Zakharia 6
6
Agauwa sirak a’ge pam e, kereta 4, hele’gik a’ge oruakma abi pam hesi wene
1Asogo toluk, agauwa mesik nil sum-sam a’ge sogo ’gela’ge yethegi ’gal e, dom ’biren tembaga a’ge nak pam e’gerlikmu en wale’gik oruakhwe, ’burl eriano en, ’gwiangso 4 a’ge liplau wagaimu entegis 2#Wah. 6:4-5Kereta naduk liplau wagoma hegi ano re, kuda ’borlu werak a’ge en lisogo liplau wagalat, e’berlik lip wau wagoma hegi ano re, kuda sing a’ge en litluk liplau wagalat 3#Wah. 6:2e’berlik liplau wago ano re, kuda ’gut a’ge en litluk liplau wagalat, kereta e’berlik a’ge ’gobok liplau wagoma hegi ano re, kuda wibe’gen ’belak a’ge en litluk liplau wagalat, togumu, is kuda ’berlek ai, enanni a’bik oruak nak-ma nil yerentegis o. 4Asogo nil yerentegistik, an en at emin weneane ogu lege a’ge malaikat ano hin wokhasulat, “Naik o. Yu disogo togukhwe hegi ai re, wene ebe no’go-sogo oluk o?”
5 #
Wah. 7:1
oluk mo’gulosoam, at malaikat en an mo’gulneselat, yer “hil entigen ai, at o yu ’berlegat eiye welago a’ge il pam ebaget togwi a’ge enebe 4 ano o yasobu erabu orogobu en, etleba akhit en yema akhit en, wetil wago akhit eba lagai a’ge enebe isat o. 6Kereta kuda sing a’ge en litluk lagai ano re, o o’borl akhit o’gwe lasulat, kereta kuda ’gut a’ge en litluk lagai ano re, o mo obuk ilasu akhit o’gwe lasulat, ye, kereta kuda wibe’gen ’belak a’ge en litluk lagai ano re, o sogweik akhit o’gwe hegit lasulat, lasulat tua o,” oluk, mo’gulnosoma hegi o.
7Is kuda ai re, ’berlegat enanni a’bikmu re, o yema ’berlegat ’gogolil lo a’ge, “Perleneat louwok,” oluk togukhwe, at malaikat ano en, “O yema ’berlegat, henil ’gogolil no’ogu lemis o,” oluk mo’gulentasuam, libotluk, o ’gwiang yu ’berlegat ’gogolil no’gukhwe entegis o.
8’Gogolil denagaihwe, at en an mo’gulneselat, “O o’borl akhit o’gwe laga ai, is o o’borl akhit o’gwe welagai a’ge nolot het om a’ge ebano nede sakho taknebegesa ai hemin o,” oluk, mo’gulnosoma hegi o.
’Gare-’gare Yosua ’buktak po wene
9At Allah en an mo’gulneselat,
10“Is ap o Babel hwik entail-legesa a’ge pobuk togolik wegesa a’ge ap Heldai emin, Tobia emin, Yedaya emin, is ’berlek en Allah wogum epegesa a’ge ebano wasu loroguntik, woluk o yogodagat ap Zefanya omlogo Yosia owi pam lak o. 11Laguntik, perak emin, emas emin, woluk lagun a’ge ano pam gare-gare heli’gogo poluk ap Yozadak omlogo Allah eiye a’ge onue Yosua ano a’gul pam ’buktak pomup o. 12#Yer. 23:5; 33:15; Zak. 3:8’Buktak pasu loroguntik, at anni modok welago a’ge at Allah en egei ano re, yuat o, oluk, at mo’guleselat, ap mesik onuk, esemis, tuelak ano re at ebe yuat o. At wolomma eba en esemis dakho lebikpasulat, at Allah owi wusogo pasulat, taga lema ani o.
13At Allah owi wusogo pasulat, at onuk logo ai en e, aphwami en, nogorlok e! ogulat, ’gain Onuk Logo a’ge otluk wene, le’gelogo mo’gulentasulomma ebalema ebano welat, wene le’gelogo mo’gulentasulat, tagalom ano re, at enat o. Asogoatma re, at Allah eiye welat, ’gain Onuk Logo a’ge otluk, wene le’gelogo mo’gulentasu lema o. At nagat Allah eiye otluk welat, at nagat ’gain Onuk Logo a’ge otluk, wene mo’gulentasulat, tagalomma re, wene mesik om erlakma en op nak welat, taga lema ani oluk, egei o, oluk mo’gulomup o. 14Is ap Heldai emin, Tobia emin, Yedaya emin, ap Zefanya omlogo Yosia emin, ononuk elaluk Welemagoluk, ’gare-’gare hwe narogun a’ge ano re, an Allah nowi wusogo pou wama eba modok-modok welema a’geat o. 15Di aphwami yu aphwami o walek en waga lema a’ge ebano en an Allah nowi ai, is enemin enat worua o. Worogwi holuk, is aphwami en, at anni modok welago a’ge at Allah enat ap Zakharia perakpou wagama hege o, oluk, ogu lema o. Ye, an haik Allah en wene mo’gulheselegi a’ge ano opsogo hwelak, poluk en togun holuk, wene ai om a’ge ebano ’berlek hegit nak agoma hagun ani o,” oluk, mo’gulnesi o.
Currently Selected:
Zakharia 6: Wul
Highlight
Copy
Compare
Share
Want to have your highlights saved across all your devices? Sign up or sign in
