Wahyu 3
3
Wene Allah eiyagai o Sardis a’ge enebaget mo’gulesi wene
1Asogo mo’gulnesirik pobuk mo’gulneselat, “Allah Arogun modok ’garoktak a’ge re, sabiren ’gela’ge ano eiye welat, hwesagal ebe sabiren ano ne’gigem tenak welat, taga legi a’ge ano en wene yu mo’gulheik, At malaikat Allah eiyagai o Sardis odoktogwi a’ge tenentarok welago a’ge ano, wene an en mo’gulentaik a’ge yu, hat en pelal wokho e’bek perakpemen o,
His o Sardis a’ge aphwami en honobok ogulat e, Is enelaluk oruak, oluk, ogwi a’geat de, henebe werak a’ge ’gela’ge welat henebabut togu legep a’ge ai an naluk o. 2An en his henebabut ’balise legi re, naik Allah il pam opsogo ’garoksogo togu legep erlak ai o. We, perleneat waromogoluk henede nak lebe-lebe oso eria pamat, peiyalogo inomtik e, hene’gik honoyuk ha’buktak poluk henanni omup o. 3#Mat. 24:43,44; Luk. 12:39,40; Wah. 16:15His asogo peiyalogo inoroguptik henanni orogup erlak holuk e, aphwami yogot wouwogoluk hisakho wagai ai ’gela’ge, an asogoat, his en, At ai erlige wema, oluk heneperlagat oruakma weikno oluk e, wene naduk mo’gulhentigisema henesa’go hweligep a’ge henede eberak poluk e, wiak togu legep a’ge ’baksogo ukpoluk henebabut heberloroguptik, wene aiat hene’gik ’betesogo tenak wolomup o. 4Asogo a’geat de, his aphwami o Sardis a’ge henebe weiyat logon, aphwami en onosum emerak a’ge soduk daguano oluk degelak welagai ai ’gela’ge, wiak logon tu erlakma en oruak a’ge ai, onosum ’gut a’ge ’buktu hegitsogoat ’buksogo an nemin no’gu lomul o. 5#Kel. 32:32,33; Mzm. 69:28; Mat. 10:32; Luk. 12:8; Wah. 20:12 Sa en anni ema holuk e, sum ’gut a’ge ’buktak paik o. Ye, an is aphwami enelalugabenebise legi a’ge nak ononuk tuesi’ga pam ’belak a’ge hosogo ukpaik erlak o. An naik emin, malaikat yo’go ’belagonobou wago a’ge emin, enil pam, Is yu an neiyagai o, oluk ononuk ’baksogo mo’gulentaik,
6oluk, egi a’ge ai, Allah Arogun en Allah eiyagai o di owi yu owi odoktogwi a’ge mo’gulentasu ai, henesa’go oruak holuk e, opsogo holip o, oluk mo’gulentegis a’ge ai, pelal wokho ene’bek perakpomup o,” oluk mo’gulnesi.
Wene Allah eiyagai o Filadelfia a’ge enebaget mo’gulesi wene
7 #
Yes. 22:22; Ayu. 12:14 Asogo mo’gulnesirik pobuk mo’gulneselat e, “An wiak tu erlakma en, degelak welat, niak demat nak eselegi a’ge en ’goduk horogwi a’ge Daud en a’ge wik-wok ’goduk hwerikmu re, aphwami logon en laru mia o. Ye, ’goduk lerakpaikmu re, aphwami logon en horu mia a’ge ano en wene yu mo’gulheik, At malaikat Allah eiyagai o Filadelfia odoktogwi a’ge tenentarok welago a’ge ano, wene an en mo’gulentaik a’ge yu, hat en pelal wokho e’bek perakpemen o,
8Yethemit! His henebabut togu legep e, henanni modok weiyat a’geat de, an niak hwelakpoluk hegitsogo togulat, nobok elabe tu erlakma en ’baksogo mo’gulontogulat, togu legep ai an nalukmu re, his henebaget e, ’goduk aphwami mu a’ge en laru modok mia a’ge hwerik henebegi o. 9#Yes. 43:4; 49:23; 60:14Yethemit! Is aphwami Iblis eiyagai odoktogwi enebe Yahudi a’ge erlak a’geat de, eniak eseiyat, Nis nenebe Yahudi a’ge, oluk ogwi a’ge ai, his heneragam ’gumarik, an his nede hwedik welegi a’ge ai enaluk emagoluk, is enebe his hene’bek onobou weik o, oluk demat mo’gulhentegis. 10Asogo onobou weik ai re, an en, Henepe mosogo wolomup o, oluk mo’gulhentegis a’ge ai, niak hwelakpoluk hegitsogo togu legep ai en, o pobuk Allah en aphwami ’gwiangma yema welagai a’ge ’berlegat di obotut yu obotut enebam pouwa a’ge ai pasukhwe re, his nak e, an en neragam opsogo tenhentarok weleik o. 11An perleneat weik o. Asogo weiktik, sa omut oruak sa omut erlak pungtak lagalat, enanni agai a’ge o’go ’gare-’gare ’buktak onobogwi ai ’gela’ge, o’go his wokhentaik a’ge, is aphwami muon en delogo horlouwano oluk, his ebe wegep a’ge ai, hene’gik ningsogo tenak wolomup o. 12#Yes. 62:2; 65:15; Wah. 21:2 Ye, sa en anni ema a’ge holuk e, o dum uak lagabogwi ai ’gela’ge, at asogoat Allah u’gwarek owi werikmu edikpoluk, naik Allah onuk emin, owi kota Yerusalem ’get a’ge at enat ’bogorl pam en ’belakpouma a’ge ai onuk emin, an nonuk ’get a’ge emin, an en, at ai ebam pelal ’balogo poma re, at ebe o eba en liplauma modok erlak o,
13oluk egi a’ge ai, Allah Arogun en Allah eiyagai o di owi yu owi odoktogwi a’ge mo’gulentasu ai, his henesa’go oruak holuk e, opsogo holip o, oluk mo’gulentegis a’ge ai, pelal wokho ene’bek perakpomup o,” oluk mo’gulnesi.
Wene Allah eiyagai o Laodikia a’ge enebaget mo’gulesi wene
14 #
Ams. 8:22
Asogo mo’gulnesirik, pobuk mo’gulneselat e, “Edipmu en, di a’ge yu a’ge edip pamat oruakma, Allah en walhesi a’ge ai, at obok nebabut he’bisogo demat nak oso a’ge, nonuk demat emak u ’gela’ge, Amin ano en wene yu mo’gulheik, At malaikat Allah eiyagai o Laodikia odoktogwi a’ge tenentarok welago a’ge ano, wene an en mo’gulentaik a’ge yu, hat en pelal wokho e’bek perakpemen o,
15His henebabut togu legep a’ge ai, ’berlegat an naluk o. His henede horl welat, henebakhenne togu legep erlagat, ye, aganhansogo welat, a’goluksogo togu legep erlagat, we, henede horl welat henebakhenne ’gela’ge wolorogup holuk, aiat wolorogup o. Ye, aganhan welat a’goluksogo wolorogup holuk e, aiat wolorogup o. 16A’geat de, henede horl erlagat, aganhan erlagat, we, horl de a? Aganhan de a, aganhan wei nak welegep ai en e, ik il seram a’ge enemdema en lukho ukpogwi ai ’gela’ge, an en henebe lebikhenebaik o. 17His e, henerlagaigat, henil hopnigat, henage’golomat, welarat de, Nis nenebe enede ’gela’ge modok wiagat welege, oluk pobirak erlak, his en ogulat, Nis e, nenebe nonu’gwarek en ’gainap hwerlegerik, di a’ge yu a’ge nenerlagaik om erlakma en, nenilmu a’bik welege, oluk ogu legep ai o. 18Asogo welegep ai en, his ’gain henilmu a’bik orogup en e, emas odouk pam werakho op hele’gik a’ge nebam o’go ’balogulat, henage’golom welegep a’ge ai, hene’gerli agoma no oluk e, ’bukhorlouwogoluk sum ’gut a’ge nebam o’go ’balhorlogulat, henil wiak a’ge ai, op agoam di a’ge yu a’ge yethogu lemagoluk, a’bosu henil petne egelogup en nebam o’go ’balhorlogulat, togup en henesa’go weregis o. 19#Ams. 3:12; Ibr. 12:6Asogo henesa’go weregis ai re, is aphwami an nede hwedik a’ge nak, enebe lo’bok enesa’go wusogo lagal’bisok ’go’bu warenebiso nak ai en e, wiak togu legep a’ge ai ukpoluk, henebabut heberloroguptik e, a’goluksogo togu lomup o. 20Yethemit! An nebe ’godukmu edik welat, ’goduk ’bak-’bakhasu legi o. Asogo ’bak-’bakhasuam, ap sa en an niak esa’go holholuk e, ’goduk hutniouwa holuk, an at e’bek ’gwiktik e, so’boru no’gulat nare-hare nemin hwedik wolomul o. 21An arat nanni egimu, naik ’gain welago a’ge ebalema nemin welege yu ’gela’ge, sa en anni ema holuk, an ’gain welago a’ge nebalema emin wolomogoluk edikpaik o,
22oluk egi a’ge ai, Allah Arogun en Allah eiyagai o di owi yu owi odoktogwi a’ge mo’gulentasu a’ge ai, henesa’go oruak holuk e, opsogo holip o, oluk mo’gulentegis a’ge ai, pelal wokho ene’bek perakpomup o,” oluk mo’gulnesi.
Currently Selected:
Wahyu 3: Wul
Highlight
Copy
Compare
Share
Want to have your highlights saved across all your devices? Sign up or sign in
