Wahyu 9
9
1Asogo malaikat enebe ugan en ene’bi’gong iak inghegesarikmu en, mesik e’bi’gong iak inghasuam e, hwesagal mesik en ’gwiang ogola opma ’bugumu, orogobu ’goduk horuagoluk ’goduk horogwi a’ge onuk kunci wogegisema ’bogorl pam en ’gwiangma ’bu agoma yethegi o. 2#Kej. 19:28’Bu agarik, ’gwiang ogola opma orogobu ’goduk hwerisoam e, odouk hobu yabuk serlik pogwiam ligago ai ’gela’ge, ’goduk hwerik o’gwe ai en, hobu ligagalat e, mo emin, ’bogorl emin, hiktak pasumu yethegi o. 3#Kel. 10:12-15Hobu ai ogola en e, di ho’bukhwap yu ho’bukhwap erlelim iak en erlelik enebasu ai ’gela’ge, iak en aphwami erlilenebise lemagoluk, eiyerak enebegesema, hobu e’gerlak o’gwe en orlu aga laga. 4#Yeh. 9:4Is ho’bukhwap ai mo’gulentasulat e, “E ebe emin, e’gela emin, di a’ge yu a’ge owi yogo mu a’ge logon emin, ’berlegat wiagap po modok mia o. We, aphwami Allah esilo ene’berli pam pelal wogo erlak a’ge holugat wiagabenebip o,” oluk ono’borlu egesema entegis o. 5Asogo ono’borlu agalat, “Aphwami enebe modok ’be’gi waronobogup no yo. We, erlelim iak en erlilentasuam nonouk wiaksogo togwi ai ’gela’ge, dugwi huaben welat, nonouk wik-wiaksogo togu lemak o,” oluk mo’gulentegisema entegis o. 6#Ayu. 3:21; Yer. 8:3Asogo tagonobogukhwe obotut en wik-wiaksogo hogulat, “Nenebe lebeksogo warolo e,” oluk waromogoluk, onu’gwarek en di walhogulat, yu walhogulat, tua a’ge re, enebe lebeksogo warema erlak, oluk egeimu no oluk e, warom erlakma en nonouk nak togwi modok welema o.
7 #
Yoe. 2:4
Ye, is ho’bukhwap ai enebe re, wam kuda, aphwami en o’borl pam huragalat weim ebil louwogoluk esan polik pogumu welagai ai ’gela’ge welegesa. Is ai onorogole re, aphwami onorogole ’gela’ge, ena’gul pam e, ’gare-’gare ’gela’ge emas a’ge ’buktak. 8#Yoe. 1:6Ye, enasu re, hwami enasu ’gela’ge. Ye, eniak e, mene orlomene onuk singa ai a’ge iak ’gela’ge. 9#Yoe. 2:5Ye, enemik pam e, sing ’buktogwi ai ’gela’ge, ’besieme’gen a’ge ’buktak. Ye, enagapsaburl o’borlogouk e, ap weim ebi louwogoluk wam kuda esan a’bik a’ge en ’gwiangso ’gela’ge logon ebam dipsogo legenak a’ge onuk kereta a’ge lisogo wogonoboluk, lasukhwe, oyuk amitmit ’bo pasu ai ’gela’ge o. 10Ye, enage erlelim a’ge iak langtak ai ’gela’ge oruakma re, dugwi huaben welat eniak en aphwami erlilenebise lemagoluk eiyetak enebegesema erlilonobogumu entegis o. 11Ye, is ai onue ’gain onuk logo a’ge tenentarok welago a’ge re, at malaikat Allah en ’gwiang ogola orogobu ’belagenebegeimu welago a’ge anoat o. At ai onuk, nis neniak pam e, wiagabenebiso a’ge oluk u ’gela’ge, is aphwami Ibrani a’ge eniak pam e, onuk Abadon ogulat, ye, is aphwami Yunani eniak pam e, Apolion ogulat, ogumu yethegi o. 12Asogo wiagabonobua a’ge re, mesik wiagabenebegeitik, pobuk agauwa ’biren pam agaikhen wiagabonobua a’ge owan oruak o.
13 #
Kel. 30:1-3
Malaikat enebe huaben ene’bi’gong iak asogo inghegesarikmu en, mesik e’bi’gong iak inghasuam, di a’ge yu a’ge Allah paget narlogwi a’ge ebale, ebe emas hele’gik a’ge, ye, o’gut pema-pema ugan pam wam sapi iak ’gela’ge hele’gik a’ge, Allah orogolema oruakma eba en aphwami eniak ’gela’ge ogumu hwelegis o. 14At iak ai en e, at malaikat mesik e’bi’gong iak inghesi a’ge ano en, asogo iak ingholuk e, e’gikmu tenak oruakma disogo mo’gulesi, “Malaikat enebe ugan pam ik lok a’ge mesik onuk Efrat esa’goma herle werak oruak a’ge ebano herle hebilenebi lak o,” oluk mo’gulesi. 15Asogo mo’gulesi ai re, is malaikat ai en aphwami enebe henagan pam me’gisogo onoboluk, ’biren ugonobogulat, mesik tahun ai pam, dugwi ai pam, agauwa ai pam, jam ai pam, enebe modok warenebil lo yo, oluk pageat Allah en yo’go enebesimu ’gagalak oruakma, herle hebilonobogumu nil hegi o. 16Asogo entegistikmu en, pobuk mo’gulneselat e, “Ap tentara esan logolak wam ono kuda lo’bok o’borl pam hweriogo oruakma entigen ai, enebe ’berlek e, 200 juta yat oruak o,” oluk mo’gulnosoma nesa’go hwelegis o. 17Asogo hwelegistikmu en, pobuk wam kuda emin, aphwami o’borl pam hweriogo a’ge emin, nabi ’gela’ge pam yethegi o. Is ai enemik pam sum sing ’buktogwi ai ’gela’ge ’buktak oruakma entegis o. Asogo entegis ai re, is logon onosum il odouk magale ’gela’ge ’buktak, ye, is logon, onosum il ’bogorl lalu ’gela’ge ’buktak, ye, is logon onosum orogole ’bogorlik ’belak a’ge ’gela’ge ’buktak, ye, ono kuda ebano a’gul e, mene orlomene onuk singa ai a’ge a’gul ’gela’ge. Ye, enemde elema en e, odouk emin, hobu emin, hwedali al ’gela’ge e’ben wiak a’ge onuk belerang ai a’ge emin, liplau waga laga. 18Asogo odouk emin, hobu emin, belerang e’ben wiak a’ge ai emin, ebe henagan wiagabenebiso a’ge ai, enemdelema en liplau wagalat e, aphwami enebe henagan pam me’gisogo onoboluk, ’biren ugenebasulat, mesik enebe ’be’gi modok warenebil lagaimu en entegis o. 19Is enemdelema en asogo waronobogulat, ye, enage a’gum ’gosu a’gul oruak a’ge ’gela’geatma re, asogo waronobogulat, tugumu entegis o. Is wam kuda ai enanni re, enemde emin, enage emin, aiatma re, aphwami enebe asogo di obotut yu obotut enebam poluk waronobogu legesa ai o.
20 #
Mzm. 115:4-7; 135:15-17; Dan. 5:23 Asogo a’geat de, is aphwami pema akhit waronobu erlak a’ge ai en, mu’gat ebabut wiak a’ge ebam he’berik welat, ene’gik en dogwi asua emas a’ge emin, perak a’ge emin, tembaga a’ge emin, helep a’ge emin, e a’ge emin, wusogo pogwi ai o. Asogo wusogo pogwi ai, is dogwi ai en, enil ontogwi erlagat, enesa’go hologwi erlagat, ebela lagai erlagat, a’geat de, asogo wusogo poluk, 21aphwami logon enebe ele yakho waronobogulat, logon ’bamo ’gela’ge ele erlak a’ge waronobogulat, ’babi tenontugulat, yogorlia wogulat, togu legesa a’ge ukpoluk enebabut heberlom erlakma en welat e, wiak modok hwedigat tugukhwe entegis o.
Currently Selected:
Wahyu 9: Wul
Highlight
Copy
Compare
Share
Want to have your highlights saved across all your devices? Sign up or sign in
