nggunja, wàna.
17Jiaduya nu,
dunjaku-nja da tau da manda tandaya i Ala,
dàngu kawàri wikimi welingu lai nyuda.
Àmbi panua daa ndokunya na ma-iraku,
jiaya hi ku-kataku-kai.
18Napa Nyungga Ama-mingga,
tàka nyimi ananggu-nggai,
nuya na paniina i Miri Mahupu Mbiha,” wàna.
Currently Selected:
2 KORINITU 6: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
