Wahyu 8
8
Suesi’ga yat a’ge hebarlik pam arat hebelegeirikmu en, pobuk mesik hebelegei wene
1Asogo mo’gulnesirikmu en, e’berlik e, suesi’ga yat a’ge silo pogwi ai ’gela’ge a’bosu ebe dopnorak pegesa a’ge ano, at Domba Emalik ano en e’gik hebarlik pam hebelegeitikmu en mesik hebelisoma re ’bogorl pam en setengah jam ’gela’ge di a’ge yu a’ge iak o’borlogouk dengtakma hegi o. 2Asogo welagarik e, pobuk nil yethegi ’gal e, malaikat enebe sabiren Allah en ’bi’gong iak lok a’ge ’gela’ge ebe sabirenat wogentesimu, at orogolema edik oruakma entegis o. 3#Kel. 30:1,3; Amo. 9:1Asogo oruakhwe, malaikat mu a’ge en sogoluak emas hele’gik a’ge wik-wok e, di a’ge yu a’ge Allah paget narlik obogumu emas hele’gik a’ge ano pam wagarik e, edik welaga. Asogo oruakma, Allah en e, at eiyagai ’berlek se’ban ogwi a’ge eniak emin, kemenyan emin, emin ’berlegat narlik obouwagoluk, kemenyan a’bik wogesimu, di a’ge yu a’ge Allah narlik obogumu ano, ebe at ’gain welago a’ge ebalema ano olukhwema oruakma pei lagaimu yethegi o. 4Asogo pei lagaihwe re, Allah eiyagai se’ban ogwi a’ge eniak emin, kemenyan e’ben emin, malaikat ano e’gik pam en Allah orogolema lagabisoma hegi o. 5#Kel. 19:16; Ima. 16:12; Yeh. 10:2; Wah. 11:19; 16:18Asogo tegeitik, e’berlik e, at malaikat ano en odouk di a’ge yu a’ge wusogo Allah narlogwi a’ge ano wesirik, sogoluak ano ogola yagasogo re, ’gwiangma woroksogo hwikha ’bu aga laga. Asogo ’belakpou wagoam e, ebinal pobuk naduk yebekhasulat, orlolu iak logat ’baktak poluk orlu eselat, mouk a’bik erlang-perlang hasulat, tisokhwe hegi o.
’Bi’gong iak inghasuam e, aga wene
6Asogo hegirikmu en, e’berlik e, malaikat enebe sabiren a’ge ebano ’bi’gong lok a’ge ’gela’ge ebe sabiren en iak inghouwogoluk enebabut hebik-hebeksogo tugukhwe entegis o. 7#Kel. 9:23-25; Yeh. 38:22Asogo enebabut heberlak poluk e, naduk malaikat mesik e’bi’gong iak inghasuam e, moru hagarle’gen emin, odouk emin, mep emin, mesik o’gwe ne’garlok-he’garloktak poluk ’gwiangma hwikha ’bu agoam e, ’gwiang emin, e lok a’ge emin, ebe henagan pam me’gisogo poluk ’biren ukpasulat, mesik odouk en aling-ling wokho nasulat, e’gela herle’gela un a’ge ’berlegat nasulat, tisoma yethegi o. 8-9Ai ’gela’ge, at malaikat naduk e’bi’gong iak inghesirikmu en, pobuk at mesik e’bi’gong iak inghasuam e, dom ’gela’ge lok a’ge mesik odouk magale dain osoam e, ik laut lok a’ge ye’gelakma hwikha ’bu agoam e, ik laut emin, Allah en walhesi a’ge ik laut ogola welago a’ge emin, ik so lok a’ge onuk kapal emin, ebe henagan pam me’gisogo, ’biren ukpasulat, mesik wiagap pasuam e, ik orogole mep agalat, di a’ge yu a’ge ik olomu a’ge logon waragalat, kapal wiak agalat, tisoma yethegi o. 10-11#Yes. 14:12#Yer. 9:15Asogoat is malaikat ’biren ene’bi’gong iak ingholukmu en mesik e’bi’gong iak inghasuam e, hwesagal lok a’ge ’bogorl pam en esaga heberlak a’ge ’gela’ge magale ’gwialogo ’bu agarik, ik elaruk o’gwe emin, ik ebe lok wago a’ge emin, henagan pam me’gisogo poluk, ’biren ukpasulat, mesik esik a’bik a’ge takpoluk pasumu hegi o. Hwesagal ai onuk e, Esigwiak. At en asogo ik esigapsogo pasumu no oluk e, aphwami ik no’gwiam enebe a’bigat waragaihwe entegis o. 12#Yes. 13:10; Yeh. 32:7; Yoe. 2:10,31; 3:15Asogo malaikat enebe henagan ene’bi’gong iak inghegesarikmu en, mesik e’bi’gong iak inghasuam e, mo emin, dugwi emin, hwesagal emin, aphwami ’go’bu waronobogwiam enanni erlak ago ai ’gela’ge, enamolit henagan pam me’gisogo poluk, ’biren ukpasulat, mesik hik agalat yoru erlakma en mo eselat, o erlige mesigat a’ge, lok o’gwe mo yerisolomtik en, wei o’gwe yoru erlakma en mo eselat, o hup mesigat a’geat de, lok o’gwe dakharak wolomtik en, wei o’gwe hik modok agalat, tisoma nil hegi o. 13Asogo egeitikmu en, pobuk yethegi ’gal e, sue pedi-pedi ’gela’ge ’bogorl lik ’gwiang ’belap ’burl eba agapsaburl langsogo darak neselat e, iak loksogoat disogo ese laga, “Malaikat enebe ugan ene’bi’gong iak inghegesarikmu en e, pobuk malaikat enebe henagan en ene’bi’gong iak inghogwiam, aphwami ’berlegat ’gwiangma welagai a’ge, modok wiagabonobua ai re, Eige! Eige! Enebe nede o!” oluk il nosoma nesa’go hwelegis o.
Currently Selected:
Wahyu 8: Wul
Highlight
Copy
Compare
Share
Want to have your highlights saved across all your devices? Sign up or sign in
