Wahyu 5
5
“Allah Odomba Emalik en pelal wogo a’ge e’gerlik oruakma elit hebelu,” oluk mo’gulesi wene
1 #
Yeh. 2:9,10; Yes. 29:11 Asogo tugukhwe nil entegismu en, e’berlik e, at ’gain ano ebe ebale welagoma welat, suesi’ga yat a’ge pam pelal abel o’borl olukhwe wogo oruak a’ge e’gerlik oruakma, “Is logon en enil ’gwelakho mia,” oluk silo pogwi ’gela’ge, a’bosu sabit pam dopnosogo pegesa a’ge e’gikmu tenak oruakma nil hegi o. 2Hegirik oruakma, at malaikat anni a’bik a’ge mesik en iak loksogo eselat e, “Suesi’ga yat a’ge pam pelal wogo a’ge e’gerlik yu, Hebelu mia o, oluk silo pogwi ’gela’ge, a’bosu dopnosogo pegesa a’ge yu, sa eiye welat elirat wokholuk hebelu epegep,” oluk hin wesi. 3Asogo hin wesimu, is logon ’bogorl pam a’ge de a? ’Gwiangma a’ge de a? At e, ’gwiang ogola orogobu a’ge de a, suesi’ga yat a’ge pam pelal wogo a’ge e’gerlik ai, elirat hebilholuk, ogola ’gwelakho a’ge eiye mesik horoenebigisa a’ge re, enebe erlagat. 4Asogo ap mesik eiye welat en, suesi’ga yat a’ge pam pelal wogo a’ge ai, elirat hebilholuk il ogola ’gwelakho a’ge ebe modok erlak ai en e, nede wiak agarik, nge a’bik tegis o. 5#Kej. 49:9; Yes. 11:1,10Asogo nge tagoma re, ap enarlue a’ge ebano mesik en e,
“Nge tago puk o. E esemis daintiso ai ’gela’ge, ap Daud en dogo’gwe a’ge a’gul onuk Yehuda a’ge dagagarik en, ebe mene orlomene ’gela’ge onuk singa ano arat anni agarik eiye agarikmu re, suesi’ga yat a’ge pam pelal wogo a’ge e’gerlik ai, is logon enil houwano oluk silo ’gela’ge enebe sabiren oruak a’ge ano en nak e, elit hebelu o,” oluk mo’gulnesi.
6 #
Yes. 53:7; Zak. 4:10 Asogo oluk mo’gulnesirikmu en, e’berlik e, is Allah en walentesimu enelaluk welagai a’ge logon enebe ugan ebano emin, ap enarlue enebe 24 ebano emin, at ’gain welago a’ge ebale ano eragam o’gwe oruakhwe, ene’gerlak ede ’burl e, Domba Emalik arat werigisa a’ge a’gul pam iak sabiren daintak, ye, il e, sabit pamat, edik welaga. Il sabiren ai ebe re, Allah en Arogun o di owi yu owi yerentasu a’ge ebanoat o. 7Pobuk e, Domba Emalik ano wagarik e, suesi’ga yat a’ge pam pelal wogo e’gerlik a’ge, at ’gain Allah welago a’ge ebalema ’gain welat, e’gik ’bekhit akhit en tenak oruakma wasumu nil hegi o. 8#Mzm. 141:2Asogo e’gikmu wasuam e, is Allah en walentesimu enelaluk welagai a’ge logon enebe ugan a’ge ebano emin, ap enarlue a’ge enebe 24 ebano emin, Domba Emalik ano eragam ’goluk ondogorlu pam welat erliktogu legesa. Asogo erliktogulat, is ap enarlue a’ge ebano enebe lo’bok gitar ’gela’ge emin, kemenyan a’bosu ik e’be emas hele’gik a’ge pam ne’gak a’ge emin, ene’gikmu tenak welat weni worogu legesa. Kemenyan ai ebe re, Allah eiyagai se’ban ogwi aiat o. 9-10#Mzm. 33:3; 98:1; Yes. 42:10#Kel. 19:6; Wah. 1:6Asogo weni ’get a’ge pelalogo worugulat,
“Hat nak e, arat wathebigisema waregentik, ... u a e
Aphwami ’berlegat ena’gul onuk lo’bok, eniak lo’bok, ... u a e
Enagap lo’bok, onowi lo’bok, ... u a e
Hat hemep pam Allah paget o’go ’balogo onoboluk, ... u a e
Eiye egentik, ... u a e
Suesi’ga yat a’ge pam pelal wogo e’gerlik ai, ... u a e
Wik-wok e, silo pogwi ai ’gela’ge, ... u a e
A’bosu dopnosogo pegesa a’ge ai, ... u a e
Elit hebelu, ... u a e
Is ai o’go ’balogo enebegentik, ... u a e
Nenaik Allah paget togu lemagolu, ... u a e
Ena’gul onuk, Allah eiye, tualigen, ... u a e
Enebe ’gainat edigenebegentikmu, ... u a e
Is en aphwami ’gwiangma a’ge, ... u a e
Eneragam onoboluk tenentarok wolorogun,” ... u a e,
oluk weni worogumu entegis o.
11 #
Dan. 7:10
Weni asogo werigisarikmu en, pobuk mesik disogo yethegiat. At Allah ’gain welagoma ebale ebano emin, is Allah en walentesimu enelaluk welagai a’ge ebano emin, ap enarlue ebano emin, enemin ’burl oruakhwe, eneragam o’gwe wale’gik e, is malaikat esan di ’gobok yu ’gobok ene’gik wenaru modok mia a’ge welat eniak loksogoat disogo ogu legesa,
12“Domba Emalik werigisa a’ge ai nak e, ... u a e
Di a’ge yu a’ge eragam pogulat, ... u a e
Ilmu oruak a’ge welat, ... u a e
Wene ede ’gagalak nak welat, ... u a e
Anni a’bik welat, tiso yo. ... u a e
Holuk, at nak e, elirat hau do’goksogo worugulat, ... u a e
Erliktugulat, hau worugulat, tugulom o,” ... u a e
oluk erliktogu legesa. 13Ai ’gela’ge, is Allah en walhesi a’ge ’berlegat, ’bogorl pam a’ge emin, ’gwiangma a’ge emin, ’gwiang ogola orogobu a’ge emin, ik laut ye’gelakma welago a’ge emin, ’berlek en weni worogulat e,
“At ’gain welago a’ge ebalema oruak ai, ... u a e
Domba Emalik ano e’birek e, ... u a e
Isat enanni oruak o, ... u a e
Oluk hau waronobogulat, eniak lobuksogo mo’gulontogulat, ... u a e
Erligonobogulat, togwi modok wolomok o,” ... u a e
oluk ogumu hwelegis o. 14Is asogo ogumu re, is Allah en walentesimu enelaluk welagai a’ge logon enebe ugan ebano en e, disogo ogu legesa, “Demat emak,” oluk u ’gela’ge, “Amin,” ogu legesa. Ye, is enarlue enebe 24 ebano en ogo re, at eragam ’goluk ondogorlu pam welat erliktugumu entegisat o.
Currently Selected:
Wahyu 5: Wul
Highlight
Copy
Compare
Share
Want to have your highlights saved across all your devices? Sign up or sign in
