Zakharia 7
7
Enemde ugwelak welat togulom wene
1Ap Darius ’gain Onuk Logo a’ge otluk wene le’gelogo mo’gulentasukhwe, tahun henagan takpoluk, mesik tago a’ge dugwi 9 a’ge pollak poluk, mesik pelelak dugwi Kislew a’ge tanggal 4 pam at Allah en wene ap Zakharia mo’gulesi.
2-3Aphwami o Betel a’ge en ap Sarezer emin, Regem-Melekh emin, onosi a’bik logolak emin, ebano en, “Nis di tahun yu tahun dugwi 5 pollak poluk mesik pelelak a’ge pam so’boru no erlakma en nenemde ugwelak welat, nenede wathorlogu lege ano togulom a? erlak a, oluk, at Allah nenebe ede en mo’gulnontouwa o,” oluk, is at anni modok welago a’ge at Allah owi werikmu at ebe eiye welat togwi a’ge emin, Allah en mo’gulentasukhwe mo’gulontogwi a’ge emin, mo’gulontouwak oluk, perak enebegesa.
4Perak onobogwiam mo’gulentai legesema, at anni modok welago a’ge Allah ano en is mo’gulonto a’ge mo’gulnesi ano yuat o. 5“Aphwami o eba welagai a’ge ’berlegat emin, is ap an nebe eiye a’ge emin, mo’gulentasulat, tahun 70 ’gwisokhwe, dugwi 5 pelelak poluk, mesik pelelak a’ge pam emin, toluk pobuk dugwi 7 pelelak poluk mesik pelelak a’ge pam emin, so’boru no erlakma en enemde ugelak ’gela’ge welat, enede wathorlogu legesa ano re, at en demat nis pobirak nonobouwak, opoluk, so’boru no erlakma en enemde ugelak ’gela’ge welat, enede wathorlogu legesa ya? erlak a, 6Is enagai en so’boru no’gulat, ik no’gulat, togu legesa ano re, is onomuat onogum pagerat togu legesa ano erlak no? 7O Yerusalem welagai a’ge emin, Yerusalem o seli logon kota-kota wali’gogo welagai a’ge emin, wene mesik om erlakma en enede we yogun lialogo enagai pam welat, ye, o lei lok o orogobu-sogweik akhit oruak a’ge emin, o mo obuk ilasu akhit o’gwe duk sebelak o’gwe eba emin, aphwami onowi eba werik pagathorloluk, welat, asogo togukhwe, is naduk an Allah en mo’gulentasukhwe mo’gulontogwi a’ge ebano en wene ai a’ge mo’gulontogwiam, mo’gulontogu legesa ebano erlak no? mo’gulontogu legesa at egei ani o oluk, mo’gulentemin o,” oluk, an mo’gulnesi o.
8At Allah en agauwa mesik eminsogoat an Zakharia mo’gulnesi. 9Mo’gulnesi ano is aphwami mo’gulentasulat, “At anni modok welago a’ge at Allah en egei ano re, yuat o. Togwi a’ge hegitsogo nak takpogulat, is-is nak nede-hede tak pagathwerlil lagalat, togu lemak o. 10Hwami sugwe emin, malik se’bin emin, aphwami ’bok a’ge emin, ene’gik erlak a’ge emin, sebelak onobogulat, is-is nak at mesik wiagap pogulat tu a’ge wene ’gagalogo pogulat, togumu no yo oluk egeimu re, mo’gulhentegis o,” oluk, mo’gulentesi o.
11Asogo mo’gulentegis a’geat de, wene ai, pobirak poluk nenebit opogulat, enebit welat, wene ai, ono’borl akhit hwikholuk, enesa’go lat horlogulat, tegisa o. 12Enede helep ale a’ge ’gela’ge takpoluk, togulom wene tak a’ge emin, at anni modok welago a’ge Allah en egei a’ge arogun en is ap Allah en mo’gulentasukhwe mo’gulontogwi a’ge en mo’gulontogukhwe uagoluk, o naduk mo’gulontogu legesa a’ge ebano emin, “en, holu nenebit o,” oluk, egesema, at anni modok welago a’ge Allah en olot het modok mia a’ge enebam pesi.
13At anni modok welago a’ge at Allah en eselat, “Is worlentasuam nenesa’go holu nenebit o, opoluk ukpegesema re, is en ’gonu mo’gulnogwi holuk, an nesa’go holu nebit o, oluk, ukpegi o. 14O yasobu anni wiak a’ge pun til wagalat, di a’ge yu a’ge woluk ’gwelabilasu ’gela’ge, is enebe asogoat di aphwami yu aphwami mu a’ge ene’gerlakma ’gwelebak enebegi o. ’Gwelebak enebasuam, is welagaimu ono’gwiang pam ebano o wogo pegesema, aphwami mesigat nak ogo mesik libagalat-’guagalat togwi modogat erlak oruak o. O obat a’geat de, o wogo a’ge ’gela’ge takpegesa ano re aiat o,” oluk, an mo’gulnesi.
Currently Selected:
Zakharia 7: Wul
Highlight
Copy
Compare
Share
Want to have your highlights saved across all your devices? Sign up or sign in
