1 KORINITU 5
5
Na kajari la padua kabungguru
1Làti nyungga mbàda ningu-maka kareuku matàka-ngga, nu la padua-mi nyimi ba ningu ruku kajari na ma-làpahu ailulu: Ningu la hongami nyimi tau ma-njuraku dàngu papaha amana. Da tau da manda tandaya i Mirimbu nda ningu matuya na matuna nu! 2Jiapa ba tuna nu mijangga eti wà bianya. Làti mi-handuka eti wànya bàdi, kai paluhu-ya welingu la hongami na tau na matuya na matuna nu. 3-4Na ngerana la tolu nyungga kumarau-nggai nyimi, tàka la ngera eti dalunggu nimangga duku la padua-mi nyimi. Jiaya ka ku-kingatungu wànggu hama tuna ningga la padua-mami, “Ruku tamuna i Miri Yehu Karitu, wàlahu-nggunggaika, na tau na mambàda tuya na ma-iraku tungu nu, huku-manya bàdi!” wànggu. Jàka mi-pauhi reki biaya ba ningga nyungga la padua-mi nyimi, dàngu wànya na kuaha-na na Mirinda i Yehu, 5lupangu-ma bàdi nyimi kai wuaya na tau nuna lai Kambàliku ka na-tàlaru na tauna, dàngu ba tuna nu ka pa-malundu-nya na hamangu-na la rehi mai belina i Miri.
6Nda ràka-ana nyimi bai abungu. Talànga wanguna nyimi mipi-mbunya yiana na palara lii wàngu, “Na tai wolu na ma-hawutu-na na-papupuhu ndàbaya na kanguta pa-haürungu!” ba wàna. 7Iwàru pàkunya bàdi na tai wolu memangu, nu na tai wolu njala, ka pekuna nyimi ka hama kanguta bidikai, na maili welingu la tai wolu njala mandai, dàngu ku-pimanya nyimi ba timi nu. Nadu na pamangu Pahanda nyuta mbàda papayemangu-mayaka, nadu i Karitu na manjadi mbimbi Pahanda, pambàda maraku wàngu-mayaka. 8Ba tuna, màlawa nu ka taremi-nya na pamangu-nda, ba tawàngu roti panda tungu tai wolu, nu na roti na ma-pamaü-nya na ma-yahangu dàngu mbuu ndàbana na pambuha etina i Ala. Àmbu taremi wadunya na pamangu Paha nuna wàngu roti maningu tai wolu memangu, nu na tai wolu njala dàngu akatu.
9Daa la huratu-nggu na ma-mangilu, mbàda peka haha-manggu-nggaika, ka àmbi panggolu dànja da tau da ma-kajari. 10Da pawuku-nggu nda jia-aha da tau da makajari jàka ndia da manganga eti, da mapalapingu jàka ndia da ma-lumungu marapu da mawàngu panda tanda ndokuya i Ala. Ndia-a! Nda jia-aha nyuda da pawuku-nggu; nadu jàka mi-marau-manjaka bàdi nyuda, maa kai luhu ailulu-madua-ka bàdi welingu la pinu tana yiana. 11Na pawuku-nggu jiaya, nyimi ka àmbi mi-panggolu-dadunja da tau da mapeka wikida ba tau Karitu-ha, tàka da tau nuda da-kajari, jàka ndia da malumbangu, jàka ndia da-lumungu marapu, jàka ndia da-mapulu pa-iraku-ya na tau hawiangu, da ma-maüku, jàka ndia da mamangangambu. Àmbi mandapu-du pangaa dua dànja da tau nuda!
12-13Tubana la patimba-nya ngerana na tau nda Karitu nda ngeranggu nyungga-aya. I Ala duna napa na matanggu timbanja ngerada nyuda. Tàka jàka jiaha da angu kabungguru-mi, ka nda nyimi wiki dimi matimbanja ngerada? La Huratu Matua ninya na pa-tulihu, “Wànggaya na tau akatu welingu la hongami,” ba wàna.
Currently Selected:
1 KORINITU 5: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
