Zakharia 8
8
O Yerusalem naduk welaga ’gela’ge takpouwa wene
1At anni modok welago a’ge Allah en wene mesik eminat, mo’gulnesi. 2At anni modok welago a’ge at Allah en an mo’gulneselat, “An en o Sion nede modok hwedik epasu legimu re, mu a’ge til lasu holuk, io, oluk nede epasulat, ye, nede aganhansogo obap onobo a’ge epasumu re, is logon en at wiagap pogwi holuk, odouk aganhan ’gela’ge nolot het modok epasulat, tago yo,” oluk, mo’gulneselat,
3At Allah en an mo’gulneselat, “An togolik o Sion weik tik, o kota Yerusalem ho ’gorlakma ebayat weleik o. Eba oruakhwe o Yerusalem onuk ai, kota opsogo togumu o, ogulat, ye, nanni modok welago a’ge an Allah nebabut ano onuk, dom Allah odom omu polik a’ge o, ogulat, togu lema o,” oluk mo’gulneselat,
4At anni modok welago a’ge at Allah en an mo’gulneselat, “Naduk ap enarlue a’ge emin, hwami enarlue emin, enebe Sebal mip egesarikmu re, enemetik-enematek ono’bouwa’gun pamsogo o Yerusalem ebela pam hutlai legesa ’gela’ge, is pobuk asogoat til lagalat, 5o kota ebela ’gwe ebela ’gwe hwelani logomalik ’bete ogulat, ing a’ge til no’gulema ani o,” oluk, mo’gulneselat,
6At anni modok welago a’ge at Allah en an mo’gulneselat, “Asogo takpo ai re, is aphwami pema ’bullak a’ge ebano en nogorlok ebelesogo tu a’ge ai re, demat togumu hul a? Erlak a, oluk opogwi a’geat de, is en tu a’ge nogorlok i opogwi ai re, an en tu a’ge nogorlok epasu legi erlak o,” oluk, at anni modok welago a’ge at Allah enat mo’gulnoso yo,
7At anni modok welago a’ge at Allah en an mo’gulneselat, “An neiyagai o mo orlu ago hegit akhit o’gwe welagai a’ge emin o mo obuk ilasu akhit o’gwe welagai a’ge emin, an en enagap delonoboluk 8o Yerusalem welemagoluk, pobuk togolik onobou weik o. Onobou weiktik, is an neiyagai agalat, ye, an is enaik agalat, togu lomultik, taknobo a’ge mo’gulentegis a’ge ano opsogo tagenebasulat, opsogo ebelogo nak tagenebasulat, taga leik o,” oluk mo’gulneselat,
9At anni modok welago a’ge at Allah en An mo’gulneselat, “Nanni modok welago a’ge An Allah nowi woru a’ge wa’gi dalil lagaihwe, is an en mo’gulentasukhwe mo’gulontogwi a’ge en mo’gulontogukhwe enesa’go hwelegisa a’ge ebano, yogodak ebe ologun ’goboksogo woru a’ge ene’gik anni tak pagathorlogu lemak o. 10Asogo woru a’ge owan tak erlak oruakhwe, aphwami yabuk togwi a’ge o’go emin, onuam yabuk takpogwi a’ge o’go emin, wogonto miayat o. Ye, enemin wat-wat ’bogu lemagoluk, tagenebegimu re, is onowi pam libom ’guom togwi a’ge ebano en enemin il ’belak a’ge en taknonobou wagaimu no, oluk, enede e’gin welegesa a’geat de, 11Yogodak is pema ’burl ’bullak a’ge yu nak e, an en naduk is aphwami tagenebasu legi gela’ge, is asogo tagenebasu leik erlak o,” oluk, at anni modok welago a’ge at Allah enat mo’gulnoso yo.
12“E’gen owi yorua a’ge ebano ’baksogo obat ligagalat, e anggur ano e’gen obat ikhasulat, ono’gwiang a’bosu tagenebasuam e’gen opsogo ’balhorlogulat, ’bogorl pam en moru ’belakpou wagalat, tuak oluktak paik o. Di a’ge yu a’ge ’berlegat ai, an neiyagai pema ’burl ’bullak a’ge yu en, eiyesogoat tenak welemagoluk tagenebaik o. 13Is Yehuda a’ge emin, Israel a’ge emin, di aphwami yu aphwami ’burl ene’gerlak o’gwe oruakhwe hweim onobogu legesa a’geat de, yogodak nak e, enagap delogo enebaikmu denagaihwe, aphwami enede aganhan enebam pogu lemama re, onogorlok ho erlakma en ene’gik anni pam til laga lemak o,” oluk,
14At anni modok welago a’ge Allah en mo’gulneselat, “O naduk is ene’balak en an niak sagalogwiam, nolot het agalat, nedeap onobo erlakma en wiagabonobo a’ge, eberak poluk tagenebegi ai ’gela’ge, 15Yogodak o kota Yerusalem emin, o Yehuda emin, mesik eminsogo obap onobo epegirikmu re, onogorlok hogumu no yo, oluk, nanni modok welago a’ge an Allah enat egi o. 16#Efe. 4:25Asogoatma re, is en togulom ano re yuat o. Is-is wene eniak esei a’ge u erlakma en demat a’ge nak ogulat, wene enebam pogumu ebano en wene enebam a’ge erlagapsogo pogulat, togwi a’ge hegitsogo nak tagonobogulat, wene ai modok opsogoat egesa o, oluk, uak oluk, tagonobogulat, togu lemak o. 17At mesik en are mesik wiagapsogo po a’ge eberogulat, eniak esei a’geat de, demat o, oluk, ho’buk ’balu a’ge enagai opogulat, togwi a’ge ai, ’berlegat an nebit modok epasumu re, asogo togumu no yo,” oluk, at Allah enat mo’gulneselat tegei o.
18At anni modok welago a’ge at Allah en wene mesik eminsogo an mo’gulnesi. 19At anni modok welago a’ge at Allah en an mo’gulneselat, “Dugwi henagan pelelak poluk, mesik pelelak a’ge pam, dugwi ugwan pelelak poluk mesik pelelak a’ge pam, dugwi 4 pelelak poluk, dugwi 6 pelelak poluk mesik pelelak a’ge pam, dugwi 9 pelelak poluk, mesik pelelak a’ge pam, so’boru no erlakma en enemde ugwelak ’gela’ge welat, is Yehuda a’ge en togwi ano re, enagai hogulat, enagai en weni orlo’buk lagalat, enagai en seni lok sorogulat, asogo togulomma re, eniak esei u erlakma en demat nak u a’ge enede hwediktak pagathorlogulat, enede mesigat la’bolik wolom a’ge enagai opogulat, togu lemak o,” oluk mo’gulnesi.
20At anni modok welago a’ge at Allah en an mo’gulneselat, “Di aphwami yu aphwami emin, o kota-kota a’bigatma re, aphwami welagai a’ge emin, o yema odoktu agalat, 21o kota mesikmu welagai a’ge en kota momu mesik oruakma loluk mo’gulontogulat, nis at Allah ede aganhan nenebam pasulat, at anni modok welago a’ge at Allah en oso a’ge hologulat, tuogoluk lagaimu, enemin louwok o, oluk mo’gulontogwiam wagalat, tuama re, 22aphwami ena’gul onuk lo’bok emin, di aphwami yu aphwami ena’gul onuk lo’bok enanni a’bik a’ge emin, at anni modok welago a’ge Allah en oso a’ge hologulat, ye, at Allah ede aganhan nenebam pemen o, oluk, mo’gulogulat tuagoluk, o Yerusalem waga lema o,” oluk, mo’gulneselat,
23At anni modok welago a’ge Allah en an mo’gulneselat, “Agauwa ai erlige di ap yu ap ena’gul onuk mu a’ge emin eniak mu a’ge emin, enebe 10 en ap Yahudi a’ge mesik, osum yat a’ge ene’gik modok anni wiak a’ge tenakho modok welat, his Allah emin oruak oluk nenesa’go hweligema re, his nenemin lo nenagai opogu lege o, oluk, mo’gulontogu lema o,” oluk an mo’gulneselat, tegei a’ge re aiat o.
Currently Selected:
Zakharia 8: Wul
Highlight
Copy
Compare
Share
Want to have your highlights saved across all your devices? Sign up or sign in
