Wahyu 1
1
Yesus en wene hisogo a’ge Yohanes abi ’gela’ge pam mo’gulosokhwe, pelal wesi wene
1An Yudas, Yakobus ot, Yesus Kristus eragam a’ge ano en, his wene yu pelal wokho hene’bek perakpou wegi ai o. Narilak norokhwi. Allah enat yo’go henebesirik henebe ede welat, Yesus Kristus paget tenhentarok oruak ai. 2Asogo mo’gulnesimu, Allah iak ai Yesus Kristus en obok mo’gulnosokhwe wene ’berlegat an nil hegi a’ge ai obok ’baksogo pelal wokho pegi ai o. 3Wene ai ’berlegat e, perleneat ema ai en e, is aphwami logon wene pelal wogo a’ge yu onuk tualua a’ge emin, is logon wene ai enesa’go hwelakpoluk, wene ai hegitsogo togu lema a’ge emin, Allah en enebe obabenebisoam onogola enagai houwa o.
Is Allah eiyagai gereja sabiren odoktugu legesa a’ge ebano hau warenebegei wene
4-5 #
Kel. 3:14;
Wah. 4:5
#
Yes. 55:4;
Mzm. 89:27
An Yohanes en his o propinsi Asia gereja sabit pam odoktogu legep a’ge ebano narilak norokhwi o. Nenaik Allah ebe otok modok welat, page welaga, yogodak oruagat, pobuk modok welema a’ge wema ai emin, Allah ebe ’gain welago a’ge ebalema oruakhwe Arogun ebe modok ’garoktak oluk sabiren a’ge ologotma welagai ai emin, at Yesus Kristus ebabut he’bisogo welat Allah obok ’baksogo mo’gulnentasu a’ge ano emin, enebabut op ano en tenhentarok welat op a’ge wokhontogulat, henede ha’bugaphonobogulat, togu lemak o, oluk hau wathenebegi. At Yesus ebe waragarikmu re, aik Allah en malik naduk dagonobogwi ai ’gela’ge, at naduk togolik elalugap pesimu, aphwami ’gain ononuk logo ’gwiangma a’ge yema enebe mia a’geat de, at nak e, logo welago yo. Asogo weleigoluk, nis wiak togu lege ai en, nenebe herle werak ’gela’ge tennentarok oruakma, at en nis edeapnenebegeitik, emep namogo waraga ai pam herle hebilnenebegei ai o. 6#Kel. 19:6; Wah. 5:10Asogo hebilnenebegeitik, nis at aik paget togu lemagoluk, nenebe ’gain Allah eiye ediknenebesimu welege o. Asogo ediknenebesimu welat e, nonogola en e, “At Yesus Kristus ai, anni a’bik oruak,” oluk nis at ebe demat erliktogwi modok wolomok o, oluk, u ’gela’ge, “Amin,” egi ai o. 7#Dan. 7:13; Mat. 24:30; Mrk. 13:26; Luk. 21:27; 1Tes. 4:17; Zak. 12:10; Yoh. 19:34,37; Zak. 12:10; Mat. 24:30Yethemit! At ebe o hena ogola wagoam, aphwami ’berlegat enebe lo’bok emin, is at wa’gun dainsogo werigisa a’ge emin, enemin en enil yethogulat, ena’gul onuk lo’bok ’berlegat nge tua o, oluk mo’gulhentegis ai, “Demat emak,” oluk u ’gela’ge, “Amin,” egi ai o. 8#Wah. 22:13; Kel. 3:14Nenaik Allah Onuk Logo anni a’bik a’ge ai, otok modok welat, pageat welaga, yogodak oruagat, pobuk modok welema a’ge wema ano en eselat e, “Edip emin, ede’bi emin, anat o,” oluk oso yo.
Yohanes abi ’gela’ge pam Kristus ebe il hesi wene
9An henare henerei Yohanes nemin nenebe Yesus osi mesigat a’ge, di obotut yu obotut taknonobogukhwe, nonogola en e, “Pobuk at Allah en eragam nonobouwa,” oluk nenepe mosogo welege ai o. Oruakma, Allah iak Yesus en ’baksogo mo’gulnentesi wene ano an en mo’gulentil neselegi ai en, ne’gik herle wusogo o onuk Patmos ik e’genma ’gwelaknobou wegesema welegi ai o. 10Asogo oruakma, o nonue ’gain Onuk Logo a’ge owi dakha egeimu re, Allah Arogun nebam louk egeimu, no’borlma en at mesik iak ’bi’gong lok a’ge iak ’gela’ge pam disogo mo’gulnosoma nesa’go hwelegis o. 11“Hat hil hagun a’ge ai, pelal womup o. Wokho re, is Allah eiyagai gereja sabit pam odoktogwi a’ge, o onuk Efesus emin, Smirna emin, Pergamus emin, Tiatira emin, Sardis emin, Filadelfia emin, Laodikia emin, ene’bek perakpomup o,” oluk mo’gulnesi. 12Asogo mo’gulnesimu, “Iak ai sa en mo’gulnoso,” oluk no’borlma nil yethegi ’gal e, esaga ’gwialogwi a’ge ebe sabiren oyuk yogo re, emas a’ge pam heli’gogo oruakma nil hegi o. 13#Dan. 7:13; Dan. 10:5Ye, esaga ai ’burl e’gerlakma abat dagaga a’ge ano orogole ’gela’ge, sum yat o’borl o’gwe a’ge hwerli oyuk pam ’bekhit ’buktak, ye, emik pam e, ’bagaluk emas a’ge ’buktak. 14#Dan. 7:9#Dan. 10:6Ye, asu re, domba asu ’gut wiak a’ge ’gela’ge. Ye, il e, odouk magale ’gela’ge. 15#Yeh. 1:24; 43:2Ye, oyuk e, tembaga odouk olomu werarogwiam amolit deleng oso ai ’gela’ge o. Ye, iak e, ik hurl lok a’ge iak ’gela’ge. 16Ye, e’gik ’bekhit akhit e, hwesagal ebe sabiren tenak welaga. Ye, emde pam e, ’garok e’gat pema-pema merak a’ge liplau waga laga. Orogole amolit e, o erlige ’burl mo sellip-wallip yeriso ai ’gela’ge oruakma nil hegi o. 17#Yes. 44:6; 48:12; Wah. 2:8; 22:13Asogo oruakma nil hegirik e, nogorlok en norogole sogup werak a’ge ’gela’ge, at orogolema eragam ’bou ti lasuam e, at e’gik ’bekhit akhit en tenniesirik e, disogo mo’gulnesi, “Hogorlok erlak emen o. An nebe re, edipmu en ’bekhit ede’bimu notok modok welat e, 18nelaluk modok welegi a’ge re, anat o. An nebe arat waregi a’geat de, yethemen! Nelaluk egirik e, nelaluk modogat weleik o. Waragai ai emin, warotluk lagaimu eba emin, ’goduk horogwi a’ge an ne’gikmu oruak o. 19An asogo welegi ai en e, hat hil hegen a’ge emin, di wene yu wene yogodak ya ago a’ge emin, pobuk ema a’ge emin, ’berlegat pelal ’balip o. 20Ye, hwesagal ebe sabiren ne’gik ’bekhit akhit tenak oruakma hegen ano emin, esaga ’gwialogwi a’ge ebe sabiren oyuk yogo emas a’ge hele’gik a’ge emin, hil hegen ano re, wene hisogo ai en e, ’baksogo mo’gulheik o. Hwesagal ebe sabiren hegen ai ebe re, is malaikat Allah eiyagai gereja sabiren odoktogwi a’ge ai, tenentarok welagai a’ge ai de, entigen o. Ye, esaga ’gwialogwi a’ge ebe sabiren ai ebe re, is Allah eiyagai gereja sabiren odoktogwi a’ge aiat de, entigen o,” oluk mo’gulnesi.
Currently Selected:
Wahyu 1: Wul
Highlight
Copy
Compare
Share
Want to have your highlights saved across all your devices? Sign up or sign in
