Hagai 2
2
Allah owi ’get modok op a’ge ebelogo woru wene
1Tahun ai a’ge pam nak dogwi hebarligen pelelak poluk mesik pelelak tanggal 21 ai a’ge pam at Allah en at mo’gulosokhwe mo’gulentasu a’ge Hagai ano en is aphwami mo’gulontouwak oluk, wene mo’gulesi a’ge ano re, yuat o. 2“Hat en e, at ap Sealtiel omlogo o Yehuda eiye welago a’ge Zerubabel emin, at ap Yozadak omlogo an nebe eiye a’ge onue Yosua emin, is aphwami pobuk togolik wegesa a’ge enebe ’berlegat emin, wene mo’gulonto ano re, yuat o. 3#Ezr. 3:12Naduk Allah owi modok opsogo werik hwe enil hogu legesa a’ge ap mesik ene’gerlakma oruak a? Erlak a, ye, yogodak worogwi yu re, no’gosogo takhwe hogwi no? Op erlak wiak a’ge de worogu lege, oluk, opo erlakma en oruak a? 4Asogoat a’geat de, An nanni modok welegi a’ge An ’gain Onuk Logo a’ge Allah eminat weleikmu re, at Zerubabel ai, ede o’borlogouk erlagap poluk welemak o, oluk, at ’gain Onuk Logo a’ge Allah en egei a’ge ano mo’guleselat, at Yozadak omlogo an nebe eiye a’ge onue Yosua ai re, ede o’borlogouk erlagap poluk, welemak o, oluk, ’gain Onuk Logo a’ge Allah en egei a’ge ano mo’guleselat, ye, is aphwami o eba welagai a’ge enede hweriogo poluk, yabuk togu lemak o, oluk, egei a’ge ebano mo’gulentasulat, taga lomup o. 5#Kel. 29:45,46Is o Mesir en wogonoboluk liplau wagarik tugulom a’ge enemin wene ologun ’balogo hwelak pegi aiat o. An narogun is ene’gerlakma welema ai en e, onogorlok hogumu no yo.
6 #
Ibr. 12:26
Nanni modok welegi a’ge an Allah en wolom erlakma enat ’bogorl ’gwiang erlang-perlang hasulat, ik lok ye’gelak a’ge laut ano emin, ’gwiang o’borl o’gwe oruak a’ge emin, alo’gwe erlang perlang hasulat, 7di aphwami yu aphwami ’berlegat enede o’borlogouk uak oluk, takpasulat, tagoam e, is aphwami ena’gul onuk lo’bok ena’ge ’berlegat perlengsogo woluk yema pou wagai a’ge ebano an en wokhonowi werikmu eba po ’gwilasuam e, nowi werik a’ge yu modok logoatma re, aphwami en eige! Oluk hin wogu lema o, oluk, Nanni modok welago a’ge An ’gain Onuk Logo a’ge Allah enat egi o. 8Perak emin, emas emin, ai An na’geat o, oluk, nanni modok welago a’ge Allah enat egi o. 9Nanni modok welago a’ge An ’gain Onuk Logo a’ge Allah en an nowi naduk werik a’ge ano re, we weisogo lok a’geat werik welaga a’geat de, yogodak worogwi yu nak e, modok elalin nin lok a’geat worogumu re, an nowi werikmu yema en enede we yogun lielak welemagoluk, tak paik o, oluk, nanni modok welago a’ge An ’gain Onuk Logo a’ge Allah enat egimu re, mo’gulontomup o,” oluk, osoam e, mo’gulentesi.
At Hagai en ap Allah eiye a’ge emin wene ’balegisa wene
10At ap Darius ’gain otluk, wene le’gelogo mo’gulentasukhwe, tahun mesik takpoluk, mesik tagokhwe dogwi siragen pelelak poluk mesik pelelak a’ge tanggal 24 ai a’ge pam ’gain Onuk Logo a’ge at Allah en at mo’gulosokhwe mo’gulentasu a’ge Hagai ano aphwami mo’gulontouwak oluk, wene mo’gulesi ano re, yuat o. 11-12“Nanni modok welago a’ge an Allah en ap mesik an nebaget omu degelak a’ge at en an nebaget werak a’ge ebano ’balogo o’bogoyum yat a’ge pam e’girlogo yagarak a’ge pam yagasogo woluk wagalat, wam ’belak yagarak a’ge ano pam roti worogo a’ge de a, yorum sogo a’ge de a, anggur a’bosu ne’gak a’ge de a, e zaitun a’bosu ne’gak a, di a’ge yu a’ge mu a’ge sogo a’ge de a, o’bogoyum ologun ano en tenhasu holuk, ai pam di a’ge yu a’ge omu en ema ya? Erlak a, oluk, tugulom a’ge Musa en pelal wesi ano re, ’ge o? oluk, is ap nebe eiye a’ge ebano hin wogentemin o, oluk, nanni modok welago a’ge an ’gain Onuk Logo a’ge Allah enat egi o, oluk. Mo’gulesi a’ge ano, at Hagai en ap Allah eiye a’ge ebano mo’gulentasuam e, asogo en ema erlak o,” oluk, mo’gulegisa.
13 #
Bil. 19:11-22
Mo’gulegisema, at Hagai en pobuk eminat mo’gulentasulat, “Ye, ap mesik en ap waraga a’ge ebe tenhai lasu holuk e, wene ebam agoma re, di a’ge yu a’ge sogo a’ge ai, tenhai lasu holuk di a’ge yu a’ge sogo a’ge ’berlegat ai, wene ema ya? Erlak a, mo’gulentesimu, is ap Allah eiye a’ge ano en ai re, demat ani o! Wene at ebam ema o.”
14Oluk mo’gulegisema, at Hagai en is mo’gulentasulat, at Allah en, “Ai holuk e, An neiyagai yu emin, is an en pulogo enebegi a’ge aphwami yu emin, is ogo asogoat oruak hegi o. Is di tu, yu tu, til lagai a’ge ebano emin, di a’ge yu a’ge nebaget pou wagai a’ge emin, ’berlegat ai re, wiak enemelmel tu puk a’geat agama oruak hegi, oluk, egeimu re, mo’gulhentegis o,” oluk, mo’gulentesi.
Allah owi worogwi holuk nede aganhan enebam po wene
15Asogo mo’gulentesirik, Allah en pobuk mesik emin mo’guleselat, “Asogoatma re, An ’gain Onuk Logo a’ge nowi worogwi a’ge yu o wa’gi naduk a’ge owan pil lo erlakhwe, naduk e, no’gosogo ’gela’ge welegesa a’ge de no henede ebetholuk, o yogodak ya enat ’bekhit, pobuk til lo a’ge ebano enede en ebetholuk til laga lemak o. 16Naduk is ap en gandum e’gen 20 hwerli walhegeik yagaru opogwi a’geat de, weiyatma re, 10 nak walhegeik yagathorlogulat, ye, anggur a’bosu 50 hwerli walhegeik na’gu opogwi a’geat de, weiyatma re 20 hwerli nak walholuk nang horlogulat, tugu legesa ani o. 17Is yabuk set li-lagaiksogo til lagai ano pam e’gen op a’ge ’bal horlo no, oluk, e’gen egeik a’ge ina’ge en nasulat, yogunat takpil lasulat, moru hagarle’gen en lologunsogo pasulat, tuak oluk, an en perakpou wegi ano pam, yu taknenebasu yu nogorlok, oluk, pobuk togolik li-lagak an muknoboluk wema epegi a’geat de, muknoboluk wom erlagat, mo egesa o, oluk, an ’gain Onuk Logo a’ge enat egi o. 18Allah owi woru a’ge wa’gi o agauwa yogodagat pege o, oluk, dugwi sogoen pelelak tanggal 24 o agauwa yu hwerli en ’bekhit til-til enede we’gerlil laga lemak o. 19O naduk en ’bekhit yogodak hwerli e anggur e’gen emin, e delima e’gen emin, zaitun e’gen emin, e’gen egesu erlagat oruakhwe yoru a’ge e’gen owi pogwi a’ge mesik oruak a? Erlak a, pobirak pouwak o. Erlak a’geat de, o yogodak ya hwerli en an nede aganhan enebam pasulat, wogentasu leik egeimu re, mo’gulhentegis ai o,” oluk, mo’gulentesi.
At Zerubabel en tu a’ge paget mo’gulesi wene
20Is ap Allah eiye a’ge mo’gulonto oluk egei a’ge ano mo’gulentesimu, dugwi sogoen pelelak a’ge tanggal 24 ai pam nak at ’gain Onuk Logo a’ge Allah en at Hagai ’biren nak a’ge mo’gulesi ano re, yuat o. 21“At o Yehuda eiye welago a’ge Zerubabel ano mo’guleselat, An Allah en ’bogorl ’gwiang erlang-perlang hasulat, 22is aphwami onuelak ’gain a’ge hwerigo welat, wene le’gelogo mo’gulontogumu ebano ebabut wiagap pasulat, is aphwami pema ena’gul onuk lo’bok eneragam onoboluk wene le’gelogo mo’gulontogwi a’ge enanni ano erlagapsogo pasulat, ene kereta ebabut wiagarak pasulat, ap woluk lasu a’ge ano eminat warenebiselat tagokhwe, is-is onua’gun pam wat-wat ’bogulat, onokuda emin, is kuda woluk lagai a’ge ebano emin, waronobogwiam waretil laga lema ani o. 23At anni modok welago a’ge at ’gain Onuk Logo a’ge Allah en eselat e, o agauwa ai erlige An at Allah en at Sealtiel omlogo An neragam a’ge Zerubabel ano, nebalema wene le’gelogo mo’gulentasu lemagoluk, pulogo paikmu re, a’bosu cap ebe cincin a’ge de ap ’gain e’gik dum ’burl a’ge pam ’buktak welago ai ’gela’ge at ai re An ne’gikmu a’ge cincin ’gela’geat tak paik o, oluk, nanni modok welago a’ge an ’gain Onuk Logo a’ge Allah enat, egimu re, mo’gulemin o, oluk, egeimu re, mo’gulhegis ai o,” oluk, mo’gulesi.
Currently Selected:
Hagai 2: Wul
Highlight
Copy
Compare
Share
Want to have your highlights saved across all your devices? Sign up or sign in
