Zakharia 14
14
O ologun ’gobok Allah anni ema wene
1Henil oruakhwe, hena’ge a’ge hogul wokho so’but horlogulom erlige at Allah en hwalogo pesi a’ge ano arat horok lauma o. 2Agauwa ai pam is o Yerusalem sebelak pouwagoluk, aphwami ena’gul onuk lo’bok ’berlegat at en odoksogo onobouwama o kota ai pam hutla’gogulat, o werikmu ’gwilotluk, ena’ge-a’ge perlengsogo horlogulat, hwami nga ogukhwe tenentil lagalat, togu lemarik, is kota eba welagai a’ge ado pema ebano, hogul wogonoboluk o walekma wogonoboluk enebeil lagalat, is pema o kota eba welemagoluk, ugonobouwa o. 3Asogo togwi holuk e, at Allah libotluk, weim togwi en tiso ’gela’ge, is di aphwami yu aphwami ai, enemin weim obua ani o. 4O agauwa ai pam at oyuk o Yerusalem o mo porlu ago akhit dom zaitun pam po’bu agokhwe, dom zaitun ai, o mo liplau wago akhit en ’bekhit, o mo obuk ilasu akhit o’gwe sonuksogo lebak osoam e, dom pema ’gagalak ano ’goluk-’gelaksogo o o’borl akhit agalat, pema ’gagalak ano orlo’buk-erle’baksogo o sogweik akhit agalat, tagokhwe, ’burl ebano re o dogo lok a’ge elemik takpouwa o. 5Asogo tiso holuk e, o do’go elemik takpouwa ai re, kota Yerusalem en ’bekhit, o Azar hwerliat louwama re, ap Yehuda a’ge onue onuk logo a’ge Uzia welaga eria pam o mouk erlang-perlang hasuam, ’bogoligep ai ’gela’geat ebela ai pamat ’bogologup ani o. ’Bogologukhwe, an naik Allah ano, is mu agai erlakma en omu polik welagai a’ge ’berlegat enemin ’buma o.
6Agauwa ’buma ai erlige o mo atia emin, dugwi atia emin, hwesagal atia emin, welema erlagat a’geat de, atia tak nagat welema o. 7Agauwa ai elalin tu puk a’ge modok takpouwama re, o dakha eselat, hik agalat, tago a’ge ano, erlak agalat, o erlige nagat modok welema o. Asogo tu ano re, at Allah ematek nagat aluk welago yo.
8 #
Yeh. 47:1; Yoh. 7:38; Wah. 22:1 Agauwa ai pam ik enelalugwap enebiselom a’ge o Yerusalem pam en libemarik, me’gisogo pema o mo orlu ago akhit o’gwe laut pam dip tilasulat, pema o mo obuk ilasu akhit o’gwe laut pam dip tilasulat tisokhwe, o hebi agalat, o moru wagalat, taga lema o. 9At Allah ano o ’gwiang pam yema ’berlegat onue onuk logo a’ge otluk, wene mo’gulentasu lema o. Agauwa ai pam enaik mesigat Allah nagat emama re, at onuk nagat ogu lema o.
10O Geba en ’bekhit, o kota Yerusalem o’borlma o sogweik akhit o kota Rimon hwerli ’gwiang ai ’berlegat, o Araba-Yordan ’berlek do’go erang duelak pesi ai ’gela’ge tak paik a’geat de, o kota Yerusalem nak e, ’goduk ’gwi lagaimu onuk, Benyamin, hwerli en ’bekhit, ’goduk ’gwi lagaimu onuk, Naduk, hwerli en ’bekhit, ’goduk ’gwi lagaimu, onuk o’gutmu, hwerli en ’bekhit, o yat werik Hananeel hwerli en ’bekhit, ap onuk logo a’ge paget anggur e’gen a’bosu ’berelogumu hwerli yatsogo welago a’ge hegitsogoat tak paik o. 11#Wah. 22:3O kota Yerusalem ai, naduk wiagapsogo pegesa ’gela’ge pobuk mesik emin wiagap po erlakma en modok lebe u erlagat welemama re, o kota eba aphwami enede we yogunat lielak welema o.
12At Allah en is di aphwami yu aphwami ’berlegat o Yerusalem a’ge enemin weim obuogoluk ’guma a’ge ano, ou enebam pouwa ano re yuat o. Is owan enelaluk no’gukhwe, enagap dorlo’gok-dorlo’gok ’biselat, enil edip muk agalat, enemage muk otluk enemde ele’gwe yen e’ben wiak a’ge sang eselat, tagenebasulom a’ge enebam pouwa a’ge re, aiat o.
13Agauwa ai pam at Allah en is aphwami ai, enede eneperlagapsogo pasu holuk hun-hundomok enarilak hun-hundomok enemin ene’gik ten-ten ’boluk enebe wat-wat ’bogul ema ani o. 14Is Yehuda a’ge ogo re, is Yerusalem a’ge enemin weim obogu lema ani o. Is aphwami ono’borl o’gwe welagai a’ge ebano ’berlegat ena’ge-a’ge emas emin, perak emin, sum emin, ene’gik wenaru mia modok nogorlok a’ge odoktogu lema ani o.
15Ou ai a’ge en kuda emin, kuda a’ge bagal emin, unta emin keledai emin, onuam onowi sabo’gwe oruak a’ge ebano ’berlegat enebam emak ani o.
16 #
Ima. 23:39-43
Asogo nagat tiso en e, is di aphwami yu aphwami o Yerusalem weim til libagalat, ’bullak enebegesema oruak a’ge ebano, ’berlegat en di tahun yu tahun pam onue onuk logo a’ge at anni modok welago a’ge at Allah ano erliktogulat, onowi sabo wetil wegesa a’ge ebesogo seni soru a’ge ebano sorogulat, togu lema o. 17Ye, is di aphwami yu aphwami o ’gwiang pam yema welema a’ge ebano, onue onuk logo a’ge at anni a’bik welago a’ge at Allah erliktuok oluk o Yerusalem wagai erlak holuk nak e, is welagaimu o moru ’bu ago erlak nagat welema ani o. 18Ye, is Mesir a’ge ebano enemin seni setil wagai erlak holuk, is welagaimu ogo moru wom erlakma en nagat welema o. Is di aphwami yu aphwami en is Israel a’ge onowi sobo wetil wegesa a’ge ebano ebesogo seni soruok oluk o Yerusalem Wagai erlak holuk, at Allah en ou enebam pouwa ano, o Mesir a’ge ogo enebam pouwa at o. 19Asogo takpouwa ano re, is Mesir a’ge emin, di aphwami yu aphwami ’berlegat emin, Israel a’ge onowi sabo wetil wegesa a’ge ebesogo seni soru a’ge ano, enemin setil wagai erlak holuk, e’gin a’ge enebam po ano re, aiat o.
20Agauwa ai pam iak inghogwi a’ge kuda ebam erlelik a’ge ano pam, at Allah ebagerat polik a’ge o, oluk, emin e takpoluk pugulat, ye, kuali-kuali at Allah owi werikmu oruak ano re, sogoluak omu degelogo polik a’ge paget wusogo odouk narlogumu pogwi ’gela’ge, pogulat, tua o. 21Di sogoluak yu sogoluak sorogwi a’ge o kota Yerusalem oruak a’ge emin, o Yehuda oruak a’ge emin, ’berlegat at anni modok welago a’ge Allah paget poligat welemama re, is aphwami ’berlegat Allah paget wusogo wogomogoluk, wotluk, sogoluak ai, wokho, ai pamat sorogu lema o. Ye, agauwa ai pam ap di a’ge yu a’ge o’go ’balil no’gwi a’ge ebano, at anni modok welago a’ge Allah owi werikmu eba ena’ge-a’ge o’go ’balogu lema modok erlagat o.
Currently Selected:
Zakharia 14: Wul
Highlight
Copy
Compare
Share
Want to have your highlights saved across all your devices? Sign up or sign in
