Wahyu 2
2
Wene is Allah eiyagai o Efesus a’ge enebaget mo’gulesi wene
1Asogo mo’gulnesirik pobuk disogo mo’gulnesi, “An ne’gik ’bekhit akhit hwesagal ebe sabiren tenak welat, esaga ’gwialogwi a’ge ebe sabiren oyuk yogo emas a’ge hele’gik ano esa’go’gwe oruakhwe, nebe ’burl welat neselegi a’ge ano en wene yu mo’gulheik, At malaikat Allah eiyagai o Efesus odoktogwi a’ge tenentarok welago a’ge ano, wene an en is mo’gulentaik a’ge yu, hat en pelal wokho e’bek perakpemen o, 2His en an nebaget henepe mosogo welat henannisogoat togulat, is logon wiak togwiam e, Onomuat o, oluk, enesa’go werak erlakma en ugonobogu legep erlak o. Ye, is logon Yesus en peragonobou wago a’ge ’gela’ge takpoluk wegesarik ogwiam, his en e, Eniak esei ogwi, oluk enebabut enak a’geat ’balogu legep o. Henebabut asogo togu legep ai, an naluk o. 3Ye, aphwami en an nebaget di obotut yu obotut takhonobogukhweat, his en e, At nenebit, oluk, uknobo erlakma en henepe mosogo welegebat o. 4Asogo a’geat de, naduk henede an nebam hwedik welegep ai ’gela’ge, yogodak asogo welegep erlak ai nak e, Wiak togwi, oluk henebabut ’balise legi o. 5Ai holuk e, his ’goboksogo modogat pegeptik welegep ai, henede ebetholuk, henebabut heberloroguptik e, naduk togu legep ano ’gela’geat togu lomup o. Asogo togup erlak holuk e, an nebe weiktik e, his en a’ge esaga ’gwialogwi a’ge ai ebalema en henokho wokhaik o. 6Asogo a’geat de, is logon ap Nikolaus ebabut wokho togwiam, an nebit entasu legi ’gela’geat, his henebit ontogu legep ai nak e, op o. 7#Kej. 2:9; Yeh. 28:13; 31:8; Wah. 22:2Wene egi a’ge ai, at Allah Arogun en Allah eiyagai o di owi yu owi odoktogwi a’ge mo’gulentasu ai, henesa’go holu holuk e, opsogo hwelip o. At ap sa en anni ema holuk e, Allah iabukmu e’gen enelalugabenebiso a’ge nouwagoluk wogeik o, oluk wene ’berlegat mo’gulentegis a’ge ai, pelal wokho ene’bek perakpomup o,” oluk mo’gulnesi.
Wene Allah eiyagai o Smirna a’ge enebaget mo’gulentesi wene
8 #
Yes. 44:6; 48:12; Wah. 1:17; 22:13 Asogo mo’gulnesirik, pobuk mo’gulneselat, “An e, edipmu en ’bekhit ede’bimu modok weleik a’ge ano arat waregirik en pobuk nelaluk egirik welago a’ge ano en, wene yu mo’gulheik o, At malaikat Allah eiyagai o Smirna odoktogwi a’ge tenentarok welago a’ge ano, wene an en is mo’gulentaik a’ge yu, hat en pelal wokho e’bek perakpemen o, 9His demat a’ge paget henebe ’gain henilmu oruak a’geat de, is aphwami Iblis eiyagai a’ge de, eniak eseiyat, Nis nenebe Yahudi a’ge, oluk ogulat, his hononuk wiagapsogo honobogwiam, henebe henerlagaik wiaksogo welegep ai, an nalugat o. 10At Iblis en his henede ’gagaluagoluk, aphwami his a’ge pema akhit ene’gik herle wusogo onoboma, agauwa 10 pam di obotut yu obotut hogu lema ai re, honogorlok hagup o. Di obotut yu obotut asogo takhonobogukhwe, henede nebam he’berik poluk, an nemin hwedik oruakma warorogup holuk e, sa omut oruak sa omut erlak oluk pungtak lagaimu en, is enanni agai a’ge o’go ’gare-’gare ’buktak onobogwi ai ’gela’ge, o’go noburlal-hoburlal takhenebaik o. 11#Wah. 20:14; 21:8Wene mo’gulentegis ai Allah Arogun en, Allah eiyagai o di owi yu owi odoktogwi a’ge mo’gulentasu ai, henesa’go oruak holuk e, opsogoat hwelip o. Sa en anni ema holuk e, is logon waremarik pobuk modok-modok warema ai, enemin wiagabenebaik erlak o, oluk wene ’berlegat mo’gulentegis a’ge ai pelal wokho ene’bek perakpemen o,” oluk mo’gulnesi.
Wene Allah eiyagai o Pergamus a’ge enebaget mo’gulesi wene
12Wene asogo mo’gulnesirik, pobuk mo’gulneselat e, “An ’garok e’gat pema-pema merak a’ge ne’gikmu tenak welegi a’ge ano en wene yu mo’gulheik, At malaikat Allah eiyagai o Pergamus odoktogwi a’ge tenentarok welago a’ge ano, wene an en is mo’gulentaik a’ge yu, hat en pelal wokho e’bek perakpemen o, 13His e, Iblis ebe ’gain welat aphwami logon eragam tenentarok welagoma eba welegep ai an naluk o. Asogo Iblis owi pamat welat, an nomlogo Antipas en nobok ebit om erlakma en, ebabut he’bisogo welat mo’gulentil denagoma, is logon en ebe honogola en worugumu, his en e, Nis nenede Yesus ebam he’berik welege ai erlak, nenebit, oluk ’goboksogo uknobo erlakma en, nemin hwedik modok welegep ai, henebabut an naluk o. 14#Bil. 22:5,7; 25:1-3; 31:16; Ula. 23:4 Asogo a’geat de, wene weiyat logon an nebit a’ge togu legep a’ge ai mo’gulhentaik o. Pageat aphwami Israel a’ge enebe wiak emagoluk, wam dogwi pam werak a’ge ’gwerik no’gulat, ’babi tenontogulat, tuagoluk, ap Bileam en Balak mo’gulesimu, at en enede ’gagalise laga a’ge ai, his logon at owene ai tenak welegep hentegis o. 15Ye, his logon en, wene ap Nikolaus en mo’gulentesi a’ge owene ai wik-wok tenak welegebat ai o. Asogo togu legep ai, an nebit modok epasu legi o. 16Nebit epasu legi ai en e, his wiak togu legep a’ge ai ukpoluk henebabut heberlomup o. Asogo heberlorogup erlak holuk e, his ’garok an nemdema a’ge pam wathenebiogoluk perleneat weik o. 17#Kel. 16:14-15; 16:33-34; Yes. 62:2; 65:15; Yoh. 6:48-50Wene mo’gulentegis ai, Allah Arogun en is Allah eiyagai o di owi yu owi odoktogwi a’ge mo’gulentasu ai, henesa’go oruak holuk e, opsogo hwelip o. Sa en anni ema a’ge holuk, so’boru onuk manna hisogo a’ge wogeselat, onuk ’get a’ge tualogo helep ’gut a’ge pam pelal wokho wogeselat, tik o. Onuk pelal wogo ai re, is logon eneperlak. We, at onuk pelal wogo horlouwa a’ge ai nak aluk ema a’ge wogema, oluk ’berlegat mo’gulentegis a’ge ai, pelal wokho ene’bek perakpomup o,” oluk mo’gulnesi o.
Wene Allah eiyagai o Tiatira a’ge enebaget mo’gulesi wene
18Asogo mo’gulnesirik pobuk disogo mo’gulnesi, “An Allah omlogo nil e, odouk magale ’gela’ge. Ye, noyuk e, tembaga odouk olomu werarogwiam amolit pasu ai ’gela’ge ano en wene yu mo’gulheik o. At malaikat Allah eiyagai o Tiatira odoktogwi a’ge tenentarok welago a’ge ano, wene an en is mo’gulentaik a’ge yu, hat en pelal wokho e’bek perakpemen o, 19His henebabut togu legep a’ge ai an naluk o. Is aphwami muon henedesogo welegep a’ge ai emin, henebit om erlakma en henebabut he’bisogo welegep a’ge ai emin, is logon lerontogu legep a’ge ai emin, is logon en di obotut yu obotut takhonobogukhwe, henepe mosogo welegep ai emin, ’berlegat an naluk o. Ye, naduk weisogo ’gela’ge togu legep a’geat de, yogodak modok a’bik togu legep ai, an nalugat o. 20#1Raj. 16:31; 2Raj. 9:22,30Asogo a’geat de, at hwe Izebel ano en iak eseiyat, An nebe Allah iak mo’gulentasu legi a’geat o, oluk aphwami an neragam a’ge enebe a’bigat ’babi tenogu lemagoluk mo’gulentasulat, wam dogwi pam werak a’ge ’gwerik no’gu lemagoluk mo’gulentasulat, tagokhwe, his en e, wene yagoum erlakma en, At omuat, oluk ukpogu legep ai nak e, Is wiak togwi, oluk henebabut ’balise legi o. 21At hwe ai, ’babi tenhouwagoluk tago a’ge ai ukpoluk ebabut heberlemagoluk yetharok welegi a’ge re, at tago a’ge ai, ukpoluk ebabut heberlom e, ebit o. 22Wene yu henede eberak wolomup o, Is ap logon en, hwe ai emin ’babi togwi a’ge ukpoluk, enebabut heberlagai erlak holuk e, is nonouk tuagoluk, hwe ai nogo osoma ebano hwikhai louwa o. 23#Mzm. 7:9; 62:12; Yer. 17:10 Asogo tagoam, is Allah eiyagai o di owi yu owi odoktogwi a’ge ’berlek en enil ontoluk, is en e, At Allah re, aphwami enede eberogwi a’ge ai emin, enede ’gagalogwi a’ge ai emin, alukmu re, aphwami nenebe lo’bok nenebabut togu lege a’ge hegitsogoat wene nenebam pasulat, o’go woknentasulat, tua o, oluk, an pobi nobuagoluk, is aphwami at hwe ai iak wogwi a’ge enebe warenebigat o. 24Asogo a’geat de, aphwami logon en, Hwe ai owene, Iblis iak ogola a’ge mo’gulentasu, oluk ogwi a’ge ai, his aphwami o Tiatira a’ge pema akhit en, wene ai mo’gulogulat, henaluk agalat, tu erlak ai en e, his en wene e’gin a’ge mesik togup en mo’gulhentaik erlak o. 25We, an weik ai owan wom erlak oruakhwe, wene wegep a’ge aiat hene’gik ningsogo tenak wolomup o, oluk mo’gulhentegis ai o. 26-27#Mzm. 2:8-9Sa en an nagai a’ge tago modok hwerli o ologun pam anni lai louwa holuk e, an naik en aphwami ena’gul onuk lo’bok, an en tenentarok welemagoluk ediknoboluk eiyerak nebesi ai ’gela’ge, at anni lai louwa a’ge ai asogoat tenentarok welemagoluk edikpoluk e, eiyerak poma, aphwami en ’bouwa’gun ’besie eme’gen a’ge pam ik e’be ’gwiang domul a’ge pam hele’gik a’ge damuk-demaktak pogwi ai ’gela’ge, at iak annisogoat mo’gulentasulat, tenentarok welema o, (Mazmur 2:9) 28Ye, hwesagal wap o mo orlu ago hegit en orlu ago a’ge ano wogeigat o, oluk mo’gulhentegis a’ge ai, 29Allah Arogun en is Allah eiyagai o di owi yu owi odoktogwi a’ge mo’gulentasu ai, henesa’go oruak holuk e, opsogo holip o, oluk mo’gulentegis a’ge ai, pelal wokho ene’bek perakpomup o,” oluk mo’gulnesi.
Currently Selected:
Wahyu 2: Wul
Highlight
Copy
Compare
Share
Want to have your highlights saved across all your devices? Sign up or sign in
