1 KORINITU 4
4
Da pa-pahurungu-na i Karitu
1Ngàda-kama nyuma ba tau ma-paloku lai Karitu-kama, na matanggu hemaya la pa-bobaru-ha da pa-pakaka-na i Ala da pandedi pi tau pinu tana. 2Na ma-papingi na pa-karuhi la tau ma-paloku tungu nu ba na-tuturu bàdi la mirina. 3Na ngeranggu nyungga, nda papanii wàngu-aya jàka nggàraya ka nyimikai – ndia ka nggamu-yakai – na pa-pangàda-mi na wikinggu nyungga. Màlai jàka nggàraya na pa-pangàda-nggu na wai ngera wikinggu nyungga nda papanii wàngu-mbuya. 4Nyungga duku nda ku-pàdangu-a njalanggu la ngga - nggàraikai, tàka nuna nda mbuti-aya ba tuba nda njalanggu nyungga. I Miri wiki bàdi duna na matiki-ya kunjala hi ndia. 5Jia-duya nu, ba ndedi jiaya na rehina, màtangu àmbi jia manyamalu-mi la patiki-nya njala nda njalana na haàtu na tau. Patia bianya napa jàka natàka i Miri. Nyuna duna tiangu na ma-wàlahu hàlaya na pawini - pawiningu-ka na maràpu la kapàtangu. Nyuna duna na malunggaru hàlaya na pawuku na ma-tanjiku daa la eti tangguda patau. La rehi nu hinaka duna na tau haàtu - haàtu-ka hi na-ngalangu wotungu welingu lai Ala na ràka pa-kangeha-na.
6Angu dedi! Jiakai nyimi-maka pakehangu, hi ma-paita-nggai ngerangu, nyungga dàngu i Apolu. Na pawuku màta ka datundunggama wàma, kai ajaru wànya na palara lii wàngu, “Yàpa pamàndu-nja da kalaratu da maninja,” ba wàna. Ba tuna nu nda ningu-apa haàtu welingu lai nyimi matika pawotu-nya na haàtu, tàka hi napaakanya na haàtu. 7Nggamu matukau nyumu la parihi welingu la tau hawiangu? Mbuu ndàbada ka nda pangala-mu welingu lai Ala-aha? Jia, nggikina hi hamemu wàmunyai, hama tuna nda pa-wuangu-ha nu da maninja lai nyumu? 8Tuba-manai nyuna ba nda hili nggàra-apa pa-kalana-mi! Nyimi wuluminyaka! Nyimi maràmba-kaika! Nyuma duma ndia-a. Hàmu-maka nu jàka maràmba langatàka-makaika, ka pekunai duma ka ma-maràmba dànggai. 9Nadu ba ku-kanandi-nya nyungga, nyuma duma tau pa-pahurungu, tuna-nggama tau pa-imingu-maaka paraïna i Ala la hangga angunda patau hamanai la papalewa awangu. Nyuma hama tuna tau ànga-kamaka ba tunggama hukungu meti la hangga madangu dàngu ba na-kayaka-nggama paraï tau pinu tana. 10Lumuna i Karitu, nyuma tau nduba-kamaka, tàka nyimi tau Karitu mamàhi-kai! Nyuma ma-malijangu, nyimi mi-kapingatu! Nyuma pa-paakangu-kama, nyimi dimi pa-wotungu-kai! 11Lundu la rehi nàhu nyuma mahunggu-ya na rimbangu dàngu na madau; da pakima jiaha da maninja la ihi-maama; na pa-mayila-kama tau; nda ningu-maki duma pa-ngiangu ngia pa-engangu-ma; 12nyuma maràma dira matiki ba mahimbu ana pangama. Era ningu maràtu-nggama makarai bianya kanyuru; era pa-mayila-da-nggama ma-patoru bianya; 13era pulu pa-iraku-da-nggama, mahema wà bianja pulu ma-minangu. Nyuma beri kangudu pinu tana-kama; lundu la rehi nàhu nyuma ba nakaka-kama tau, iraku pinu tanakama.
14Nyungga ba ku-tulihu-ya yiana lai nyimi màta ka da-makia nda wànggua, tàka màta ka panaunja hama tuna da ana wikinggu, wànggu. 15Nadu ba nyunggadu manjadi amami, jiapa-kadu ba ngaha patau Karitu-kai talànga wànguna hakambulu ràta-mbuhaka ihu da nggurumi. La dalu lurimi ba tau na ma-pambulu dànya i Karitu-kai, nyungga manjadi amami, ka ba nyunggadu mangàndi-nggai nyimi Lii Mànangu rukuna i Karitu. 16Jiaya nu hi ku-karuhi pambana-nggai kai tundunya na ngeranggu nyungga, hi wànggu. 17Jiaya nuna-maka hi kupalewaya i Timutiu lai nyimi. Ba ma-kikungu lai Karitu-ya, nyuna beri ana wiki-manggu-nyaka na pambuha-nggu. Nyuna ana pamonungu-maya. Napa nyuna ka na-wàlahu-nggainya na ngera huri luringgu nyungga na patundu-nggu kandai hàlanggu papawai lai Karitu, nu na huri luri na pa-ajaru wànggu la hau kabunggu - hau kabungguru, jiapa ka la nggikadu.
18Ba tau mapira-ha da angumi nyimi da ma-abungu, nadu ba dakaka-ya napa nda kumai-apa lai nyimi. 19Tàka jàka na-pahiangga i Miri, napa namangga duku lai nyimi, nda namandai-apa. Napa la rehi nuna ka kuita-mbuya nggàraka paula-da nuda da tau da ma-abungu; nda mbulungu biana na kareuku-da. 20Nadu i Ala jàka na-pareta-ya na lurina na haàtu tau, nuna na-pakaràngi wànya na màkana paluri na tau nuna, nda jiaya na kareuku-ana. 21Ba tuna pindi biaya jàka nggàraya na parihi mbuhami! Màla mi-mbuhangu ba kumai nu ka ku-ajaru wànggai ma-hanggàritu jàka ndia ba kumai ka ku-ajaru wànggai panàrungu dàngu panamungu?
Currently Selected:
1 KORINITU 4: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
