1 KORINITU 1
1
1-3Ngara angu dedi kabungguru-na i Ala la Korinitu! Nyimi na-paaunggai-ka paraïna i Ala hi na banjaru-nggai, nadu nyimi ba manguna i Karitu Yehukai pa-kariangu mbuu hàlada da tau la nggi - nggiyakai da malumu-nya i Yehu Karitu na Mirinda, nu na Mirida dàngu na Mirinda nyutambu. Nyungga Paulu dàngu na angu dedinda i Hohuteni, mamonungu i Ala Amanda dàngu i Miri Yehu Karitu ka nawua àrunggai kanyuru dàngu mànjaku. Nyungga kutulihu-ya na huratu yiana ba pa-pahurungu-na i Karitu Yehu, na pawotu wikina i Ala dàngu paraï ruku pawuku-mbuna.
Da kanyuru welingu lai Ala da mali lai Yehu Karitu
4Nyungga ku-pamalangu mànungu lai Ala ngerami nyimi, nadu nyimi ba mbàda ngala-minyaka na hàmuna i Ala linya i Karitu Yehu. 5Nadu nyimi ba mbàda manguna i Karitu-kaika, ka luri wulu-minyaka dimi la hangia - hangia-ka. Na pingumi la hangia - hangia lalu tanjiku-yaka, dàngu bai pingumbu pa-ajaru wànya nuna na papingu wàngu. 6Nu ba tuna nu wuwa-nanyaka na lii rukuna i Karitu ba tama hàmu-mana-nyaka la etimi, 7hi lupa nda na-yàmihu ndokunggai ana hau kanyuru-mbu, ba talànga nedi-minya na tàkana na Mirinda i Yehu Karitu hi naita-ya paraï tau mbuu ndàbana. 8I Karitu wiki napa na-anggaraa-makai lundu la hupu njàpuna; ka pekuna ba namai beli hi natoma-nggai nyimi dàngu nda nggàra nyurami. 9I Ala pa-monungu ailulu-maya duna. Nyuna jiaya na Ala na mambàda paaunggai la pa-pambulu dànya na Anana, nu i Yehu Karitu, na Mirinda.
Na paihangu la kuru kabungguru
10Angu dedi mbuu ndàbami! Wànya na tamuna na Mirinda i Yehu Karitu, kukarai-kai ka pekuna nyimi mbuu ndàbami ka hau ngaru-akai, ka àmbu ninya na paihangu la padua-mi nyimi. Màta nyimi kai mbulungu, ka hau eti dàngu ka hau kanandingu-akai. 11Nadu da tau welingu la kuru umana i Kalowi ba da-patàka-dunggaka ba ningu papalumungu la padua-mi nyimi wàda. 12Na palanggu jiaya ba ninya la hongami nyimi na mapanii, “Nyungga kutundu-nya i Paulu,” wàna, nimbunyai na mapanii, “Nyungga kutundu-nya i Apolu,” na mawàna, ninya hawiangu, “Nyungga kutundu-nya i Peturu,” wàna; tàka hili ninyai, “Nyungga kutundu-nya i Karitu,” na mawàna. 13Nggiki peku pa-ihangu-naka i Karitu!#Nggiki peku pa-ihangu-naka i Karitu; da pa-haleli ndai da manda pirada: nda peku pa-ihangu-ana i Karitu. I Paulu nda nameti-a la harikangu lumumi nyimi! Nyimi nda pa-parunungu-akai pakiku-nya i Paulu, wàngguka?
14Malangu-manaka ba nda ningu haàtu welingu lai nyimi pa-parunu-nggu, ba mbulungu i Karipu dàngu i Nggayu duda. 15Napa ningudu tau mapanii, ba nyungga ma-parunu-nya la pakiku-ngga nyungga. ( 16Wua, i Hitipanu dàngu kuru umana tubana ba nyungga ma-parunu-nja. Tàka hinggilu-da nyuda, ba kukaka-ya nda hili ningu-apa haàtu pa-parunungu.) 17I Karitu na ma-palewa-ka nda jia-aya ka ku-parunungu tau, tàka mbulungu-ana la pabobaruya na Lii Mànangu welingu lai Ala; nuna kulaku-manya bàdi, dàngu nda wàngunggunya màhinggu papanii-a hama tuna na huri tau, màta na kuaha ruku metina i Karitu la harikangu ka àmbu kahewa-ma-ana.
Na kuaha dàngu na manggàna-na i Ala mehana i Karitu-ha
18Nadu da ngerada da tau da makangehanya la pa-làjaru, na ruku metina i Karitu la ai harikangu beri kareuku juaya. Tàka na ngeranda nyuta duta pa-pamàna-na i Ala na lii nuna pawuku-na i Alaya ba na-pawuwa-ya na mbihana. 19Nadu la Huratu Matua, i Ala napanii,
“Na màhina na tau manggàna napa ku-kubaru-ya,
dàngu na papina na tau pingu napa ku-pamolu-nya,” wàna.
20Na, nggàra lingu-daipa da tau manggàna? Nggàra lingu-daipa da tau pingu? Nggàra lingu-daipa da ngara ma-tanjiku la pakanandingu la pinu tana yiana? I Ala mbàda pawuwa-mana-nyaka na manggàna pinu tana yiana ba ma-kakòlulu jua-maaya!
21Nadu jiapa ka nda nggiki pinguna na tau, nyuna nda natanda-aya i Ala wànya na pingu wikina. Tàka paraï ruku manggàna-manaka i Ala, hi na-orangu pa-pamàna-nja da tau da mapawai lai Nyuna liya na lii na pa-wewaru-ma nyuma, ma-kakòlulu-ya ba wàdanya paraï tau pinu tana. 22Da tau Yahundi karuhi-danya pa-hangàtarungu ka nanjadi mbuti, tàka da tau Yunani paihiku pàku-danya na manggàna pinu tana yiana. 23Tàka nyuta duta jia-maaya la pabobaru-ya i Karitu na mameti la harikangu. Na lii nuna na-kumbalu-ya na papàda eti tau Yahundi, dàngu kareuku àngaya wàna ba nakaka-ya tau nda Yahundi. Dàngu da tau nda Yahundi ba dakaka-ya na lii nuna panduba wànguya. 24Tàka na ngerada da tau da pambàda paauna i Ala – ka tau Yahundi-ya ka nda tau Yahundi-ya – na lii nuna pawuku-na i Alaya ba na-pawuwa-ya na mbihana dàngu na manggàna-na. 25Nadu ba itaya ba hama mandubaya lai Ala, na rihi manggàna-mapa welingu la manggàna tau; dàngu ba itaya ba hama ma-malijangu-ya lai Ala, na rihi kapàru-mapa welingu la kapàru tau.
Na mbihana i Ala dàngu na malijangu-na na tau
26Ngara angu dedi! Kamangu papangàdanya na hadami ba jiaya napaau-nanggai paraïna i Ala. Ba hawutu pàkumi lai nyimi ma-manggàna jàka ndia ma-kuaha, jàka ndia ma-mandapu la majangga tundunya na patandangu tau. 27Nadu ba tuba harawuku-mana i Ala la papindi-ya na manduba ba wàna na pinu tana, ka peku makia-da da tau mapingu ba wàda. Dàngu i Ala napindiya na tau na ma-mangonangu ba wàna na tau pinu tana, ka peku makia-da da mini kapàru kaborangu. 28I Ala napindi-ya na tau ngia wawa, na tau ànga, na manda palingu ba wàna na tau pinu tana yiana, ka peku palàjaru-nanya paraïna i Ala na tau na mangia dita ba wànanya tau pinu tana. 29Ruku tuna nu nda ningu-apa haàtu tau mapahamemu wikina la hanggana i Ala. 30I Ala wikima duna na mawuku-kai hi peku pambulungu-mi dàngu i Karitu Yehu. Linya i Karitu hi natuta ma-manggàna. Dàngu li lai Nyunambu i Ala hi na-papeku belita dàngu Nyuna wiki, hi natuta banjaru mehana, dàngu hi na-pahàla-ta. 31Jiaya, hama tuna na pa-tulihu daa la Huratu Matua, “Na tau na ma-mbuhangu pa-hamemu, màta ka na-hamemu wànya na pa-paloku-na i Miri bàdi,” ba wàna.
Currently Selected:
1 KORINITU 1: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
