Wahyu 7
7
Aphwami Israel a’ge ena’gul onuk lo’bok silo ’gela’ge ene’berli pam pegesa wene
1 #
Yer. 49:36; Dan. 7:2; Zak. 6:5 Asogo nil entegistikmu en, e’berlik e, is malaikat enebe ugan ’bogorl edip-edip erabu akhit en, orogobu akhit en, etleba akhit en, yema akhit en, sogwei punhau wago akhit, ebela ologun sebelogo edik welat, sogwei ebe ugan a’ge ’gwiang o’gwe punhau wagalat e, e’gela lebe hasulat, ik laut ye’gelak o’gwe punhau wagalat, tuano oluk ene’gik en tenak oruakma yerentegis o. 22 Is asogo oruakhwe, malaikat mu a’ge mesik o mo yegelogo liplau wagoma eba en Allah elaluk modok welago a’ge esilo woluk liplau wagarik, Allah en is malaikat enebe ugan ebano ’gwiang emin, ik laut ye’gelak a’ge emin, wiagap pou wagoluk eiyetak enebesi a’ge ebano disogo mo’gulentasukhwe hwelegis, 3#Yeh. 9:4,6“Nis en, is nenaik Allah eragam a’ge nenede we’gerlogo Allah esilo ene’berli pam owan po erlak welege ai re, ’gwiang emin, e edip emin, ik laut ye’gelak emin, wiagap po mia o,” oluk mo’gulesi. 4Asogo mo’gulesirik e, aphwami Israel a’ge en dogo’gwe a’ge ena’gul onuk lo’bok ’berlegat enede we’gerlogo Allah esilo ene’berli pam enebil legesarik, “Enebe hwerli 144.000 pam silo enebil lege,” oluk osoma hwelegis o. 5-8Is ene’berli pam silo enebegesa ai enebe re,
ye, is aphwami ena’gul onuk Yehuda a’ge re, 12.000,
ye, is aphwami ena’gul onuk Ruben a’ge re, 12.000,
ye, is aphwami ena’gul onuk Gad a’ge re, 12.000,
ye, is aphwami ena’gul onuk Asyer a’ge re, 12.000,
ye, is aphwami ena’gul onuk Naftali a’ge re, 12.000,
ye, is aphwami ena’gul onuk Manasye a’ge re, 12.000,
ye, is aphwami ena’gul onuk Simeon a’ge re, 12.000,
ye, is aphwami ena’gul onuk Lewi a’ge re, 12.000,
ye, is aphwami ena’gul onuk Isakhar a’ge re, 12.000,
ye, is aphwami ena’gul onuk Zebulon a’ge re, 12.000,
ye, is aphwami ena’gul onuk Yusuf a’ge re, 12.000,
ye, is aphwami ena’gul onuk Benyamin a’ge re, 12.000.
Allah esilo enebe lo’bok asogo ene’berli pam enebesirik e,
“Hwerli ai hwerli enebegema oruak o,” oluk osoma hwelegis
Aphwami enebe a’bik en e, ene’gik wenaru mia ’gela’ge odoktak oruakma il entesi wene
9Asogo hegirikmu en, e’berlik nil yerentegis ’gal e, di aphwami yu aphwami ena’gul onuk lo’bok, enagap lo’bok, onowi lo’bok, eniak lo’bok, sum ’gut yat ’buktak a’ge, aphwami en weni worogulat, wedin e’gela porloksogo ene’gikmu wogwi ai ’gela’ge, e e’gela a’ge ene’gikmu woluk, Allah ’gain welago a’ge ebalema eba Domba Emalik e’birek oruakma enilem odoktak enebe hwerli yu pam oluk, ene’gik wenaru modok mia welat, eniak loksogoat disogo ogu legesa,
10“Nenaik ’gain Allah hebalema welegen a’ge, u a e
Domba Emalik emin, ... u a e
Delnonobogwi a’ge, ... u a e
Edip hisat welegep,” ... u a e
oluk weni worogumu entegis. 11Ai ’gela’ge re, Allah ’gain welago a’ge ebale ebe ’burl oruakhwe, is ap enarlue ebano emin, is Allah en walentesimu enelaluk welagai a’ge logon enebe ugan ebano emin, eragam o’gwe wali’gogo oruakhwe, is malaikat enebe ’berlegat enabel pema-pema wali’gogo welat, onorogole Allah eragam sakhunsogo welat erliktogu legesa. 12Asogo erliktogulat, disogo ogu legesa,
“Demat emak u ’gela’ge, Amin, ... u a e
Nenaik Allah hematek lok, ... u a e
Di wene yu wene haluk modok welat, ... u a e
Hat hanni pam tennentarok oruakma, ... u a e
Hau wathobogulat, erlikhobogulat, ... u a e
Hau do’goksogo wathobogulat, logo hobogulat, ... u a e
Ogwi modok wolomul ai o, ... u a e
Demat emak u ’gela’ge, ... u a e
Amin,” ... u a e
oluk weni worugumu entegis. 13Asogo ogukhwe, is ap enarlue ebano a’ge mesik en hin wokniasulat e, “Is aphwami onosum ’gut yat a’ge ’buktak yema re, salak. Ye, o ’geba en wegesa,” oluk hin wokniesi. 14#Dan. 12:1; Mat. 24:21; Mrk. 13:19Hin asogo wokniasuam, an en e, “Nue, an neperlak o. Hat nak e, haluk welegen o,” oluk mo’gulosoam, at en e, disogo mo’gulnesi, “Is aphwami yema re, o ’gwiangma oruakma aphwami logon en di obotut yu obotut a’bik tagonobogwiam, Allah en delenebegeimu, onosum Domba Emalik emep pam arat ’gut modok emerigisa a’ge o. 15Asogo tigisarikmu no oluk e, Allah ’gain welago a’ge ebalema ebe oruakma ilem edik welat, at owi werikmu at ebaget hup erlige tago modok oruakma, at ’gain welago a’ge ebalema oruak a’ge ano en, aphwami en mo orlouk watnonobuano oluk, o worogwi ai ’gela’ge, at ebe en is sebelogo tenentarok welema o. 16-17#Yes. 49:10#Mzm. 23:1-2; Yes. 25:8; 49:10; Yeh. 34:23Asogo onoboluk oruakma Domba Emalik ano Allah ’gain welago a’ge ebalema ebe ’burl welat, aphwami en domba o’gonogwi ai ’gela’ge, is tenentarok modok welat, ik aphwami enebe enelalugabenebiso a’ge nouwagoluk, elarukmu wogonoboluk lasulat, Allah en enil a’bosu ho tagalat, taga lema ai en e, so’boru emin, ik emin, nele hogu lema modok erlak o. Ye, mo en emin, odouk en emin, orlouk en modok lo’bugenebise lema erlak o,” oluk mo’gulnesi.
Currently Selected:
Wahyu 7: Wul
Highlight
Copy
Compare
Share
Want to have your highlights saved across all your devices? Sign up or sign in
