Zakharia 2
2
Agauwa henaganak a’ge pam ap mesik en herle elira’ge mesik tenak oruakhwe abi pam il hesi wene
1Asogo toluk, nil sum-sum ’gela’ge tagalat yethegi gal e, ap mesik herle elira’ge e’gikmu tenak oruakma hegi o. 2Asogo hegirik, “Hat ’geba lasu legen o?” oluk, mo’gulosoam, at en an mo’gulneselat, “an o Yerusalem emde ’ge hwerli ye, ologun ’ge hwerli herle pam wal tigoluk lasu legi o.”
3Oluk, mo’gulnosoam, at malaikat an nemin wene ogu lege a’ge ano an uknoboluk lasumu, at malaikat mu a’ge mesik at emin sarlok toluk, 4at mo’guleselat, “O kota Yerusalem ai, aphwami enebe emin, onuam emin, modok a’bigat weiyal etil laga lemama re, o kota leget wogo a’ge ai erlak agalat we golom a’geat welema o. 5We golom a’geat oruakma, leget wali’gogo wogo a’ge odouk ebam dain oso ’gela’ge re, an nebeat welat, ye, ogola eba atia tak oruak holuk, aphwami en, eige nogorlok e! ogwi ai, an nebe anat welat, taga leik o oluk, at Allah en egei o, oluk, ap souwe a’ge ai pungtak laguntik mo’gulesi lak o,” oluk, at mo’gulosoma hegi o.
Aphwami hwik entai legesa a’ge togolik wemak orluk worlentesi wene
6At ’gain Onuk Logo a’ge en eselat e, “o yasobu erabu-orogobu akhit en, abel pema etleba yema en, lasumu ebano ’gwelebak pei lagama re, his o o’borl akhit o’gwe welegep a’ge ebano manis o! manis o!
7His o Babel henebei legesema welegep a’ge ai, manis o. Eba en henagap delhorloluk o Sion manis o,” oluk, At ’gain Onuk Logo a’ge en mo’gulentasukhwe hegi o.
8At anni modok welago a’ge at ’gain Onuk Logo a’ge en egei ano re, yuat o. “Aphwami en is an neiyagai muk onoboluk no’gwi holuk e, ai an nilat sogologwimu re, at modok logo welago a’ge naik en is di aphwami yu aphwami sebelak onobogwi a’ge ebano, wiagap onobouwak oluk, perak nobou waga o. 9Asogoatma re, an ne’gik anni pam is enebe la’buksogo is enebe wusogo enebasulat, eneragam a’ge en ena’gea’ge hogul wokho yarluk uagoluk, takpasulat, tagoam, at anni modok welago a’ge ’gain Onuk Logo a’ge en an demat peraknobou waga a’ge ano enaluk ema o,” oluk, osoma hegi o.
10At ’gain Onuk Logo a’ge en eselat, asogoatma re, “O Sion emalik his yu logwe. An weik tik, hene’gerlakma weleikmu re, henagai hogulat, henagai en ngai-wai ogulat, togu lemis o.
11Agauwa ai erligeat di aphwami, yu aphwami ’berlegat an ’gain Onuk Logo a’ge nemin la’bolul tik, is ai an neiyagaiat emama re, an is ene’gerlakmaat weleik o. Asogo tisoam, at anni modok welago a’ge at ’gain Onuk Logo a’ge en an peraknobou waga a’ge henaluk orogup ani o. 12An ’gain Nonuk Logo a’ge en ’gwiang omu polik a’ge pema o Yehuda ebano eiyetak pagathwerlasulat, ye, o Yerusalem naduk edikpoluk, welegi ’gela’ge an nowi pam weleik oluk, eiyerak pagathwerlasulat, tik o.
13Asogoatma re, di ap yu ap his yu logwe. An ’gain Nonuk Logo a’ge nematek degelak welagoma en arat in egirik welegimu re, nil pam hono’borlogouk erlak mosogoat welemis o,” oluk, mo’gulentasu hegirikmu re, mo’gulhentegis ai o.
Currently Selected:
Zakharia 2: Wul
Highlight
Copy
Compare
Share
Want to have your highlights saved across all your devices? Sign up or sign in
