Wahyu 10
10
Malaikat mesik pelal wogo a’ge e’gikmu woluk wagoma hesi wene
1-2Asogo entegistikmu en e’berlik e, at malaikat anni a’bik a’ge mesik osum ’gela’ge o hena a’ge ’buktak. Ye, a’gul pam e, warlo’guk wale’gik. Ye, orogole re, mo ’gela’ge. Ye, oyuk e, odouk magale ’bekhit ligago a’ge ’gela’ge, pelal wogo e’gerlik wei a’ge e’gikmu en hebilogo woluk ’bogorl pam en ’bu agarik, oyuk ’bekhit akhit e, ik laut ye’gelak a’ge pam pasulat, ye, oyuk hware akhit e, ’gwiangma pasulat, tagalat e, 3mene orlomene ’gela’ge onuk singa ai a’ge iak nga oso ai ’gela’ge iak loksogo osoam, wene o’go re, orlolu iak sabit pam en mo’gulogu legesa. 4Orlolu iak asogo osoam e, an pelal waigoluk tegis a’geat de, ’bogorl pam en disogo mo’gulnegisa, “Orlolu iak sabit pam osokhwe hesa’go hweligen a’ge ai, pelal wa’gun no yo. We, hogolasogo mo ip o,” oluk mo’gulnegisema hwelegistik e, mo egi o.
5 #
Kel. 20:11; Ula. 32:40; Dan. 12:7; Amo. 3:7 Asogo mo’gulnegisema mo egirik yethegi ’gal e, malaikat oyuk pema akhit ik laut ye’gelakma, ye, pema akhit e, ’gwiangma, poluk, edik oruakma yethegi a’ge ano e’gik ’bekhit akhit ’bogorl pam lagabak poluk e, 6Allah en ’bogorl ebe emin, ebam welago a’ge emin, ’gwiang ebe emin, ebam welago a’ge emin, ik laut ye’gelak a’ge emin, ogola welago a’ge emin, ’berlegat walhesirik elaluk modok welago a’ge onuk pam disogo oluk ho’buk ’balisoma hwelegis o,
“Allah en tua a’ge ai, di erlige eselat, yu erlige eselat, aregen welema erlak o. 7We, malaikat enebe hebarligen en ene’bi’gong iak inghegesarikmu en, mesik e’bi’gong iak inghouwa a’ge ai iak inghasuam e, at Allah en wene ogola a’ge ai is ap at eragam a’ge, iak mo’gulontogu legesa a’ge ebano mo’gulontogulat e,
Pobuk an disogo tik, oluk wene weragenebesi hegitsogoat arat ema o,” oluk ho’buk ’balegei.
8 #
Yeh. 2:8–3:3
Asogo ho’buk ’balegeitikmu en, e’berlik e, ’bogorl pam en, eniak mo’gulnegisa a’ge ano en pobuk disogo mo’gulnegisa, “Pelal wogo e’gerlik hebelik a’ge anoat, malaikat oyuk pema akhit ik laut ye’gelak a’ge pam, ye, pema akhit e, ’gwiang pam poluk edik oruak a’ge ano, e’gikmu tenak oruak a’ge ai wai lak o,” 9oluk mo’gulnegisema, woknemagoluk ’gonu e’bek lasuam e, at en disogo mo’gulnesi, “Waguntik e, monup o. Asogo nasuam e, hemdema en e, ’gin a’bosu ’gela’ge oduk op a’ge nagun a’geat de, hogola ’belabisoam e, hogola en e, erle nak ema ani o,” oluk mo’gulnesi. 10Mo’gulnesimu, pelal wei a’ge ’belak ano e’gikmu en wegirik, ebe ano nasumu re, nemdema ’gin a’bosu ’gela’ge oduk op a’geat de, nogola ’belabisoam e, esik modok wiak agoma hegi o.
11Asogo hegirikmu en, pobuk ’bogorl pam en, wene disogo mo’gulnegisa, “Hat en wene Allah en aphwami ena’gul onuk lo’bok, onowi edip lo’bok, eniak lo’bok, onuelak ’gain ononuk logo a’ge esanat enebe lo’bok pobuk tagonobouwa wene ai, mo’gulentasu lomup o,” oluk mo’gulnegisa o.
Currently Selected:
Wahyu 10: Wul
Highlight
Copy
Compare
Share
Want to have your highlights saved across all your devices? Sign up or sign in
