Zefanya 1
1
1 #
2Raj. 22:1–23:30; 2Taw. 34:1–35:27 Hizkia en Amazia deriselat, Amazia en Gedalya deriselat, Gedalya en Kusyi deriselat, Kusyi en Zefanya deriselat, tegisema re, at ap Amon omlogo Yosia ano aphwami Yehuda onue ’gain otluk, wene le’gelogo mo’gulentasukhwe ’gain Onuk Logo a’ge Allah en Kusyi omlogo Zefanya wene mo’gulesi ano re yuat o.
Allah wom erlige e’gin enebam po wene
2“Di a’ge yu a’ge o ’gwiang pam oruak a’ge ’berlegat an en ena’guluak erlagapsogo enebaik o,” oluk, ’gain Onuk Logo a’ge Allah enat egei o. 3“Aphwami emin, di a’ge yu a’ge enelaluk ’gwiang pam no’gwi a’ge a’gul onuk lo’bok emin, ena’guluak erlagapsogo enebasulat, di tue yu tue ’burl o’gwe darak no’gwi a’ge emin, di hiane yu hiane ik laut lok a’ge ye’gelak o’gwe no’gwi a’ge emin, erlagapsogo enebasulat. Is ap an niak enebit opogwi a’ge emin, aphwami o ’gwiang pam welagai a’ge ’berlegat emin, modogat erlagapsogo pasulat, tik ani o,” oluk, ’gain Onuk Logo a’ge Allah enat egei o.
Is Yehuda a’ge e’gin enebam pouwa wene
4-6“Is aphwami o Yehuda welagai a’ge emin, is Yerusalem welagai a’ge enebe ’berlegat emin, an ne’gik anni pam wi ’agap enebaik o. Is asua nak erliktogulat ’gwi lagai a’ge ebano en onowi dum delak a’ge pam ligotluk hwesagal emin, dugwi emin, mo emin, erliktugulat. At Allah Onuk Logo a’ge motluk laga louwok o oluk an Allah nonuk ’belakpoluk erliknobogulat at de, enasua Milkom onuk ’belakpoluk erliktugulat, asogo tugularat de, An Allah ogo re, nonuk ho’buk ’belakpoluk erliknobogulat, An Allah muknoboluk laga legesa a’geat de, uknoboluk ’gwi ’gwani lagalat, Allah ebe ’ge o? Oluk, heranobu erlakma en uknobogulat, Allah en ’gesogo oso? Oluk, hin woknio erlakma en welat, is enasua erlik tugwi a’ge ebale pema ebano oruak a’ge ogore wiagap paik o. Asua ’bal eiye a’ge enebe ’berlegat ena’guluak erlagapsogo enebasuam e, ononuk ogo re erlagat ema ani o.
7Nenaik ’gain Onuk Logo a’ge ologotma henede sebelogo poluk welemis o. Nenaik ’gain Onuk Logo a’ge en wene enebam po a’ge ano re, arat horok aga o. Demat Nenaik ’gain Onuk Logo a’ge en seni lok a’ge soru a’ge einnyo ano arat leik-louktak pesimu oruak o. At en e, is aphwami yo’go enebegi a’ge ebano re, at ebam enede hweriogo poluk welemagoluk yo’go enebegi o. 8’Gain Nonuk logo a’ge an neiyagai enebe erlagapsogo onobo a’ge paget yo’go enebegi ai, erlige is ap onuelak ononuk oruak a’ge emin, is ap ’gain a’ge eneiyagai emin, is aphwami pema en togwi a’ge motluk lagai a’ge ebano emin, an en is wiak togwi a’ge o’go enebam pasulat, 9O ai erlige is ap an nebe eneperlak en is enasua togwi ’gela’geat is asogo til lagalat aphwami warenebil lagalat, mi-miarak onobogulat, asogo tugulat, ena’ge-a’ge hogul woluk onue ’gain owi o lok op a’ge werikmu ’beterak po’gogwi a’ge ebano, e’gin enebam paik o,” oluk, egei ai o.
10At ’gain Onuk Logo a’ge en eselat e, “O ai erlige ’goduk ’gwi lagai onuk e, Hiane Belakma en lo’gu marogulat, is aphwami o yeling waling tak a’ge onuk e o seli ’get balogo welagaimu a’ge ebano en lo’gu marogulat, is dom-dom sebelogo oruak a’ge modok elalin a’ge ’bulogo ’belabil wagalat iak oso a’ge ano enesa’go hologulat, tua ani o.
11Asogoatma re, is aphwami o do’go yamuktakma werik poluk welagai a’ge ai, ap di a’ge yu a’ge o’go ’wogwi a’ge emin, welagai a’ge enebe ’berlegat ena’guluak erlak agalat, is besi perak walhegeik o’go ’balogwi a’ge ebano enebe erlak agalat, tuama re, lo’gu marogu lemak o.
12O eria hegit e, An en esaga heberlak a’ge woluk o Yerusalem pobi enebil lasulat, An en is aphwami wiak togwi a’ge ai wene egi enebam paik o, is ai enebe re anggur a’bosu sogoluak ogorlukmu il ’got-’got otluk welago ai ’gela’ge welat is en e, Nenaik ’gain Onuk Logo a’ge en disogo asogo tago erlak o, oluk ogulat welagai ai o. 13Ena’ge di a’ge yu a’ge oruak a’ge ebano ’berlegat perlengsogo wogulat, onowi werik a’ge ebano moluk-melaksogo pogulat, tua ni o. Onowi wolomma uthorlouwa a’geat de ebano wolom erlakma en ukpogukhwe polugat agalat, anggur owi eniabukmu yorogwi a’geat de, e’gen a’bosu wokho ’berelogo no erlakma en ukpogulat, tua o,” egeimu re, mo’gulhentegis o.
14At Allah en elalin tu puk a’ge til wema a’ge agauwa ano arat horok lau wagama re, mo u erlakma en perleneat til wema o. Asogoatma re, wene yu opsogoat hologu lemis o. At Allah en til wema a’ge o agauwa ai aphwami enede wathorlo a’ge agauwa atma re, is ap weim obogwi enaluk a’ge ebano ogo re, lo’gu at marogu lema ani o. 15O agauwa ai horok lauma ano re, at Allah olot het enebam po a’ge agauwa atma no oluk, e, o agauwa ai pam is aphwami enede wathorlogulat, no’gosogo tul o? oluk, enede e’gin daksogo no’gulat o ai erlige aphwami wiak modogat tagonobogulat, di a’ge yu a’ge modok erlagapsogo pogulat, o ai erlige o hup agalat, o hup bin modok takpasulat, o ai erlige o dugwi mum, takpasulat, 16O ai erlige iak loksogo inghogwi a’ge trompet ano iak pu hogulat, o kota-kota helep pak werik hweat de, weim ebil ’gwi louwogoluk ngai wai ogulat, o enil ’gayo welagaimu yat a’ge pak werik o’gut-o’gut werik oruakhwe ’beselil ’gwi louwogoluk, eniak amitmit walhogulat, tugukhwe yerontulat ani o.
17At Allah en eselat, “Is aphwami en An ’gain Nonuk Logo a’ge Allah wiagap nebegesema re, An en is aphwami ai e’gin-pe’ginsogo modok tagenebasu holuk, aphwami enil wiak en dadolung tak lagai ai ’gela’geat, laga lema o. Sip-sip hosogo ukpogwi ai ’gela’ge, aphwami enemep asogoat takpogulat, enal werik a’ge nenemelmel o, oluk, hwikhogwi ai ’gela’ge onolot asogoat ’bulogo lebikpogulat, tua o.
18’Gain Nonuk logo a’ge An wom a’ge o agauwa ano re, aphwami a’bigat eneperlak nak oruakhwe weik ani o, asogo weiktik, is o ’gwiang pam welagai a’ge ebano ’berlegat erlagapsogo enebayok oluk tagokhwe, is An muknoboluk de wom a’ge re, mu a’ge motluk lagai ai nebit o, oluk nolot het odouk magale ’gela’ge enebam pasuam e, enebe erlagat ema ai en e, ena’ge perak pam, emas pam enagap delhorlouwa modok erlagat ani o, oluk,” egeimu re, mo’gulhentegis ai o.
Currently Selected:
Zefanya 1: Wul
Highlight
Copy
Compare
Share
Want to have your highlights saved across all your devices? Sign up or sign in
