1 TEHALUNIKA 3
3
1Hupu hàla luana nda manoru-anyapa na rinjungu-ma. Jia ba tuna, narihi hàmupa ka ma-ndàdiku meha kàdi la Atena, wàmaka la pangàdangu-ma, 2nu ba talànga palewa-manya na angu dedinda i Timutiu. Haàtu tau malumu-nya i Alaya nyuna na ma-pambapa dànggama la pa-bobaru-ya na Lii Mànangu-na i Karitu. Hi ma-palewa-ya i Timutiu lai nyimi jiaya ka na-paundu-nja da pawaimi dàngu ka na-kamahi-nggai la pa-parukangu papawai lai Karitu. 3Ba tuna nu nda haàtu-a lai nyimi ma-kandulingu rukuda da mayila-nda. Ba pi wiki-ma-diminya nuda da mayila ba nimbunja la hukutu-na i Ala ndumanda nyuta. 4Ba ni-nggamapa lai nyimi, mbàda peka haha-manggaika ba jiangu-ma napa ta-mayila. Tàka nuna mbàda njadi langatàka-manaka; ba pi wiki-ma-diminya. 5Tuna nuduka hi ku-palewa-ya i Timutiu, maa ba kanjupu rinjungu-ka la papinya jàka nggi tuna na kadutuhu-mi la ngera pawai lai Karitu. Na-nggidiku na etinggu, jàka na-hàrangu pàku-aka na kama-nanggai paraïna i Kambàliku lundu kahewa-ma-anaka mbuu ndàbana na jàrama.
6Nàhu mbàda beli-naka i Timutiu dàngu mbàda patàka-nanyaka lai nyuma na lii langu mbaha eti rukuna na huri pawaimi lai Karitu dàngu rukuna na maràngga pa-mbuhangu-mi. Napeka-nggamanya ba mahàmu ju - juaya na pa-pangàda wàmi-nggama la etimi. Dàngu ba rinjungu-minya pa-pahàmburu dànggama, hama tuna nyumambu ba ma-rinjungu pa-pahàmburu dànggai nyimi. 7Tuna nuduka dimi angu dedi, na lii langu rukumi nyimi jiaya na pa-nggaüru wàda da etima la mbuu ndàba handuka dàngu mayila-ma. Na pawaimi lai Karitu na-pabokulu-ha da etima, 8tàka hi mapàda-nya nàhu ba luri langatàka-manyaka, mili àru nyuna ka pa-daingu undungu-mi bai pa-mbulungu dàngu i Miri. 9Kanjupu bokulu-ya na pa-malangungu-ma lai Miri ba jiaya mbuu ndàbana na mbaha eti paera-ma la hanggana rukumi nyimi. 10Ma-kamahi weli etinya i Miri la lodu la rudungu, ka peku paita matanda la pa-pamàtu-ya na ma-kalana-nggai tudana na papawai wàngu lai Karitu.
11Màla àruki i Ala wiki na Amanda dàngu na Mirinda i Yehu ka na-pa-taluluku-nggama ànda la pa-pahàmburu dànggai nyimi! 12Màla àruki i Miri ka na-pawiti-nggainya ka hama huka pa-mbuhangu-mi dua wikimi dàngu ka hama huka mbuha-minya mbuu ndàbana na tau, hi napabo - bonjangu na mbuhangu-mi, hama tuna nyuma ba mambuha-nggai nyimi. 13Nu ba timi nu, napa i Miri ka na-pamàndu-nja da etimi, hi lundui matua dàngu nda ningu nyurami la hanggana i Ala na Amanda, nu la rehi maina na Mirinda i Yehu, dàngu mbuu ndàbana na tau pambàda manguna.#mbuu ndàbana na tau pambàda manguna; jàka ndia: mbuu ndàbana na papalewa-na.
Currently Selected:
1 TEHALUNIKA 3: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
