Zefanya 3
3
O kota Yerusalem takpo wene
1Aphwami sebelogo onobogulat, Allah en tuagoluk mo’gulentasu a’ge ano tu enebit opogulat, o kota orogole wiagapsogo pogulat, tugumu o kota Yerusalem ai, ebe nede o. 2At Allah en esa’go weriso a’ge ano opsogo hweliselat, wene mo’guloso a’ge ano io, oluk, wasulat, at Allah ebam ede he’berik pasulat, at aik ’gain Onuk Logo a’ge eragam wotluk mo’guleselat, tu erlakma enat welago yo.
3At emin togwi a’ge ap ’gain ano re, singa at nasu a’ge naik oluk iak loksogoat oso a’ge ’gela’ge, welat, at emalik onuak lol enebiso a’ge ai re, mene hwelaik. En wam teiye werak poluk tono no a’ge eberu erlakma en o agauwa mesigat dakha oso ano pam ebesik ’bil hogwi ai ’gela’ge welat. 4At e’gerlakma at Allah en mo’gulentasukhwe mo’gulontogwi a’ge ano re, opsogo mo’gulonto erlakma en we yogunat mo’gulontogumu re, “Yu re demat mo’gulnontogwi,” oluk opo erlakma en welat. At erlakma is ap Allah eiye a’ge Imam ebano en Allah ebaget pulogo pogwi a’ge ano wiagapsogo pogulat, ’gain Onuk Logo a’ge iak Musa en pelal wesi a’ge ano sagalogo poluk, is en eberogwi a’ge ebano nak motluk lagalat, togwi o. 5At ’gain Onuk Logo a’ge is ene’gerlakma welat, wiak mesik tagonobo erlakma en op a’ge nagat tagenebasu laga, at mo u erlakma en loruk hupmu o hubet en onowene a’bosu ’balogo poluk e, pobirak poluk hegitsogo nagat tagenebasulat, ta’go a’geat de, is ap wiak togwi a’ge enede tak a’ge ano ene’gerli ho erlakma en wiak nagat til lagai o.
6At Allah en eselat e, “An en di aphwami yu aphwami ena’guluak erlagapsogo enebasulat, o ’gwelakharok wolomma pak werik a’ge o’gut o’gwe o’gut o’gwe o yat a’ge werik a’ge ano wiagap pasulat, is ’gebela lagai okhwe ogo wiagap pegimu re, aphwami en ’gebela ’gwe ai lo erlakma en welat, onowi kota-kota o wogowiat takpogulat, aphwami mesik ogo re ukpo erlakma en ’berlegat erlagapsogo enebasulat, tegis o. 7Asogo tagenebegirik, an en epasulat, yogodak is en An erliknobogulat, An en mo’gulentasu a’ge ano pobirak poluk nak tugulat. Is en tu a’ge mo’gulentasu a’ge ano memerak poluk ukpo erlakma en hegitsogo nak tugulat, togu lemagoluk epegi a’geat de, is wiak til lagai a’ge ano ukpo a’ge enede eberu erlakma en eige, oluk enede aganhan ’batung sogo til lagaihwe entegis o,” oluk, egeimu re, egi ai o.
8At ’gain Onuk Logo a’ge en eselat e, “Asogo togumu re, An en di aphwami yu aphwami ’berlegat odoksogo onobou wagalat, is aphwami eneragam onoboluk welagaimu en odoksogo onobou wagalat, takpoluk, nanni nolot het enebam pasulat, an nolot het odouk ’gela’ge takpasulat, tik oluk pulogo pegi a’ge ano tagalat, An nak muknoboluk wemak logwe, is mu a’ge motluk lagai yu re, nebit e, oluk, aphwami o ’gwiang pam welagai a’ge ’berlegat nolot het odouk lobuk oso ai ’gela’ge enebe erlagapsogo en ou wak oluk, tagenebaikmu re, An in eiktik, his asogo tugukhwe hegi o, oluk, mo’gulonto a’ge o arat horok laumagoluk, yetniarok welemak o.
9Asogo takpoluk, is di aphwami yu aphwami ’berlegat An Allah nak nonuk ’belakpoluk mo’gulnogulat, is enede mesigarap poluk, An nak erliknobogulat, togu lemagoluk, wene lebikpogu legesa ano pam enemde wiak ogu legesa a’ge ebano obap enebaik o. 10Is An erliknobogwi a’ge neiyagai yarluk egesarik ik Kus esa’go etleba akhit welagai a’ge ebano en di a’ge yu a’ge woluk An nebaget pou waga lema ani o. 11O eria hegit e, is an niak sagalogo ukpoluk wiagapsogo nobogu legesa a’ge, ebano, ene’gerli werak enebaik erlak o. Is enarilak nis elit o, oluk enede en logo pagathorlogu legesa a’ge ebano o yema en ugenebaikmu re, is pema nak e, nebabut omu degelakma yema welat, enede en logo pagathorlogu lema erlagat ani o. 12At kota e’gerlakma eba is ap enede sebelak welat, opsogo nak tugulat, is enede An ’gain Onuk Logo a’ge nebam he’berik poluk muknoboluk wagalat, tugu lema a’ge ano nak e, o kota yema welemagoluk, ugenebaik o. 13#Wah. 14:5Is aphwami Israel a’ge pema yarluktak oruak a’ge ebano en wiak tugulat, eniak esei mo’gulentil lagalat, wene ’balogulat, eniak esei ogulat, tugu lema erlagat o. Domba e’gela noluk ede sebelogo nogoso ai ’gela’ge is asogoat tagenebaikmu re, aphwami pema en ’gwelak ontogu lema erlagat ani o,” oluk, egeimu re, mo’gulhentigis ai o.
Onogola enagaisogo welat weni worogulom wene
14-15At ’gain Onuk Logo a’ge en e’gin henebam a’ge ano erlagapsogo pasulat, henemin weim ’belak a’ge ebano wagai holuk e mukho peragenebasulat, taga lemarik, his Israel a’ge Honue Onuk Logo a’ge Allah hene’gerlakma welat, ’gwelakhentarok oruakma re, “Wiak mesik nenebam lau wago en eige,” oluk, honogorlok hagup erlak at ani o. Asogoatma re, o Sion emalik his yu logwe! Weni worogulat, Israel a’ge his yu logwe. Weni ik wolung worogulat, kota Yerusalem emalik his yu logwe! Honogola henagai en ngai wai ogulat, tugu lemis o.
16Agauwa ai arat horok lau wago holuk e, is aphwami en at Yerusalem mo’gulogulat, “Hat Sion yu o. Huak en hene’gen lebe oso ai re, mia o.
17Ap weim togwi enaluk a’ge en onosilak enagap delogwi ’gela’ge, haik ’gain Onuk Logo a’ge Allah he’gerlakma welat, hagap deliselat, ede hwediktak hebasulat, edeap hebasu ano pam hede modok oruagap hebasulat, tisoam eseni lokma sorogwi ai ’gela’ge hat en asogoat togun ai pam Haik Allah ogola agai en weni worua o.”
18Ai en e, Allah en eselat, o kota Yerusalem enagai en weni worua o, “At Allah en eselat e, aphwami en mi-miarak onobogwi holuk e, ene’gerli pam lagalat, togwi a’ge ano An en erlagapsogo paik o, oluk egei ai o.
19O ai erlige is aphwami en o Sion ogulani sebelogo pogwi a’ge ano an en inotluk is, erlagapsogo enebasulat, onoyuk soborak welagai a’ge ebano enagap delogo enebasulat, is ’bullak enebegesema aphwami ene’gerlak o’gwe oruak a’ge ebano odokso’go mesikmu onobou wagalat, asogo togolik tik di owi yu owi Sion ogulani ononuk wiagapsogo onobogumu ebano en ononuk logo pogulat, o ’gwiangma yema di owi yu owi welagai a’ge, onogorlok hogulat, tugu lemagoluk, tak paik ani o.
20O agauwa ai erlige an en odoksogo enebasulat, o ai erligeat onowi pam onobou wagalat, tik o. Ye, enil pam naduk enede aganhan pam welegesa ’gela’ge takpasu holuk, is di aphwami yu aphwami o ’gwiang pam welagai a’ge yema ’berlegat ononuk logo pogulat, onogorlok hogulat, tugu lema o,” oluk, ’gain Onuk Logo a’ge en egeimu re, mo’gulhentigis ai o, oluk, mo’gulentesi.
Currently Selected:
Zefanya 3: Wul
Highlight
Copy
Compare
Share
Want to have your highlights saved across all your devices? Sign up or sign in
