Zakharia 1
1
Onowiak ukpoluk wemak oluk mo’gulesi Wene
1 #
Ezr. 4:24–5:1; 6:14 Ap Darius ’gain Onuk Logo a’ge otluk, wene le’gelogo mo’gulentasukhwe, tahun mesik takpoluk, mesik tago a’ge dugwi 7 a’ge pollak poluk, mesik pollak a’ge pam at Allah en at mo’gulosokhwe mo’gulentasu a’ge ap Ido eba Berekhya omlogo Zakharia ano wene mo’gulesi.
2At Allah en at mo’guleselat, “An Allah nolot het modok mia a’ge is he’balak enebam welegi o. 3Asogoatma re, at anni modok welago a’ge at Allah en wene disogo egei o, oluk, is aphwami ebano mo’gulonto a’ge re yuat o. At anni modok welago a’ge Allah en eselat, is pobuk togolik wotluk, onolukhwe edenogo ’gwelakniouwak o, onolukhwe edenogo ’gwelakniogwi holuk, nanni modok welago a’ge an Allah en nolukhwe edenogo ’gwelak entaik o, oluk, nanni modok welago a’ge an Allah enat egi ai o. 4Is ap an ’gain Nonuk Logo a’ge en mo’gulentasukhwe mo’gulontogwi a’ge en o nadugat is he’balak mo’gulontogulat, at anni modok welago a’ge ’gain Onuk Logo a’ge en, enebabut wiak welagai a’ge emin, wiak til no’gwi a’ge emin, ukpoluk, an muknoboluk wemak, egei o, oluk, mo’gulontogu legesa a’geat de, is en an niak enesa’go hologulat, pobi togulat, tu enebit opogu legesa ’gela’ge, is asogo togumu no yo, oluk, an ’gain Onuk Logo a’ge enat egi o. 5Is he’balak ebano, yogodak geba oruak? Ye, is an en mo’gulentasukhwe mo’gulontogu legesa a’ge ebano, warom erlakma en enelaluk modok-modok oruak a? 6An niak eselegi a’ge, wene le’gelogo pasulat, taga legi a’ge ebano, is wene mo’gulentasukhwe, mo’gulontogwi a’ge ebano neragam a’ge ebano en mo’gulontogu lemagoluk wene le’gelogo mo’gulentegis a’ge ebano, hene’balak hegitsogo tagenebasukhwe enil niegesa, ya, erlak a?
Asogo tisoam, onowiak ukpoluk, en ogulat, nis nenebabut wiak welat til no’gulat, nis wiak modok til no’gulat, togu lege ano, at anni modok welago a’ge at Allah en o’go taknonobo a’ge eberegei ano hegitsogo taknenebasumu re, obat o, egesa ano erlak no? oluk, mo’gulentemin o, oluk, egeimu re, mo’gulhentegis o,” oluk, mo’gulentesi.
Ap mesik kuda pam hweriogoma en wagokhwe il hesi wene
7Ap Darius ’gain Onuk Logo a’ge otluk, wene le’gelogo mo’gulentasukhwe, tahun mesik takpoluk, mesik tagalat dugwi 10 pelelak poluk, mesik dugwi onuk Syebat pelelak a’ge tanggal 24 a’ge pam at Allah en ap Ido eba ap Berekhya omlogo Zakharia mo’gulesi ano yuat o.
8 #
Wah. 6:2,4 Agauwa mesik hup nabi pam hasulat, ap mesik kuda ’borlu ’belak a’ge o’borl pam hweriogo ede we’gerlak a’ge bule iak pam oruak a’ge ano, e’gerlakma edik oruakhwe, o’borlma di kuda yu, kuda pema ’borlu ’belak, pema ’borlu il hup ’belak, pema ’gut ’belak, asogo tak a’ge oruakma hegi o.
9Asogo oruakhwe hegirik, an en, “Naik o, kuda hegi ai wene ebe ’gesogo paget oluk hegi o?” mo’gulegismu, at emin wene ’balogwi a’ge malaikat ano en an mo’gulneselat, “Wene ebe ano re, an osoma en de hagun o.”
10Mo’gulnosoam, ap e ede we’gerlak a’ge e’gerlakma edik welaga a’ge ano en eselat, “o ’gwiang pam yema pobi til denaga lemagoluk, at Allah en is yu ’berlegat perak onobou waga o,” oluk, mo’gulosoma hegi o.
11Is enil hegesa a’ge ebano en e at Allah en perakpou wagama ede we’gerlak a’ge e, e’gerlakma edik oruak a’ge ano mo’gulogulat, “Nis o ’gwiangma yema ’berlegat pobi til denagalat is aphwami ’berlegat enede op lialogo enagaisogo oruakhwe entige o,” oluk,
12mo’gulogwiam e, At Allah en perakpou waga a’ge malaikat ano en eselat, “Hanni modok welegen a’ge Allah o. O Yerusalem welagai a’ge emin, o Yehuda kota-kota welagai a’ge emin, holot het enebam pasukhwe, tahun 70 tegei ai, hedeap onobo erlakma en oruakhwe, agauwa meren ema o,” oluk, mo’gulosokhwe hegi o. 13Mo’gulosoam, at Allah en iak sakhosogo mo’guleselat, ede ago woru wene ano mo’guleselat, tisoma hegi o.
14Asogo hasuam e, at malaikat an mo’gulnoso a’ge ano en eselat, “Wene mo’gulentasulom ano re yuat o. At anni modok welago a’ge at Allah en eselat, o Yerusalem emin, dom Sion emin, nede hwedik modok takpasulat, obap paik a’geat de, 15is di aphwami yu aphwami en, nis yogunat op welege, opogwi a’ge ebano, an modok nolot het enebam po a’ge epasu legi o. Naduk nolot het we weiyat takpo epegi a’geat de, is en til lagai ai pam en nolot het modok loksogoat enebam po epasu legi o, oluk egei o.
16Asogoatma re, at Allah en egei ano re, yuat o. An en o Yerusalem agauwa mesik emin nolukhwe edenogo ’gwelak entasulat, nedeap enebiselat, an nowi ebalema eba woruak oluk tagenebasulat, ye, herle walhogwi a’ge pam o Yerusalem, ’gollosogo hwikhasulat, tik o, oluk, at anni modok welago a’ge at Allah enat egei o, oluk, mo’gulontomup o.
17Ye, mesik mo’gulonto ano re, yuat. At anni modok welago a’ge Allah en eselat, an nowi kota-kota eba di a’ge yu a’ge a’bik op a’ge nak orluk eselat lukat-lukat ’bisokhwe an Allah en is Sion a’ge enede ago weriselat ye, an nowi o Yerusalem weleik oluk eiyetak pagathwerlasulat, tik egei o, oluk mo’gulontomup,” oluk mo’gulnosoma hegi o.
Abi pam ’birenak a’ge hasulat, lak 4 a’ge emin, ap besi a’ge pam hele’gogwi a’ge enebe 4 emin, abi pam il yerentesi wene
18Asogo toluk, an nil sum-sum ’gela’ge tagalat yethegi ’gal e, iak 4 oruakma hegi o. 19Asogo hegirik, at malaikat an nemin wene ’balogu-lege a’ge ano mo’guleselat, “Iak yu re, wene ebe ’gesogo paget o?” oluk, mo’gulosoam, at en wene o’go an mo’gulneselat, “Lak yu en is aphwami Yehuda a’ge emin, Israel a’ge emin, Yerusalem a’ge emin, ’gwelebak enebegesa a’ge-ebano at de, yerentigen ai o.”
20Asogo mo’gulnosoam, at Allah en ap besi a’ge pam hele’gogwi a’ge enebe 4 eriano hwiak nesi. 21Hwiak nosoam e, an en at mo’guleselat, “ap yu, no tu a’ge paget oluk en waga epegen?” Mo’gulosoam, at en an mo’gulneselat, “Erlak o. Is Yehuda a’ge mesik enanni agaimu no oluk iak 4 daintak a’ge yu at a’geat de, iak yu onogorlok to hogulat, ye, iak polok oso ’gela’ge, di aphwami yu aphwami enanni pam o Yehuda sebelak poluk, enebe perak onobo uak oluk, tegisa a’ge ebano wat onobogulat, tuogoluk, wegesa a’ge enebe 4 eriano re, aiat o,” oluk mo’gulnosoma hegi o.
Currently Selected:
Zakharia 1: Wul
Highlight
Copy
Compare
Share
Want to have your highlights saved across all your devices? Sign up or sign in
