1 PETURU 5
5
Na kabàba mbimbina i Ala
1Kukarai-ha da liku uru kabungguru-mi ka da-katàmbalu. Ku-tulihu-nggainya yiana ba angumi paliku uru-duka dàngu mambàda hakahii wikinya na mayila-na i Karitu, dàngu na pa-pabunjuku kariangu ngeru, jàka jia-yaka na rehi pa-jiliku-nya na bunjuku-na i Karitu la tau pinu tana. Ku-kamahi langatàka-nggai 2kai pawanja da kabàba mbimbi da pawua-nanggai i Ala. Pawa paweli eti-manja nunjuya na pambuha-na i Ala, dàngu àmbu wàngu mbotu etimi. Àmbu jia pàkuya bai kehangu banda pinu tana bai palaku-ya na paràma-mi, na nyuna ba orangu langatàka-minya la pa-lumungu. 3Àmbu hama tuna maningu kuahangu-kai hangganja nyuda da pa-patanggungu-kai, na nyuna màtawa ka ma-paitangu ngerangu-kai lai nyuda. 4Dàngu jàka jia-yaka na rehi maina napa na Mini Pawangu Ma-bunjuku, ngala-dimi-nyaka na tubuku kajilaku na manda wadaru na kajilaku-na.
5Tuna numbu nyimi dimi angu dedi, bidi tau. Màtawa kai karuduku hangganja da ma-kaweda. Màtawa kai pa-wawangu wikimi mbutami dàngu kai maràngga pa-nggumangu dua wikimi wàngu karàda etimi. Nadu daa la Huratu Matua ba tuna yia na pa-tulihu: “I Ala napapa-nya na tau ngànjangu, tàka namila-nya eti na tau karàda eti,” ba wàna. 6Jia ba tuna nu, pa-wawangu-wa wikimi la lima àtalu-na i Ala, ka peku pajangga-nanggai ngeru jàka jia-yaka na rehina. 7Pabuku ndàba-nyawa i Ala na pa-handuka-mika, nadu ba ihili-mananggai.
8Màtawa kai pawàla dàngu kai rimangu padua! Nadu i Kambàliku ba jiaya na papami. Nyuna beri hingaya na malaku winggirungu ba nga - ngaüna ba nahimbu pahoba-na. 9Màtawa kai rawaku wànya pawaimi ma-màndungu, maa ba pi-diminya na mayila tungu nu pa-panggànangu-mbuha da angumi patau i Karitu la pa-nggubulu awangu. 10Tàka bai hàla-kika pa-pàdangu mayila, i Ala wikima duna ngeru na ma-palànyapu-kai. Nyunama duna na ma-pakapànduku-kai dàngu na ma-paàtalu-kai dàngu na ma-pakapingatu-kai. Nadu ba Ala ma-panamungu-maya duna, na mambàda paaunggai la papàda-nya na bunjuku-na Nyuna na ma-palupangu lai Karitu. 11Nyunaya duna na ma-kuaha lundu nu - nu! Amingu.
Na tambi pahiulu wànya na huratu
12Yiana na huratu-nggu na ma-kababa, ku-tulihu-nggai wàngu pa-mbapangu-na i Hila, na haàtu tau Karitu ma-tuturu ba wànggu. Ku-mbuhangu pa-titiru-kai ka na-màndungu la etimi yiana na pa-tulihu-nggu, ba ma-deningu-maya na rukuna na pa-namungu-na i Ala. Màtawa kai kata undu-manya nuna na pa-namungu.
13Tambi wàdanggai da angu kabungguru-nda la Mbambiluni,#Mbambiluni; hama tuna la Pabowangu, talànga wanguna, Mbambiluni ba wàna jiaya na Roma napalaa-na. da papindi-mbuna i Ala; tumbuna i Màruku na ana pambuha-nggu. 14Imaràngga patambi-wa dua wikimi wàngu pambuha weli etingu-mi ba angu dedi Karitu-kai.
Màla àruki i Miri ka nawua-nggainya na peku na hàmu mbuu ndàbami angu dedi pambàda manguna i Karitu.
Tambi welingu lai nyuma, Peturu
Currently Selected:
1 PETURU 5: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
