Zakharia 13
13
Onodogwi asua emin, eniak esei ogwi a’ge emin, erlagap po wene
1At anni modok welago a’ge at ’gain Onuk Logo a’ge en eselat, “Agauwa ai pam is ap Daud pam en weiyelak a’ge emin, is o Yerusalem welagai a’ge emin, en, wiak togulat, an uknoboluk mu a’ge motluk lagalat, togu legesa ano re, soduk a’ge ho togwi-ai ’gela’ge, erlagapsogo pogu lemagoluk, is enebaget ik elaruk mesik hele’gik pouwa o. 2Agauwa ai erlige an en o eba onodogwi asua onuk ’balogu lema a’ge ano, ononuk mesik ’balu erlakma en welemagoluk, erlagapsogo paikmu re, ebet hogu lema erlagat o,” oluk, egei o. “Is ap eniak eseiat, Allah en mo’gulnesi, ogwi a’ge emin, dogwi asua erliktogulom opogwi a’ge emin, o agauwa eria pam oruak a’ge enebe ’berlegat erlagapsogo pouwama re, 3Ap mesik en e, Allah en mo’gulnesimu, mo’gulhentegis o, oluk, oso holuk, at dorua a’ge ia aik enat at mo’gulogulat, at Allah onuk ’balholuk e’gen ai, wiagat egentikmu re, hat hebe waromat o, oluk, at doru a’ge aik ia onomu enat ’bisok de a, wa’gun pam de a, dallogo woruama warema o.
4Agauwa ai pam is ap, nabi ’gela’ge pam disogo hege o, oluk, mo’gulontogu legesa a’ge ’berlegat ene’gerli emama re, is ap Allah en mo’gulentasukhwe mo’gulontogwi a’ge onosum yat unta asu pam egeik a’ge ’buktogu legesa a’ge ano, eniak esei a’geat de, demat opou wagoluk, ’buktogu legesarikmu re, is mesik emin ’buk horlogu lema erlagat o. 5Enematek domok en ogulat, an ai re, malik wei pam enat no’gwiang pamat yabuk takpoluk, no uang Odokhwerlasu legeirikmu re, an Allah en mo’gulentasukhwe mo’gulontogwi a’ge ebano a’ge erlak o. An yabuk tiso a’geat o, oluk ogu lemasat ani o. 6Ap mesik en is ap ai mesik mo’guleselat, ye, hebe hebam hiebil oruak ai, no en takhebesi o? Mo’gulosoam, at en o’go mo’guleselat, erlak o. Niebil nebam ai, narilak onowi pam oruakma taknebegesa o, oluk, mo’gulontouwa, ani o,” oluk, egei o.
Domba degelenebiso a’ge ano worogwiam, ’bullua wene
7 #
Mat. 26:31; Mrk. 14:27 At anni modok welago a’ge at Allah en eselat, “Hat wa’gun yu o. No domba degelenebiso a’ge edikpegi a’ge ano weriselat, At nemin hwedik welago a’ge ano, poloksogo wusogo pasulat, tinogoluk, hat wa’gun yu, inemin o. Inoroguntik no domba degelenebiso a’ge, weriso holuk, is domba ai, ’bulogo yarluk ua o. An neiyagai enanni erlak a’ge oruakhweat de, wusogo enebagun,” oluk, egei o.
8At Allah en eselat, “Wusogo enebil lasulat, o yema ’berlegat no domba enebe henagan oruak holuk, ’biren warenebik mu waragaihwe, mesik ukpasulat, til lasu lema o.
9Is ’biren warenebiselat, mesik ukpaik ano re, perak at en a’ge nak emak oluk, odouk pam werarogwi ’gela’ge, emas orogole enak a’ge houwagoluk, odouk pam werarogwi ’gela’ge. Is asogoat tagenebaik o. Asogo tisoam, is en an nonuk ’balogo ’gonu mo’gulnogwiam, nesa’go holak poluk, mo’gulentasu leik o. Is an neiyagaiat o, osoam, is en ogo, at Allah ai, nenaik at o, oluk, ogu lema ani o,” oluk, egei.
Currently Selected:
Zakharia 13: Wul
Highlight
Copy
Compare
Share
Want to have your highlights saved across all your devices? Sign up or sign in
