Habakuk 3
3
At Habakuk en Allah yo’go pesi wene
1At Habakuk Allah iak mo’gulentasu laga a’ge ano en Allah yo’go disogo pesi,
2’Gain Honuk Logo a’ge, naik. Hat hobok hologo welat e, hat taga legen ai nogorlok o. Pageat tise legen ai ’gela’ge, yogodak mesik tagalat, logon telakma pasulat, tip o. Holot het eselarat de, hedeap nenebip o. 3Nenaik Allah, o Teman eba en wagalat, hebabut degelak welago a’ge ano dom Paran a’gul pam en ’bu agalat, tigen ai o. ’Bogorl pam erlikhobogwi modok welat, ’gwiangma o di owi yu owi ’berlegat hau wathobogulat, togwi o. 4Hat wagoam hebe amolit wiak yogo pasulat, hat hanni he’gikmu hisogo oruak ai en, obinal yegeliso ai ’gela’ge, yegeliselat, til wegen o. 5Hat wagoam e, ou wiak a’ge naduk-naduk wagalat, ou en waragai a’ge he’berlik wagalat, tegei ai o. 6Hebe inlau wagoam, ’gwiang o’borlogouk eselat, hil nayo-hayo hasuam, aphwami ena’gul onuk lo’bok onuak erlik-erlik eselat, tegei ai o. Dom pageat en otok modok welago a’ge ano orlo’buk-erle’baksogo ’bok lasulat, duk ’gela’ge elak ’gela’ge pageat en welago a’ge hat page enat, hoyuk pil nese legen o’gwe damuk-demaksogo takpasulat, tegei ai o.
7Is aphwami o Kusyan onowi sum a’ge wusogo welegesa a’ge onogorlok en ono’borlogouk togulat, aphwami o Midian a’ge onowi sum a’ge hwerli ogorlitak onogorlok modok en onuak lup-lup ogulat, togumu nil yerentegis ai o. 8Honuk Logo a’ge, naik. Ik elaruk egeik paget holot het aga no a? Ye, ik laut ye’gelak ai paget holot het egei no a. Erlak o. Wam kuda pam ligotluk weim wagai ai ’gela’ge, o hena pam wagalat, wam kuda en ’gwiangso ’gela’ge mesik lisogo wogonoboluk weim wagai ai ’gela’ge, ’bogorl heiyadu petne wagalat, tigentik, heiyagai enanniap enebil wegen ai o. 9Hesegen e’gale wusogo pasulat, hogodok peberiselat, tigen ai o. Obinal hat a’ge o’gwiang yema ogo ik ’gagalil wegen ai o. 10Hebe wagoam, dom en il yethioluk o’borlogouk eselat, ’bogorl pam en ik ’gwiangma ’gollosogo ’bu agalat, ik laut yat a’ge ye’gelak iak naduk logat eselat, hererimsogo lagabiselat, tegei ai o. 11Hogodok ’besingtak hasuam, amolit yethasulat, hesegen pang tagoam amolit edenhasulat, tagoam mo emin, dugwi emin, mo egesa ai.
12Weim wagai ai ’gela’ge, holot het otluk ’gwiangma hoyuk ya pil da pil wagalat, holot het otluk aphwami ena’gul onuk lo’bok hoyuk en salenebiselat, tigen ai o. 13Heiyagai delenebiselat, ap onuk logo hat en edikpegen a’ge ano deliselat, tigoluk wegen ai. Wagalat, is wiak togwi a’ge ai, onue ’gain erle’galogo ’bo pasulat, osi perlengsogo erlagap pasulat, tigen ai o. 14Aphwami enebabut wiak a’ge en,
“Is ai uo,” oluk ena’ge hisakho horlogulat erlikhorlogwi ai ’gela’ge, is ai sogwei punhau wago ai ’gela’ge, nenebe ’bogulogo erlagap nonobuogoluk esan logolak wagaimu, onue ’gain u’gwarek ogodok pam delogo wasu wegen ai. 15Huam kuda o’borl pam ligotluk ik laut ye’gelak ogum petne wagoam, ik hererim tagalat ik eragop a’bik lagabegei ai o.
16Asogo tegei oluk wene nesa’go holholuk e, nede o’borlogouk eselat, tagalat e, nemde lup-lup eselat, nuak ’goluk-’gelak eselat, nuak anni erlak agalat, tago a’geat de, is ap watnonobuogoluk wagai a’ge ai, Allah en wiagap enebil wemayat o, oluk e, nepe mosogo yetharok weleik ai o. 17E ara nis en a’ge e’gen egesu erlak mo eselat, anggur edip e’gen egesu erlakma en mo eselat, e zaitun e’gen egesu erlakma en mo eselat, yabukmu eba so’boru ebe po erlakma en mo eselat, wam domba ’berlegat waretil loluk, owi lo’gwe poluk agalat, sapi owi lo’gwe poluk agalat, tagokhweat de, 18naik Allah nagap deliso a’ge oruak o, oluk, nogola nagai epasulat, weni werise leik ai o. 19#2Sam. 22:34; Mzm. 18:33Naik Allah enat nanniap nebasu legen. Wam rusa oyuk ebisogo poluk lasu ai ’gela’ge, an noyuk asogo taknebasulat, dom petne lasuam he’gik ebisogo tenniarok welat, taga legen ai o.
Currently Selected:
Habakuk 3: Wul
Highlight
Copy
Compare
Share
Want to have your highlights saved across all your devices? Sign up or sign in
