Zakharia 12
12
Is Yerusalem a’ge enagap delua wene
1Is Israel tagonobo a’ge at Allah en egei ano re yuat o. O ’bogorl ’bierak pasulat, ’gwiang edip ’belabil lasulat, aphwami hele’gik poluk, ede oruagap pasulat, tegei a’ge at Allah en eselat,
2“An en demat o Yerusalem sogoluak a’bosu ne’gak a’ge ’gela’ge takpaikmu re, is di aphwami yu aphwami at eragam o’gwe welagai a’ge ebano en a’bosu ne’gak a’ge ai, nau wagai holuk, enede ’belak a’ge ’gela’geat takpil laga lema o. O Yerusalem wiagap pouwogoluk, ’gogulat, o Yehuda kota-kota ogo wiagabat pouwa o.
3Di aphwami yu aphwami o yema welagai a’ge ’berlegat odoktak poluk, o Yerusalem sebel horlouwok oluk, tua ai erlige, an en o kota Yerusalem helep e’gin no’gosogo lekho ’gela’ge takpaikmu, is di aphwami yu aphwami ’berlek en, lekhul, oluk tua a’geat de, enebe almerak pagathorlouwa o.
4Agauwa ai erlige an en is kuda ’berlegat enede ing-ding uama ekhenma agalat, ekhenma agalat, til no’gulemagoluk, tagenebasulat, ap at ebam hweriogo welat wagai a’ge ebano, enede ’baletil louwagoluk tagenebasulat, tik o,” oluk, at Allah enat egei o. Is Yehuda pam en weiyelak a’ge an en nilen wogenebiseleik a’geat de, is di aphwami yu aphwami onokuda ebano nak e, enil wiagap paik ani o.
5Asogo takpasuam e, is Yehuda a’ge onuelak ebano enedemu en, ogulat e, at anni modok welago a’ge at Allah ai re, is Yerusalem a’ge enaik Allah atma re, is Yerusalem a’ge ai, enanni a’bik entige o “oluk, ogu lema o.
6E ’gelak a’ge elim wusogo odoktak poluk, odouk magalesogo ’gwelebak pogwi ’gela’ge, gandum uak edikpil loluk, odouk heberlogo e’gerlakma pogwi ’gela’ge, agauwa ai erlige an en is Yehuda a’ge onuelak asogoat takpasuam, is aphwami ono’borl o’gwe oruak a’ge ebano ’berlegat odouk ’gwelebak pogwiam, ’berleksogoat nil louwa a’geat de, o Yerusalem nak e, welago, ’gela’geat alnanosogo welema o.
7Daud pam en weiyelak a’ge emin, is o Yerusalem welagai a’ge emin, ononuk modok logoatma re, is Yehuda pam en weiyelak a’ge ononuk wei nak sebelak ogo erlagat is ononuk logo ai ’gela’geat houwagoluk, ye, is Yehuda a’ge naduk anni emak oluk, an Allah enat tagenebaik o.
8Agauwa ai erlige an Allah en is Yerusalem welagai a’ge ebano, ’gwelabentarok welat, is aphwami enanni erlak modogat erlebetak welagai a’ge ebano at Daud anni welaga ’gela’geat takpasulat, ye, at Daud pam en weiyelak a’ge ebano re, Allah ’gela’geat, at Allah en yo’go malaikat naduk otluk, laga-legesa ai ’gela’ge, takpasulat, tua o.
9Agauwa ai erlige is di aphwami yu aphwami ’berlegat o Yerusalem sebel horlouwogoluk, togwi holuk e, an en erlagapsogo enebaik o,” oluk, egei o.
At worogwi holuk ebaget lo’gu maru wene
10 #
Yoh. 19:37; Wah. 1:7 #
Mat. 24:20; Wah. 1:7 “An en, at Daud pam en weiyelak a’ge emin, is o Yerusalem welagai a’ge emin, aphwami enedeabonobogulat, togwi a’ge enebaget se’ban ogulat, togu lemagoluk, enede ’gagalak pasuam e, is en an damuksogo watnobua a’ge ano an pam enil niogu lemarik, ap mesik emalik mesigat dogo warago holuk, ede en ebaget lo’gu mariso ’gela’ge an nebaget nge togulat, ap omlogo mesigat dogo a’ge wat ago holuk ede wathwerlasu ’gela’ge, an pam en enede wathorlogulat, tua o. 11Agauwa ai erlige ap Hadad-Rimon o Megido do’goma eba ebaget lo’gu lok maregisa ’gela’ge, is kota o Yerusalem welagai a’ge ebano ogo asogoat an nebaget lo’gu loksogoat marua o. 12O eba aphwami Israel en dogoma a’ge nak enebe lo’bok lo’gu marogulat, onugwami enemalik enemin onomu nak otluk, lo’gu marogu lema o. Ap Daud pam en weiyelak ugwe emalik enemin onomuat agalat, ap Natan pam en weiyelak a’ge ugwe emalik enemin onomuat agalat, 13ap Lewi pam en weiyelak a’ge ugwe emalik enemin onomuat agalat, ap Simei pam en weiyelak ugwe emalik enemin onomuat agalat, 14is logon dogo ’gwe a’ge degelogo asogoat onugwami enemalik enemin onomuat agalat, asogo togu lemarik, lo’gu marogu lema o,” oluk, at Allah enat egei o.
Currently Selected:
Zakharia 12: Wul
Highlight
Copy
Compare
Share
Want to have your highlights saved across all your devices? Sign up or sign in
