Wahyu 6
6
Silo pogwi ai ’gela’ge a’bosu dopnosogo pegesa a’ge Domba Emalik en hebelegei wene
1Asogo hegerik e’berlik e, silo pogwi ai ’gela’ge, suesi’ga yat a’ge a’bosu ebe sabit pam dopnosogo pegesa a’ge ano, Domba Emalik ano en, mesik naduk hebelisoam e, is Allah en walentesimu enelaluk welagai a’ge enebe ugan ebano a’ge mesik en e, “Suk o,” oluk iak orlolu iak ’gela’ge osoma nesa’go hwelegis o. 2#Zak. 1:8; 6:3,6Asogo osoma, nil yethegi ’gal e, ap mesik segen woluk ’gare-’gare ap ’gain ononuk logo a’ge ’buktak onobogwi a’ge a’gul pam ’buktak pegesema, wam kuda asu ’gut a’ge o’borl pam hweriogo welat, o sebeligoluk sebelil nosoma yethegi o. 3Ye, silo pogwi ai ’gela’ge, suesi’ga yat a’ge pam a’bosu dopnosogo pegesa ano a’ge, at Domba Emalik ano en mesik naduk hebelegeitik en, pobuk mesik hebelisoma re, is Allah en walentesimu enelaluk welagai a’ge ebano mesik en, naduk iak olukmu en pobuk mesik iak eselat, “Suk o,” oluk osoma hwelegis o. 4#Zak. 1:8; 6:2Asogo osokhwe re, wam kuda asu momi a’ge lasumu yethegi o. Ap mesik wam kuda ai o’borl pam hweriogo nosoma re, disogo mo’gulegisema hwelegis, “Aphwami ’gwiangma a’ge enebam lioksogo op wolom mia o. At e, aphwami logon en logon waronobogulat, logon en logon waronobogulat, wat-wat ’bugu lemagoluk, hat eiye takhebege,” oluk ’garok lok a’ge wogigisema wam kuda ano o’borl pam hweriogo nosoma yethegi o.
5 #
Zak. 6:2,6 Ye, silorak ai ’gela’ge, suesi’ga yat a’ge ai pam a’bosu dopnosogo pegesa a’ge ano, Domba Emalik ano en ’biren hebelegeitik en mesik hebelisoma re, is Allah en walentesimu enelaluk welagai a’ge ebano, enebe ’biren arat eniak egesarikmu en, e’berlik e, “Suk o,” oluk ogukhwe hwelegistik, yethegi ’gal e, wam kuda asu sing a’ge mesik lasumu yethegi o. Ye, ap mesik e’gin a’ge walhogwi a’ge e’gikmu wik-wok wam kuda ai o’borl pam huragarik nosoma yethegi o. 6Asogo nosoma yethegirik, nesa’go hwelegis ’gal e, is Allah en walentesimu enelaluk welagai a’ge enebe ugan ebano ene’gerlakma en aphwami eniak ’gela’ge disogo egei, “Beras ’gela’ge gandum e’gen ai a’ge e’gin a’ge pam sogoluak e’gik mesigat nak yagarak poluk walsogo re, o’go yabuk agauwa mesik erlige paget togwiam ene’gik o’go wogontogwi ai ’gela’ge ’berlegat po yo. Ye, he’bak e’gen ’gela’ge onuk jelai ai a’ge e’gin a’ge sogoluak ogola henagan nak yagasogo re, o’go yabuk agauwa mesik erlige togwiam ene’gik o’go wogontogwi ai ’gela’ge ’berlegat po yo. Asogo a’geat de, minyak e zaitun a’bosu emin, anggur a’bosu emin, ai nak e, wiagap po re, mia o,” oluk osoma hwelegis o. 7Ye, silo pogwi ai ’gela’ge, suesi’ga yat a’ge pam a’bosu dopnosogo pegesa a’ge ano, Domba Emalik ano en, e’gik henagan pam arat hebelegeitik en, mesik hebelisoma re, is Allah en walentesimu enelaluk welagai a’ge ebano enebe henagan en eniak arat egesarikmu en, mesik en eselat, “Suk o,” oluk osoma nesa’go hwelegis o. 8#Yeh. 14:21Hwelegistik, yethegi ’gal e, wam kuda asu aphwami waromogoluk onorogole erlagaiktak pogwi ai ’gela’ge nosoma yethegi o. Ye, enebe waragai ai, edip aphwami ’gela’ge agalat e, wam kuda ai o’borl pam huragarik denaga laga o. Asogo nosoma, at e’berlik e, ’gwiang ogola ’bogwi ai, aphwami ’gela’geat agarik e, emin no’gumu yerentegis o. Asogo no’gulat e, aphwami ’gwiangma a’ge ’berlegat enebe ugan pam me’gisogo onoboluk, henaganak a’ge pam waronobu erlakma en ugonoboluk, mesik nak aphwami muon en ’garok pam waronobogwiam waragalat, so’boru obuk en waragalat, ou edip lok a’ge pam en waragalat, mene orlomene emin, wam maro emin, iak en lebilenebisoam waragalat, togu lemagoluk eiyerak enebegesema no’gumu yerentegis o.
9Asogo entegistikmu en, e’berlik e, silo pogwi ai ’gela’ge, suesi’ga yat a’ge pam a’bosu dopnosogo pegesa ano a’ge, Domba Emalik ano en e’gik ugan pam arat hebelegeitik, mesik hebelisoma re, aphwami Allah iak ningsogo wegesarik, is logon mo’gulontogu legesa ai paget warenebegisa a’ge enarogun Allah uam wusogo e narlik pogumu opma oruakma yerentegis o. 10Is asogo welat, eniak loksogoat disogo ogumu hwelegis o, “Nenaik Allah hanni a’bik ’gektak modok welat, hegitsogo nak taga legen a’ge nenaik o. Agauwa meren woloroguntik en aphwami ’gwiangma a’ge en nis watnenebigisa a’ge ano nena’gulmu wene enebam poluk waronobogun no,” oluk mo’gulogu legesema, 11at en e, “Henarilak honorokhwi pema akhit enemin an nebaget togu legep a’ge, his wathenebigisa ai ’gela’ge, waronobua a’ge owan oruak ai re, is yerentarok welat set hwalogo il mesigat wolomup,” oluk mo’gulentesirik, onosum ’gut a’ge enebe lo’bok ’buktak enebasumu nil entegis o. 12#Yes. 13:10; Yoe. 2:10,31; 3:15; Mat. 24:29; Mrk. 13:24-25; Luk. 21:25; Wah. 11:13; 16:18Asogo yerentegistikmu en, e’berlik yethegi ’gal e, suesi’ga yat a’ge pam silo pogwi ai ’gela’ge, a’bosu dopnosogo pegesa ano a’ge Domba Emalik ano en e’gik huabenam arat hebelegeitik e, mesik hebelisoma re, mouk loksogo erlang-perlang hasulat, o mo orogole sum soduk a’ge ’gela’ge takpasulat, dugwi orogole aphwami enemep ’gela’ge takpasulat, 13#Yes. 34:4hwesagal ai, e ara e’gen owanma sogwei annisogo punhau wagoam, ’gwiangma lologo ’bu ago ai ’gela’ge, asogoat ’bogorl pam en ’gwiangma lologo ’bu agalat, 14#Wah. 16:20’bogorl ai, pelal wogo a’ge e’girlogo pogwi ai ’gela’ge, e’girlogo erlak agalat, dom a’gul emin, ik e’gen o’gwe emin, welagai o’gwe lo’bok en we’gwe hwikhasulat, tugumu yethegi o.
15 #
Yes. 2:19,21 Asogo tugumu re, aphwami ’gwiangma a’ge, ap ononuk logo a’ge emin, ’gain a’ge emin, onuelak weim obogwi a’ge emin, enilmu oruak a’ge emin, ononuk oruak a’ge emin, aphwami enebedek, eneragam a’ge enebe ’berlegat emin e, owik o’gwe hisak agalat, dom petne helep ele yat o’gwe hisak agalat, tugukhwe entegis o. 16-17#Hos. 10:8; Luk. 23:30#Yoe. 2:11; Mal. 3:2Asogo hisogo welat, dom emin, helep emin, disogo mo’gulontogu legesa, “Allah olot het nenebam pouwa ano arat horok lau waga yema re, sa ’gela’ge en ede ’buksogo sebelholuk mo ua epegep? Mia o. Ai en e, his en, at ’gain welago a’ge ebalema oruak ai en orogole haro en watnenebiselat, Domba Emalik ai olot het nenebam poluk watnenebiselat, tua yu re, orlo’buksogo nenebe sebelnenebiselat e, honolukhwema hisogo nenebemit o,” oluk ’gonu mo’gulontogukhwe nesa’go hwelegis o.
Currently Selected:
Wahyu 6: Wul
Highlight
Copy
Compare
Share
Want to have your highlights saved across all your devices? Sign up or sign in
