Zefanya 2
2
“Honowiak ukpoluk manis o,” oluk, mo’gulentesi wene
1His aphwami hene’gerli erlagat til lagai a’ge yu logwe! 2At ’gain Onuk Logo a’ge olot het henebam pou wagalat, e’gela lolak a’ge o sogwei en woluk erlak lai lasu ai ’gela’ge, his asogoat erlagap honobouwa erlige polik a’ge ano, owan lau wom erlakhwe, at ’gain Onuk Logo a’ge olot het odouk ’gela’ge enebam po a’ge horok louwago erlakhwe Allah inagalat olot het henebam pouwa erlige owan horok lau wom erlakhwe, henaik sogo odoktu manis o. 3His aphwami o yema henede sebelak welat at ’gain Onuk Logo a’ge Allah en disogo tip, asogo tip, oso a’ge hegitsogo togwi a’ge yu re, Allah motluk laga lemis o. At ’gain Onuk Logo a’ge olot het, enebam pou wom erlige his henebam pasumu no oluk, his en opsogo nak til lagalat, henede sebelak welat, til lagalat, togu lomok o.
Is Filistin a’ge welagaimu eba tagonobo wene
4 #
Yes. 14:29-31; Yer. 47:1-7; Yeh. 25:15-17; Yoe. 3:4-8; Amo. 1:6-8; Zak. 9:5-7 O kota Gaza ai, o wogoat agalat, o Askelon di iak yu iak erlagat agalat tua o.
Is aphwami o Asdod welagai a’ge ebano o erlige ’burlat e’gerlik-pa’gerlik a’geat mukho lebik onobogulat, Is aphwami o Ekron welagai a’ge ebano lebik onobogulat, tua o. 5Ik lok ye’gelak laut esa’go’gwe welegep a’ge his Kreti a’ge yu, henebe nede o! Aphwami Filistin a’ge welagaimu his Kanaan a’ge yu Allah en e’gin a’ge henebam paik egeimu re, henebe nede o! “An en ena’guluak erlagapsogo pasulat, mesigat nak ogo mesik ukpaik erlak o,” oluk, Allah enat egeimu re. 6His honowi ik lok laut esa’go ’gwe welagai a’ge ebano kambing domba degelonobogwi a’ge onowi sabo eba ut horlogulat, kambing domba onowi leget wokho pogulat, tua ani o. 7His welegepma eba ap Yehuda pam en weigelak a’ge pema ’bullak a’ge? Ebano eiyerak pagathorloluk me’girik a’ge welat, onuam kambing domba sasuga’ge no’gulemagoluk eba pogulat, ye huba’go pam, is Askelon a’ge onowi werikmu eba nogogulat, togukhwe, at ’gain Onuk Logo a’ge Allah en enebe opsogoat degelenebiselat, o naduk welegesa ’gela’geat tagenebasulat, tua ani o.
O Moab emin, Amon emin, tagonobo wene
8 #
Yes. 15:1–16:14; 25:10-12; Yer. 48:1–49:6; Yeh. 21:28-32; 25:1-11; Amo. 1:13-15 At Allah en eselat e, “Is aphwami Moab a’ge en An neiyagai mi-miarak onobogulat, is Amon a’ge en an neiyagai bi’belap tagonobogulat? Eida tagonobogulat, togwi a’ge ebano an pageat nesa’go hwelegis o. Is en An neiyagai mi-miarak onobogulat, nis logoatma re, oluk, hono’gwiang sebel horlogwi holuk his no’gosogo togup o? oluk mo’gulontogulat, togumu re, 9#Kej. 19:24An nanni modok welegi a’ge ’gain Nonuk Logo Israel enaik Allah en o Moab ano o Sodom ’gela’ge takpasulat, ye, is aphwami Amon a’ge ai re, aphwami o Gomora a’ge tagenebegi ai ’gela’ge tagenebasulat, tik ani o, oluk, an modok nelaluk welago a’ge nonuk ho’buk ’balogo egi ai o. O Moab ai re, orlok nak dain-pain eselat, mayu heratil lagalat, ’gwiang palil legesa ai ’gela’ge takpasulat, tik o, asogo takma re, e’gela herle e’gela ligom erlakma en lei hwerak paikmu re, is An neiyagai pema yarluktak oruak a’ge ebano en ena’ge ene’gik abusak hogul horlogulat, is An neiyagai pema welagai a’ge ebano en ono’gwiang enemining a’ge ’gela’ge eiyerak pagathorlogulat, tua ani o,” oluk, egei ai o.
10Is aphwami Moab a’ge emin, Amon a’ge emin, enede en e, “Nis modok elirat oluk,” onogola en opogulat, at anni modok welago a’ge ’gain Onuk Logo a’ge eiyagai ebano mi-miarak onobogulat, eidarak onobogulat, tugu legesa o’go is asogoat tagonobouwa ani o. 11At ’gain Onuk Logo a’ge en is aphwami o ’gwiang pam yema enasua erlagapsogo pasu holuk e, onogorlok en, “Allah ai re, nogorlok e,” oluk, di aphwami yu aphwami ’gwiang pam welagai a’ge ’berlegat enematek lo’bok welagaimu eba welat, Allah eragam hurotluk at erlik tugu lema o.
O Kus takpo wene
12 #
Yes. 18:1-7
“His aphwami Kus a’ge yu logwe! His ogo re, An nua’gun pam wathenebik ani o,” oluk, at Allah enat mo’gulentasukhwe hegi o.
O Asyur takpouwa wene
13 #
Yes. 10:5-34; 14:24-27; Nah. 1:1–3:19 O o’borl akhit hegit eba welagai a’ge tagonobo ano re, at e’gik lagabak hweat de, o Asyur erlagapsogo pogulat, o Niniwe di iak yu iak erlagat welemagoluk, takpogulat, aphwami erlakma o leimu ’gwiang ’buk welago ai ’gela’ge takpogulat, tua ani o. 14O eba kambing domba emin, lembu sapi emin, teiye hogobi emin, ’bou la’gogulat, togukhwe, tue ’gu’ga emin, tue sup’babi emin, tue soluak emin o uak lagabak a’ge ologun o’gwe arat hutlai lotluk nogogulat tua ani o. Is tue ai re, o jendela pam en eniak ngerle togukhwe, ’goduk ’gwi lagai o’gwe o moluk-melaktak o’gwe legenak welat, tak welema ani o. A’geat de e laik anni a’ge pam werikmu re mimoluk yarluk ogu lema o. 15O kota enebe op welat, enede we yamuksogo onogola enagai pam welat, togulom a’ge paget tagonobo ai at o. At en ede epasulat, “An nebe yu re, eliratma re, an ’gela’ge mesik erlagat,” epesi a’geat de, O leimu aphwami erlakma ’gwiang ’buk ago ai ’gela’ge tak welat, teiye hogobi e e’gelama a’ge eba at eiyerak pagathorloluk welat, togwi ai re, modok lok logoat o! Is aphwami ’gebela ’gwe ai lagalat, “Hweinat! E’gin hebam aga o,” oluk e’gerli werak pil laga lema ani o.
Currently Selected:
Zefanya 2: Wul
Highlight
Copy
Compare
Share
Want to have your highlights saved across all your devices? Sign up or sign in
